Joashu Acookereria Nyũmba ya Ithe witũ

Joashu agĩathana nyũmba ya Ithe witũ ĩcookerio, no gũtiarĩ ũndũ wekĩkire mĩaka mĩrongo ĩĩrĩ na ĩtatũ, nĩ ũndũ ũcio ithandũkũ rĩrĩ na irima gĩkũnĩkoinĩ rĩkĩigwo hakuhĩ na kĩgongona, nacio mbeeca igĩthiĩ o kũrĩ aruti a wĩra, arĩa maakorirwo arĩ ehokeku. Thuutha ũcio Joashu akĩgũra Hazaeli na mbeeca, nao anene ake o ene makĩmũũraga.

Gĩcunjĩ 12.

Mwaka-inĩ wa mũgwanja wa Jehu, Jehoashu agĩtuĩka mũthamaki; agĩathana mĩaka mĩrongo ĩna kũu Jerusalemu. Nyina aarĩ Zibia wa kuuma Berisheba. Naake Jehoashu agĩĩka maũndũ marĩa maarĩ magĩrĩru maithoinĩ ma Ithe witũ mĩaka yothe ĩrĩa Jehoiada ũrĩa mũthĩnjĩri Ngai aamũrutaga. No rĩrĩ, kũndũ kũrĩa gũtũũgĩru gũgĩtigwo o kũrĩ; nao andũ magĩthiĩ na mbere kũrutĩra magongona na gũcinĩra ũbumba kũu.

Naake Jehoashu akĩĩra athĩnjĩri Ngai atĩrĩ, “Mbeeca ciothe cia iheo iria nyamũre iria irehagwo nyũmbainĩ ya Ithe witũ—mbeeca cia gũtara andũ, na kĩrĩa mũndũ o mũndũ atarĩirwo, o na mbeeca ciothe iria ngoro ya mũndũ o wothe ĩramũringĩrĩria arehe nyũmbainĩ ya Ithe witũ, athĩnjĩri Ngai nĩmacioe, o mũndũ kuuma kũrĩ mũigi wake wa kĩgĩĩna, nao macookererie handũ harĩa hothe hanangĩku harĩa hangĩoneka hekarũinĩ.”

No gũkinya mwaka-inĩ wa mĩrongo ĩĩrĩ na ĩtatũ wa mũthamaki Jehoashu, athĩnjĩri Ngai matiakoretwo macookereirie kwanangĩka kwa hekarũ. Naake mũthamaki Jehoashu agĩĩta Jehoiada ũrĩa mũthĩnjĩri Ngai na athĩnjĩri Ngai arĩa angĩ, akĩmooria atĩrĩ, “Nĩkĩĩ mũtararĩa gũcookereria kwanangĩka kwa hekarũ? Rĩu mũtigacooke kuoya mbeeca kuuma kũrĩ aigi anyu a igĩĩna—cineanei nĩ ũndũ wa gũcookereria.”

Nao athĩnjĩri Ngai magĩĩtĩkĩra kwaga gũcooka kuoya mbeeca kuuma kũrĩ andũ, na kwaga gũcookereria hekarũ o ene. Naake Jehoiada ũrĩa mũthĩnjĩri Ngai akĩoya ithandũkũ, agĩtũrĩkania irima gĩkũnĩkoinĩ gĩakĩo, agĩkĩiga mwena-inĩ wa kĩgongona, mwena wa ũrĩo rĩrĩa ũgũtoonya nyũmbainĩ ya Ithe witũ. Hau nĩho athĩnjĩri Ngai arĩa maarangagĩra mĩrango maaikagia mbeeca ciothe iria cierehagwo nyũmbainĩ ya Ithe witũ. Na rĩrĩa rĩothe moonaga atĩ nĩ kwarĩ na mbeeca nyingĩ thĩinĩ wa ithandũkũ rĩu, mwandĩki-marũa wa mũthamaki na Mũthĩnjĩri Ngai ũrĩa Mũnene makĩambata, magĩcitara, magĩciĩkĩra mondo mbeeca iria cioneekire nyũmbainĩ ya Ithe witũ. Nao makĩnengera aruti a wĩra arĩa maarorragĩra nyũmba ya Ithe witũ mbeeca iria ciathimĩĩtwo, nao makĩrĩha mabundi ma mbaũ na aaki arĩa maarutaga wĩra nyũmbainĩ ya Ithe witũ, o na aaki a mahiga na atemi a mahiga, na kũgũra mbaũ na mahiga maatinĩtwo nĩ ũndũ wa gũcookereria kwanangĩka kwa nyũmba ya Ithe witũ, o na indo ciothe iria ciahũthĩrĩirwo gũcookereria kwayo. Gũtirĩ mbeeca iria cierehagwo nyũmbainĩ ya Ithe witũ ciathondekaga mbakũri cia betha, kana ruthanju rwa gũceeha ndaambĩ, kana mbakũri cia kũminjaminja, kana coro, kana kĩndũ o gĩothe gĩa thahabu kana gĩa betha; no ciaheagwo aruti a wĩra, nao magĩcihũthĩra gũcookereria nyũmba ya Ithe witũ. Nao matiendaga ũhoro wa mbeeca kuuma kũrĩ andũ arĩa maaneanagĩrwo mbeeca cia kũrĩha aruti a wĩra, tondũ meekaga maũndũ mao na wĩhokeku. Mbeeca iria cioimaga magongona ma mahĩtia na ma mehia itiatoonyaga nyũmba ya Ithe witũ; ciarĩ cia athĩnjĩri Ngai.

Kũgũa kwa Joashu

Hĩndĩ ĩyo Hazaeli mũthamaki wa Aramu agĩtharĩkĩra Gathu, akĩmĩtaha, agĩcooka akĩhaica athiĩ agatharĩkĩre Jerusalemu. No Jehoashu mũthamaki wa Juda akĩoya iheo ciothe iria nyamũre iria maithe make Jehoshafatu, na Jehoramu, na Ahazia, athamaki a Juda, maamũrĩte, hamwe na iria ciake mwene, o na thahabu yothe iria yarĩ makũmbĩ-inĩ ma nyũmba ya Ithe witũ na nyũmba ya ũthamaki, agĩcitũmĩra Hazaeli mũthamaki wa Aramu. Nake Hazaeli akĩehera Jerusalemu.

Namo maũndũ marĩa mangĩ ma Joashu, na marĩa mothe eekire—githĩ matiandĩkĩtwo ibukuinĩ rĩa Maũndũ ma Mahinda ma Athamaki a Juda? Nao anene ake o ene magĩciirĩra ndundu, makĩũraga Joashu kũu Bethi-Milo, njĩra-inĩ ĩrĩa ĩikũrũkagĩra Sila. Anene ake, Jozabadi mũrũ wa Shimeathu na Jehozabadi mũrũ wa Shomeri, makĩmũhũũra makĩmũũraga. Nao makĩmũthika hamwe na maithe make itũũra-inĩ rĩa Daudi, nake mũũrũwe Amazia agĩthamaka ithenya rĩake.