1 Samuel 18

18 ¹Davidna Saul eina ngazek kupkahaiwui thili, Jonathanwui wuklung Davidwui wuklungli ngaziplak eina sāhaowa, kala Jonathanna ali awui khalattawui wuklung thāda leishihaowa. ²Chithang eina thuida Saulna Davidli awui pāngli khuisai, kala avāva̱wui shimli latung khavai makhui ngasakmana. ³Chieina Jonathanna David eina tuingashit akha sai, kaja ana ali awui khalattawui wuklung thāda leishihaowa. ⁴Jonathanna awui katuma phahon raitāhailaga Davidli mi, kala awui phahon, raighai, malā, kala shānneira̱la ngasoda mi.

⁵Saulna ali chihovā apam kachiva̱li Davidna mataikasang samphanga, chiwui vang eina Saulna ali shipaibingwui tungli sai; kala hina mi saikora kala Saulwui raobinglila ningyāng ungngasaka.

⁶Athum latung tharan, Davidna Philistinepa shaokathatwui eina vālaga, Israelwui keinung kachiva̱li khalei sha̱naobing awunga Saulli samphang khavai, laa sāda, pheichak sāda, mathānthup eina, timbrel kala akap-akai eina ngasoda shokserhaowa. ⁷Athumna khayāshida mathāna tharan, sha̱naobingna akha eina akha ngarokta laa sai: "Saulna awui thing shaothathaira, kala Davidna awui thing tharā shaothathaira."

⁸Saul malungvātlakhaowa; tui hi ali ningyāng maung ngasaklakthuwa. Ana hānga, "Athumna Davidli thing tharā mi, kha ili thing maningla mi. Ara wungram maningla ali khi shākhaowa?" ⁹Kala chithang eina thuida Saulna Davidli yuishida yangchinga. ¹⁰Akhama kathā ithumwui Avāwui eina makaphā manglā Saulwuitungli rāzanga; Davidna lyre huida leilakha, ana thangthang sākhami thāda, ana awui shimwui alungli vaotaraiya. Kala Saulna awui pāngli kazei singsai. ¹¹Ana kazei chi khāngkhuida, "Ina Davidli phākholi pharshānhaora" da phaninga. Kha Davidna awui eina khani shida ngarakkhuihaowa. ¹²Saulna Davidli ngacheehaowa, kaja ithumwui Avāna ali ngasomi, kha Saulwui eina pākthuihaowa. ¹³Chiwui vang eina Saulna Davidli awui pāngwui eina chihovāhaowa, kala ali thing akhawui raithāna sai; kala Davidna mibingli rai kasāli thānshokta kala latung ngasaka. ¹⁴Davidna awui apong saikorali mataikasang samphanga, kaja ithumwui Avāna ali ngasomi. ¹⁵Saulna Davidna tarākha mataikasang samphang chi theilaga, ana ali khangacheena pemhaowa. ¹⁶Kha Israel saikora kala Judahna Davidli leishilāka, kaja ana athumli rai kasāli thānshokta kala latung ngasaka.

Davidna Saulwui Khangarānli Michalli Samphanga

¹⁷Saulna Davidli hānga, "Yanglu, iwui khararva̱ Merab hili leili. Ina ali nawui preiva̱ sākhavai mira; kha iwui vang kapingameida sālu, kala ithumwui Avāwui raibing ngararlu." Kaja Saulna phaninga, "Iwui pāng awuitungli maleiranu; kha Philistinenaobingwui pāng awuitungli leiranu."

¹⁸Davidna Saulli hānga, "I khipāna, kala ishimkhur, Israelli ishāvāwui shimkhur hi khina, ina awungali fathuiphalungra?" ¹⁹Kha Saulwui naongalāva̱ Merab Davidli mikhavai tharan, Meholathpa Adri-elli apreiva̱ sākhavai mihaowa.

²⁰Kha Saulwui naongalāva̱ Michalna Davidli leishilāka. Saulna chi kashā eina, ningyāng unglakhaowa. ²¹Saulna awui ningli, "Davidli khalen sākhavai ali mira, kala Philistinewui pāngna ali ngaphit ngasakranu," da phaninga. Chiwui vang Saulna Davidli hānga, "Aja na latluida ili fathuiphalungra."

²²Saulna awui raobingli hānga, "Davidli ngathumsāda hānglu: 'Awungana nali ningyāng unga, kala awui rao saikorana nali leishi. Ara awungali fathuilu.'"

²³Kala Saulwui raobingna tui hi Davidli hānga. Davidna hānga, "Awungali fathuikahai hi nathumli kateo thingkha maningmala? I kachāma kala jila mina."

²⁴Kala Saulwui raobingna ali hānga, "Davidna hithāda hānga."

²⁵Saulna hānga, "Davidli hānglu: 'Awungana manho makhangaimana; awungawui yangkashebingli athut khuikhavai Philistinenaobingwui ahui shākha māngna.'" Ana David Philistinewui pāngli pitāra da phaninga. ^a a v25 Yangkashewui ahui chi shaothatkahaiwui shākhi thada mikhami hi, haokaphok atamli Canaan kala ngavei khalei rambingwui alungli mi saikorana theikasang kasā akhana. ²⁶Awui raobingna Davidli hi hānga; David awungali fathuikhavai ringphālakhaowa. Atam okpei makāshunghai eina, ²⁷Davidna awui mibing eina zatvāhaoda Philistinenao shākhani sāthata, kala athumwui ahui awungali khuivāmi, awungali fathuikhavai mashing okpeida shānkhuimi. Chiwui vang Saulna anao ngalāva̱ Michal ali apreiva̱ sākhavai mihaowa. ²⁸Saulna ithumwui Avā Davidli ngasomi kaji, kala anao ngalāva̱ Michalna ali leishi kaji theida theihaira eina, ²⁹Saulna Davidli ngacheemeihaowa, kala awui mirin peida Davidwui yangkashe ngasāhaowa.

³⁰Philistinewui raimi kathānabing raiwui vang zatvāchinga, kala atam kachiva̱li Davidna Saulwui otva̱bing saikorawui eina mataimeida samphanga; chiwui vang awui aming khayā kāmeihaowa.