2ይ ነገስት 12 FHB Father's Heart Bible™

12 ¹ኣብ መበል ሸውዓተ ዓመት ኢዩ፥ ኢዮኣስ ነገሰ፤ ኣብ ኢየሩሳሌም ድማ ኣርብዓ ዓመት ገዝአ። ኣዲኡ ፂብያ ካብ ቤርሳቤህ እያ ነይራ። ²ኢዮኣስ ድማ ኵሉ እቲ ካህን ዮዳሄ ዝመሃሮ ዓመታት፥ ኣብ ቅድሚ ኣቦና ቅኑዕ ዝኾነ ገበረ። ³ይኹን እምበር፥ እቲ በረኽቲ ኣይተኣለየን፤ እቲ ህዝቢ ኣብኡ ይስውኡን የዐጥኑን ነበሩ።

⁴ኢዮኣስ ድማ ነቶም ካህናት ከምዙይ በሎም፦ “እቲ ናብ ቤት ኣቦና ዝመፅእ ኵሉ ገንዘብ ናይ ቅዱስ መባእ፥ ገንዘብ ቍፀራን፥ ገንዘብ ነፍሲ ወከፍ ሰብ ከከም ዝተገምተሉን፥ ኵሉ እቲ ዝኾነ ሰብ ናብ ቤት ኣቦና ኼምፅእ ልቡ ዝደረኾ ገንዘብን፥ ⁵እቶም ካህናት፥ ነፍሲ ወከፎም ካብ ገንዘብ ዓቃቢኡ ይውሰድዎ፤ ኣብ ቤተ መቕደስ ዝተረኽበ ዝፈረሰ ዅሉ ድማ የሐድስዎ።”

⁶ክሳዕ መበል ዕስራን ሰለስተን ዓመት ንጉስ ኢዮኣስ ግና፥ እቶም ካህናት ገና ነቲ ዝፈረሰ ቤተ መቕደስ ኣይሓደስዎን ነበሩ። ⁷ሽዑ ንጉስ ኢዮኣስ ንካህን ዮዳሄን ነቶም ካልኦት ካህናትን ፀዊዑ ከምዙይ በሎም፦ “ነቲ ዝፈረሰ ቤተ መቕደስ ስለ ምንታይ ዘይተሐድስዎ? ሕዚ ድማ ካብ ገንዘብ ዓቀብትኹም ገንዘብ ኣይትውሰዱ፤ ነቲ ዝፈረሰ ንምሕዳስ ኣረክብዎ።”

⁸እቶም ካህናት ድማ ካብ ህዝቢ ገንዘብ ከይወስዱን ባዕልቶም ነቲ ቤተ መቕደስ ከይሕድስዎን ተሰማምዑ። ⁹ካህን ዮዳሄ ድማ ሓደ ሳንዱቕ ወሲዱ ኣብቲ መኽደን ጕድጓድ ኰዓተ፤ ናብ ቤት ኣቦና እንትትኣቱ ብየማን ኣብ ጥቓ እቲ መሰውኢ ኣንበሮ። እቶም ነቲ ድርኵዂት ዝሕልዉ ካህናት ከዓ ኵሉ እቲ ናብ ቤት ኣቦና ዝመፅእ ገንዘብ ኣብኡ የንብርዎ ነበሩ። ¹⁰ኣብቲ ሳንዱቕ ብዙሕ ገንዘብ ከም ዘሎ ምስ ረአዩ ድማ፥ ፀሓፊ እቲ ንጉስን እቲ ሊቀ ካህናትን ደዪቦም ቈፀርዎ፤ ነቲ ኣብ ቤት ኣቦና ዝተረኽበ ገንዘብ ከዓ ኣብ ከረጢት ገበርዎ። ¹¹ነቲ ዝተመዘነ ገንዘብ ድማ ነቶም ኣብ ልዕሊ ቤት ኣቦና ዝተመዘዙ ሰራሕተኛታት ሃብዎ፤ ንሳቶም ከዓ ነቶም ኣብ ቤት ኣቦና ዝሰርሑ ፀረብትን ሃነፅትን ከፈልዎም፤ ¹²ንነደቕትን ንወቐርቲ እምንን፥ ነቲ ዝፈረሰ ቤት ኣቦና ንምሕዳስ ዝኸውን ኣእዋምን ዝተፀርበ እምንን ንምግዛእ፥ ከምኡውን ነቲ ንምሕዳሳ ዝወፀ ዅሉ ገንዘብ ከፈልዎ። ¹³ካብቲ ናብ ቤት ኣቦና ዝመፅእ ገንዘብ ግና፥ ፅዋዓት ብሩር፥ መሳቐይታት፥ ጭሐሎታት ፅንሃሃትን፥ መለኸት፥ ወይ ዝኾነ ናይ ወርቅን ብሩርን ኣቕሓ ኣይተገብረን፤ ¹⁴ነቶም ሰራሕተኛታት ደኣ ተዋሂቡ እምበር፥ ንሳቶም ከዓ በኡ ነቲ ቤት ኣቦና የሐድስዎ ነበሩ። ¹⁵ነቶም ሰራሕተኛታት ንኽኸፍሉ ገንዘብ ዝተዋህቦም ሰባት ድማ፥ ብሓቂ ስለ ዝሰርሑ፥ ፀብፃብ ኣይሓተትዎምን። ¹⁶ገንዘብ ናይ መስዋእቲ በደልን መስዋእቲ ሓጢኣትን ግና ናብ ቤት ኣቦና ኣይኣተወን፤ ንካህናት ይኸውን ነበረ።

ውድቀት ኢዮኣስ

¹⁷ሽዑ ኣዛሄል ንጉስ ሶርያ፥ ንጌት ተዋጊኡ ሓዛ፤ ድሕሪኡ ድማ ንኢየሩሳሌም ክወግእ ገፁ ኣቕንዐ። ¹⁸ኢዮኣስ ንጉስ ይሁዳ ግና፥ ነቲ ኣቦታቱ ነገስታት ይሁዳ ዝነበሩ ኢዮሳፍጥ፥ ኢዮራም፥ ኣካዝያስ ዝቐደስዎ ዅሉ ቅዱስ መባእን፥ ባዕሉ ዝቐደሶን፥ ኣብ መዛግብ ቤት ኣቦናን ኣብ ቤተ መንግስትን ዝነበረ ዅሉ ወርቅን ወሲዱ፥ ናብ ኣዛሄል ንጉስ ሶርያ ሰደዶ። ኣዛሄል ከዓ ካብ ኢየሩሳሌም ተመለሰ።

¹⁹እቲ ዝተረፈ ናይ ኢዮኣስ ታሪኽን፥ ኵሉ ዝገበሮን፥ ኣብቲ መፅሓፍ ታሪክ ነገስታት ይሁዳ ዝተፅሓፈዶ ኣይኮነን? ²⁰ሹማምቱ ድማ ተመሓሒሮም፥ ኣብ ቤት ሚሎ፥ ናብ ሲላ ኣብ እትወስድ መንገዲ፥ ንኢዮኣስ ቀተልዎ። ²¹እቶም ሹማምቱ፥ ዮዛባድ ወዲ ሺምዓትን ዮሆዛባድ ወዲ ሾሜርን፥ ወቒዖም ቀተልዎ። ምስ ኣቦታቱ ኸዓ ኣብ ከተማ ዳዊት ቀበርዎ፤ ክንድኡ ድማ ወዱ ኣመስያስ ነገሰ።