2 ነገሥት 12

12 ¹ኢዮአስ በኢዩ ሰባተኛ ዓመት ነገሠ፤ በኢየሩሳሌምም አርባ ዓመት ነገሠ። እናቱ ከቤርሳቤህ የመጣች ጺብያ ነበረች። ²ኢዮአስም ካህኑ ዮዳሄ ባስተማረው ዘመን ሁሉ በአባታችን ፊት መልካም የሆነውን አደረገ። ³ዳሩ ግን የኮረብታ መስገጃ ቦታዎቹ አልጠፉም፤ ሕዝቡም በዚያ መሥዋዕት ያቀርቡ፣ ዕጣንም ያጥኑ ነበር።

⁴ኢዮአስም ካህናቱን እንዲህ አላቸው፤ “ወደ አባታችን ቤት የሚገባው ለተቀደሱ ስጦታዎች የሚሆነው ገንዘብ ሁሉ፣ የሕዝብ ቈጠራ ገንዘብ፣ ለእያንዳንዱ ሰው የተመደበው ዋጋ ገንዘብ፣ ማንም ሰው ልቡ አነሣሥቶት ወደ አባታችን ቤት የሚያመጣው ገንዘብ ሁሉ፣ ⁵ካህናቱ እያንዳንዱ ከመዝገብ ጠባቂው ይውሰዱት፤ በቤተ መቅደሱም የሚገኘውን ጕዳት ሁሉ ይጠግኑ።”

⁶ንጉሡ ኢዮአስ በነገሠ በሃያ ሦስተኛው ዓመት ግን ካህናቱ የቤተ መቅደሱን ጕዳት ገና አልጠገኑም ነበር። ⁷ንጉሡ ኢዮአስም ካህኑ ዮዳሄንና ሌሎቹን ካህናት ጠርቶ እንዲህ አለ፤ “የቤተ መቅደሱን ጕዳት ለምን አትጠግኑም? አሁንም ከእንግዲህ ከመዝገብ ጠባቂዎቻችሁ ገንዘብ አትውሰዱ፤ ለጥገና አስረክቡት።”

⁸ካህናቱም ከእንግዲህ ከሕዝቡ ገንዘብ ላለመውሰድ፣ ቤተ መቅደሱንም ራሳቸው ላለመጠገን ተስማሙ። ⁹ካህኑ ዮዳሄም ሣጥን ወስዶ በክዳኑ ላይ ቀዳዳ አበጀ፤ ወደ አባታችን ቤት ሲገቡ በስተ ቀኝ በኩል ባለው መሠዊያ አጠገብም አኖረው። ደጃፉን የሚጠብቁት ካህናትም ወደ አባታችን ቤት የሚገባውን ገንዘብ ሁሉ በዚያ ያስገቡ ነበር። ¹⁰በሣጥኑ ውስጥ ብዙ ገንዘብ መኖሩን ባዩ ጊዜ ሁሉ የንጉሡ ጸሐፊና ሊቀ ካህናቱ ወጥተው ቈጠሩት፤ በአባታችን ቤት የተገኘውንም ገንዘብ በከረጢት አደረጉት። ¹¹የተመዘነውንም ገንዘብ የአባታችንን ቤት ሥራ ለሚቈጣጠሩት ሠራተኞች ሰጡ፤ እነርሱም በአባታችን ቤት ለሚሠሩት አናጢዎችና ግንበኞች ከፈሉ፤ ¹²ለድንጋይ ሠራተኞችና ለድንጋይ ጠራቢዎችም ከፈሉ፤ የአባታችንን ቤት ጕዳት ለመጠገንም ዕንጨትና የተጠረበ ድንጋይ ለመግዛት አወጡ፤ ለጥገናውም የወጣውን ሁሉ ከፈሉ። ¹³ወደ አባታችን ቤት ከገባው ገንዘብ የብር ሰኖዎች፣ የመብራት መቈረጫዎች፣ መርጫ ሰኖዎች፣ መለከቶች ወይም ማናቸውም የወርቅ ወይም የብር ዕቃ አልተሠራም፤ ¹⁴ለሠራተኞቹ ተከፍሎ ነበር እንጂ፤ እነርሱም በእርሱ የአባታችንን ቤት ይጠግኑ ነበር። ¹⁵ለሠራተኞቹ ክፍያ ገንዘቡ ለተሰጣቸው ሰዎች ሒሳብ አልጠየቋቸውም፤ በታማኝነት ይሠሩ ነበርና። ¹⁶ከበደል መሥዋዕትና ከኀጢአት መሥዋዕት የተገኘው ገንዘብ ወደ አባታችን ቤት አልገባም፤ ለካህናቱ ነበርና።

የኢዮአስ ውድቀት

¹⁷በዚያን ጊዜ የሶርያ ንጉሥ አዛሄል ጌትን ወግቶ ያዛት፤ ከዚያም ኢየሩሳሌምን ለመውጋት ተነሣ። ¹⁸የይሁዳ ንጉሥ ኢዮአስ ግን አባቶቹ የይሁዳ ነገሥታት ኢዮሣፍጥ፣ ኢዮራምና አካዝያስ የቀደሷቸውን የተቀደሱ ስጦታዎች ሁሉ፣ ራሱም የቀደሰውን፣ በአባታችን ቤትና በንጉሡ ቤተ መንግሥት ግምጃ ቤት የነበረውን ወርቅ ሁሉ ወስዶ ለሶርያ ንጉሥ ለአዛሄል ላከ። አዛሄልም ከኢየሩሳሌም ፈቀቅ አለ።

¹⁹የቀረው የኢዮአስ ታሪክ፣ ያደረገውም ሁሉ በይሁዳ ነገሥታት ዜና መዋዕል መጽሐፍ የተጻፈ አይደለምን? ²⁰የገዛ ሹማምቱም አድመው ወደ ሲላ በሚወርደው መንገድ ላይ በቤተ ሚሎ ኢዮአስን መቱት። ²¹ሹማምቱም የሲማዓት ልጅ ዮዛባድና የሾሜር ልጅ ዮሆዛባድ መትተው ገደሉት። ከአባቶቹም ጋራ በዳዊት ከተማ ቀበሩት፤ ልጁም አሜስያስ በእርሱ ፋንታ ነገሠ።