2ይ ነገስት 14 FHB Father's Heart Bible™

14 ¹ኣብ መበል ክልተ ዓመቱ ንኢዮኣስ ወዲ ኢዮኣካዝ ንጉስ እስራኤል፥ ኣማስያ ወዲ ኢዮኣስ ኣብ ይሁዳ ነገሰ። ²ወዲ ዕስራን ሓሙሽተን ዓመት ምስ ኮነ ነገሰ፤ ኣብ ኢየሩሳሌም ድማ ዕስራን ትሽዓተን ዓመት ገዝአ። ስም እኖኡ ድማ ኢዮዓዲን ናይ ኢየሩሳሌም ነበረ። ³ኣብ ቅድሚ ኣቦና ቅኑዕ ገበረ፤ ግና ከም ኣቦኡ ዳዊት ኣይኮነን፤ ከምቲ ኣቦኡ ኢዮኣስ ዝገበሮ ዅሉ ገበረ። ⁴እቲ በረኽቲ ቦታታት ግና ኣይተኣለየን፤ እቶም ህዝቢ ድማ ገና ኣብኡ ይስውኡን ይዓጥኑን ነበሩ። ⁵እታ መንግስቲ ኣብ ኢዱ ምስ ፀንዐት ድማ፥ ነቶም ንጉስ ኣቦኡ ዝቐተልዎ ኣገልገልቱ ቐተሎም።

⁶ነውሉድ እቶም ዝቐተልዎ ግና ኣይቐተሎምን፤ ከምቲ ኣብ መፅሓፍ ሕጊ ሙሴ ዝተፅሓፈ፥ ኣቦና፦ “ኣቦታት ምእንቲ ውሉዶም ኣይሙቱን፥ ውሉድውን ምእንቲ ኣቦታቶም ኣይሙቱን፤ ነፍሲ ወከፍ ብሓጢኣቱ ይሙት” ኢሉ ኣዚዙ ኣሎ።

⁷ኣብ ለሰ ጨው ካብ ኤዶማውያን ዓሰርተ ሽሕ ቐተለ፤ ንሴላ ብውግእ ሓዛ፤ ዮቅትኤል ኢሉ ድማ ሰመያ፤ ክሳዕ ሎሚ ኸዓ ስማ ንሱ እዩ።

⁸ኣማስያ ድማ ናብ ኢዮኣስ ወዲ ኢዮኣካዝ ወዲ ኢዩ ንጉስ እስራኤል፥ ልኡኻት ልኢኹ “ንዓ፥ ገፅ ንገፅ ንራኣአ” በሎ።

⁹ኢዮኣስ ንጉስ እስራኤል ግና ናብ ኣማስያ ንጉስ ይሁዳ ከምዙይ ኢሉ መለሰሉ፦ “ኣብ ሊባኖስ ዘሎ ኣሜከላ ናብቲ ኣብ ሊባኖስ ዘሎ ዝግባ፥ ‘ጓልካ ንወደይ ሰበይቲ ክትከውን ሃበኒ’ ኢሉ ለኣኸ። ኣብ ሊባኖስ ዘሎ ኣራዊት መሮር ሓሊፉ ድማ ነቲ ኣሜከላ ረገፆ። ¹⁰ንኤዶም ወቒዕካዮ ኢኻ እሞ ልብኻ ዓቢዩ ኣሎ። በዙይ ተመካሕ፥ ግና ኣብ ገዛኻ ተቐመጥ። ንስኻን ይሁዳ ምሳኻን ምእንቲ ኽትወድቑ፥ ስለ ምንታይ ንመከራ ተለዓዓሎ ኣለኻ?”

¹¹ኣማስያ ግና ክሰምዕ ኣይፈተወን። ስለዙይ ኢዮኣስ ንጉስ እስራኤል ደየበ፤ ንሱን ኣማስያ ንጉስ ይሁዳን ድማ ኣብ ቤትሳሜስ ናይ ይሁዳ ገፅ ንገፅ ተራኣኣዩ። ¹²ይሁዳ ድማ ብእስራኤል ተስዓረ፤ ነፍሲ ወከፍ ድማ ናብ ቤቱ ሃደመ። ¹³ኢዮኣስ ንጉስ እስራኤል ድማ ንኣማስያ ንጉስ ይሁዳ ወዲ ኢዮኣስ ወዲ ኣካዝ ኣብ ቤትሳሜስ ማረኸ፤ ናብ ኢየሩሳሌም መፂኡ ኸዓ፥ ካብ ደገ ኤፍሬም ክሳዕ ደገ መኣዝን ኣስታት ሽዱሽተ ሚእቲ እመት ካብቲ ቀፅሪ ኣፍረሶ። ¹⁴ኣብ ቤት ኣቦናን ኣብ መዛግብ ቤት ንጉስን ዝነበረ ዅሉ ወርቅን ብሩርን ኣቑሑን ወሰደ፤ ሰባት ዋሕስ ድማ ወሲዱ ናብ ሰማርያ ተመለሰ።

