Amaziahna Judahli Munga
Amaziahna avāli sāthat kahai mibingli sāthata, kha athumwui naongarābingli masāthatmana, ithumwui Avāwui ain hāngkahai thāda. Edomli yuikahai eina lāngsoda, ana Israelli ngararda, ka̱shatrongwui pao akha ngahānkhami samphanga, chiwui thili yuikāhaowa; Jerusalemwui phākho chi sātekhaowa. Atam khaleilaga awui khalatta mibingnala ali sāthata.
14 1Israelwui awunga Jehoahazwui naomayara Joashna mungda kakhane kum, Joashwui naomayara Amaziahna Judahwui mungphoka. 2Mungkaphok tharan a zingkum maga̱da phangā kāshunghairasai, kala zingkum maga̱da chiko Jerusalemli munga. Ava̱va̱li Jehoaddin hoi, Jerusalemwui einana. 3Ana ithumwui Avāwui miktāli khamashung chi sai, kha avāva̱ David thada maningmana; avāva̱ Joashna kasā kahai saikora tākam eina ana sai. 4Kajujui apambing khalalei makhuithuimihaithuda; mibingna pha̱phayā kajujui apambing chili sāchinghaowa, kala otla nganamkaphā thao rikka. 5Wungram apāngli nganingshing tharan, awunga awui avāva̱li shaothata raobing chili ana shaothata.
6Kha shaothata mibingwui naomayarabing chili ana mashaothatmana; Moseswui ainwui Lairikli kapihaida lei thada, chili ithumwui Avāna kakaso, "avāngarāna naongarāwui vang mathipaimana, naongarāna avāngarāwui vang mathipaimana; mi kachiva̱na khalattawui morei vang thira."
7Ana Machi Tampākli Edomnaobing thing tharā shaothata, kala rai eina Selali khuida, chiwui aming Joktheel phokmi, chiwui aming ara eina tangda hochingda.
8Amaziahna Israelwui awunga, Jehuwui naomayara Jehoahazwui naomayara Jehoashli paomebing chihovāda hānga, "Rālu, ini mashā eina ngayangnaosa."
9Kha Israelwui awunga Jehoashna Judahwui awunga Amaziahli pao hovā chihānga, "Lebanonli khalei ka̱shatrong akhana Lebanonli khalei cedarthing akhali hānga, 'Nanao chi inaomayarawui preiva̱ sākhavai ngalāva̱li milu' da ji; kala Lebanonwui ramsā akhana rākānda ka̱shatrong chi naithathaowa. 10Nana Edomli yuihaira, kala nawui ning lāngsohaira. Chili masot khuida, kha nawui shimli pamsālu. Khisāda kakhanang khuirāda, na kala nasoung Judahla pitāhao khavai sāsikhala?"
11Amaziahna nganā khavai mamayāthuwa, chieina Israelwui awunga Jehoashna vānganaida, ana kala Judahwui awunga Amaziah, Judahli khalei Beth-shemeshli mashā eina ngayangnaowa. 12Israelna Judah yuihaida, kachāyām eina shimli yāmunghaowa. 13Israelwui awunga Jehoashna Judahwui awunga, Ahaziahwui naomayara Joashwui naomayara Amaziah chili Beth-shemeshli khuihaowa, kala Jerusalemli rāda Ephraim Ngavei eina Achikun Ngavei eina tangda awui phākho khuining shātharuk sātekmihaowa. 14Ana ithumwui Avāwui shimli kala awungawui lanshimli leikasā sinā, lupāsā, kala khorkhong saikora khuithuilaga chili lāngda mila khuida Samariali khuiunghaowa.
15Jehoashwui kasā otsakbing, awui khangatatei, awui pangshap, kala Judahwui awunga Amaziahli kathada ngararmi chi Israel Awungabingwui Thotrinchān Lairikli makapiserhaimala? 16Jehoash thikahai eina avāva̱ ngarāli ngasoda, Israelwui awungabing kala ngasoda Samariali chifahaowa; kala anaomayara Jeroboamna awui mahut thuishina.
17Judahwui awunga Joashwui naomayara Amaziahna, Israelwui awunga Jehoahazwui naomayara Jehoash thikahaiwui thili zingkum tharāda phangā ringvai. 18Amaziahwui kasā khavā saikora Judah Awungabingwui Thotrinchān Lairikli makapiserhaimala? 19Athumna Jerusalemli awuili ngathumda ngakuka; chieina Lachishli ana yāmvāhaowa. Kha athumna Lachishli awui thili mibing chihovāda chili asāthathaowa. 20Ali siguibingli sanglaga khuiunga; kala avāva̱ ngarāli ngasoda Davidwui keinung Jerusalemli chifahaowa.
21Judahwui mibing saikorana zingkum tharāda tharuk rarkahaiya Azariahli khuida, avāva̱ Amaziahwui mahut awunga sanghaowa. 22Awunga avāva̱ ngarāli ngasoda thikahaiwui thili ana Elath sakākhuilaga Judahli hanmi.
Avāwui Israeltungli Lukhamashan
23Judahwui awunga Joashwui nao Amaziahna munga tharāda kaphangā kumli, Israelwui awunga Joashwui nao Jeroboamna Samariali awunga ngasāda zingkum hangmatida akha munga. 24Ithumwui Avāwui mikyanli ana makaphā chi sai; Israelli morei sākhangasaka, Nebatwui naomayara Jeroboamwui morei saikora chiwui eina ana mangareithuimana. 25Ithumwui Avā, Israelwui Varena awui rao, Gath-hepherwui marān, Amittaiwui naomayara Jonah eina hāngkahai thāda, ana Israelwui thari Hamath vāzang khavai eina thuilaga Arabah Ngayivāk tangda hankhuiluishit. 26Kaja ithumwui Avāna Israelwui khanang marlak kahai chi theihaira; raonao maningla ningkhān maningla khipākha maleimana, Israelli khangachon khipākha maleimana. 27Kha ithumwui Avāna Israelwui ming okathuiwui eina katatserhaora da mahāngmana; chiwui vang Joashwui nao Jeroboamwui pāng eina athumli huimihaira. 28Jeroboamwui kasā khavā, ana kasāsā, awui pangshap, kala rai kathāda ngarar kaji, kala ana Israelli khalei Judahwui vang Damascus eina Hamath hankhuikahai saikora Israel Awungabingwui Thotrinchān Lairikli makapiserhaimala? 29Jeroboamna Israelwui awungabing, avāva̱ ngarāli ngasoda thihaowa; kala anaomayara Zechariahna awui mahut thuishina.
