Joashna Avāwui Shim Sākhuilui
Joashna ithumwui Avāwui shim khorum ngasaka, kha kum maga̱da kathum tāshung khikha mashokmana, chiwui vang ashamli akhur sākahai oko akha hanphut khongvāli haiya, kala pheisā chi otsākhamibingli thuiwui vāda, athum mashunda leisai. Chiwui thili Joashna Hazaelli pheisā eina mituishi, kala awui khalatta raobingna ali sāthata.
12 1Jehuwui mungda kashine kumli Jehoashna mungphoka; ana Jerusalemli zingkum hangmati munga. Ava̱va̱wui ming Zibiah hoi; ana Beershebawui mina. 2Jehoiada pāngmonna ali tamchitheilakha eina tangda Jehoashna ithumwui Avāwui miktāli khamathā otmāng sai. 3Chithālala, apam kajujubing leichinga; mibingna chi apamli pha̱kaphayā sāda nganamkaphā riktāpama.
4Jehoashna pāngmonbingli hānga, "Ithumwui Avāwui shimli khuirā kahai kathara lemmetwui pheisā saikora, mashing shānkhui kahai pheisā, mi kachichāli chākkhuira kahai aman, kala khipākha ningna ithumwui Avāwui shimli khuirā ningkachāng kahai pheisā saikora, 5pāngmonbingna kachichāna awui lansewui pāng eina chi khuilaga khorumshimli kakai theikhui kahai saikora chiphora."
6Awunga Jehoashwui mungda maga̱da kakathuma kum akha eina tangda, pāngmonbingna khorumshim kakai chi machiphorangsā leisai. 7Awunga Jehoashna Jehoiada pāngmon kala pāngmon khangatateibing chi ahokhuilaga hānga, "Khisāda nathumna khorumshim kakai chi machiphoranglā? Ara, nathumwui lansebingwui pāng eina kakhane sāda pheisā makhuipaimana; chi shim kakai chipho khavai sangmihaoranu."
8Pāngmonbingna mibingwui pāng eina kakhane sāda pheisā makhuikhavai, kala khorumshim chi themlāk eina machiphokhavai mayāngaroka. 9Jehoiada pāngmonna oko akha khuilaga chiwui ashamli chuida akhur akha sākhui, kala ithumwui Avāwui shimli kazang tharan yāpangshong hanphut khongvāli chi haihai. Chi apamli khāmongphei khamayona pāngmonbingna ithumwui Avāwui shimli khuirā kahai pheisā saikora chi oko chili haiya. 10Oko chiwui alungli pheisā kachungkha leikahai chi athumna kathei tharan, awungawui kapime kala pāngmon kharei china chi shānkhuilaga ithumwui Avāwui shimli theikhui kahai pheisā chi lupākhaoli sanghaira. 11Athumna khānghui kahai pheisā chi ithumwui Avāwui shim kasāli kashinabingwui pāngli horsangmi; kala athumna ithumwui Avāwui shimli otkasā thing mistribing kala shim kasābingli miya, 12ngalung mistribing kala ngalung kashaobingli miya; ithumwui Avāwui shim kakai chipho khavai thing kala ngalung kasing lokhavai, kala shim chipho khavai khanang kahai saikorawui vang athumna chi miya. 13Ithumwui Avāwui shimli khuirā kahai pheisā eina lupāsāwui khongsai, meikhanitla, koklui, talla̱, lah khikha sinā lah lupāwui ot akhala masāmana; 14Chi otkasābingli miya, kala athumna chi eina ithumwui Avāwui shim chiphoi. 15Otkasābingli mikhavai pheisā misang kahai mibingwui pongli athumna mangathinga, kaja athumna ning tharlak eina sāsai. 16Khayon kala moreiwui vang kachigatwui pheisā chi ithumwui Avāwui shimli mazangmana; chi pāngmonbingwui vang ngasāhaowa.
Joashwui Konglui
17Chiwui thili Aramwui awunga Hazaelna Gathli vāngararda khuihaowa; kala Jerusalemli angarar khavai muivai. 18Kha Judahwui awunga Jehoashna Judahwui awungabing awui avāva̱ ngarā Jehoshaphat, Jehoramna, kala Ahaziahna khangashit sākahai kachigat kathara saikora, kala ana khangashit sākahai kachigatla, kala ithumwui Avāwui shim kala awungawui shimwui lanshimli leikasā sinā saikora khuilaga Aramwui awunga Hazaelli chihovai. Chieina Hazaelna Jerusalemwui eina latunga.
19Joashwui kasākhavā, kala ana kasā saikora Judah Awungabingwui Thotrinchān Lairikli makapiserhaimala? 20Awui raobingna ngathumda mithit khalen sāda, Silla latung shongfali khalei Beth Millo apamli Joashli sāthata. 21Awui raobing Shimeathwui nao Jozabad kala Shomerwui nao Jehozabadna ali ngaphitsangda sāthathaowa. Athumna avāva̱ ngarāli ngasoda Davidwui keinungli chifahaowa, kala anaomayara Amaziahna awui mahut thuishina.