¹⁵እቲ ዝተረፈ ናይ ኢዮኣስ ነገርን፥ እቲ ዝገበሮን፥ ሓይሉን፥ ምስ ኣማስያ ንጉስ ይሁዳ ኸመይ ኢሉ ኸም ዝተዋግአን፥ ኣብ መፅሓፍ ታሪክ ነገስታት እስራኤል ዝተፅሓፈዶ ኣይኮነን? ¹⁶ኢዮኣስ ድማ ምስ ኣቦታቱ ደቀሰ፤ ኣብ ሰማርያ ምስ ነገስታት እስራኤል ተቐበረ፤ ክንድኡ ድማ ወዱ ኢዮርብዓም ነገሰ።

¹⁷ኣማስያ ወዲ ኢዮኣስ ንጉስ ይሁዳ ድማ፥ ድሕሪ ሞት ኢዮኣስ ወዲ ኢዮኣካዝ ንጉስ እስራኤል ዓሰርተ ሓሙሽተ ዓመት ብህይወት ፀንሐ። ¹⁸እቲ ዝተረፈ ናይ ኣማስያ ነገር፥ ኣብ መፅሓፍ ታሪክ ነገስታት ይሁዳ ዝተፅሓፈዶ ኣይኮነን? ¹⁹ኣብ ኢየሩሳሌም ድማ ኣብ ልዕሊኡ ተመሓሓሉ፤ ንሱ ኸዓ ናብ ላኪሶ ሃደመ፤ ንሳቶም ግና ደድሕሪኡ ናብ ላኪሶ ሰባት ልኢኾም ኣብኡ ቐተልዎ። ²⁰ብኣፍራስ ፅዒኖም ድማ ኣምፅእዎ፤ ኣብ ኢየሩሳሌም ምስ ኣቦታቱ ኣብ ከተማ ዳዊት ተቐበረ።

²¹ኵሎም ህዝቢ ይሁዳ ድማ ወዲ ዓሰርተ ሽዱሽተ ዓመት ዝነበረ ኣዛርያስ ወሲዶም፥ ኣብ ክንዲ ኣቦኡ ኣማስያ ኣንገስዎ። ²²ንሱ ኸዓ ንጉስ ምስ ኣቦታቱ ድሕሪ ምድቃሱ፥ ንኤላት ሰሪሑ ናብ ይሁዳ መለሳ።

ምሕረት ኣቦና ኣብ ልዕሊ እስራኤል

²³ኣብ መበል ዓሰርተ ሓሙሽተ ዓመቱ ንኣማስያ ወዲ ኢዮኣስ ንጉስ ይሁዳ፥ ኢዮርብዓም ወዲ ኢዮኣስ ንጉስ እስራኤል ኣብ ሰማርያ ነገሰ፤ ኣርብዓን ሓደን ዓመት ድማ ገዝአ። ²⁴ኣብ ቅድሚ ኣቦና ክፉእ ገበረ፤ ካብቲ ኢዮርብዓም ወዲ ናባጥ ንእስራኤል ዘስሓቶ ዅሉ ሓጢኣት ኣየግለሰን። ²⁵ከምቲ ኣቦና እግዚኣብሄር ኣምላኽ እስራኤል ብጊልያኡ ነቢይ ዮናስ ወዲ ኣሚታይ በዓል ጋትሔፌር ዝተዛረቦ፥ ንወሰን እስራኤል ካብ መእተዊ ሓማት ክሳዕ ባሕሪ ዓረባ መለሶ። ²⁶ኣቦና ድማ መከራ እስራኤል የመና መሪር ከም ዝኾነ ረአየ፤ ባርያ ኾነ ናፃ ዝተረፈ የለን፤ ንእስራኤል ዝሕግዝ ድማ ኣይነበረን። ²⁷ኣቦና ግና ንስም እስራኤል ካብ ትሕቲ ሰማይ ከጥፍኦ ኣይበለን፤ ስለዙይ ብኢድ ኢዮርብዓም ወዲ ኢዮኣስ ኣድሓኖም። ²⁸እቲ ዝተረፈ ናይ ኢዮርብዓም ነገርን ግብርን፥ ሓይሉን፥ ከመይ ኢሉ ኸም ዝተዋግአን፥ ንደማስቆን ሓማትን ናይ ይሁዳ ዝነበራ ናብ እስራኤል ከመይ ኢሉ ኸም ዝመለሰንን፥ ኣብ መፅሓፍ ታሪክ ነገስታት እስራኤል ዝተፅሓፈዶ ኣይኮነን? ²⁹ኢዮርብዓም ድማ ምስ ኣቦታቱ ነገስታት እስራኤል ደቀሰ፤ ክንድኡ ድማ ወዱ ዘካርያስ ነገሰ።