Kinamgei saboondap Jonathan ak Daudi
Ki goochi Jonathan Daudi ngoryeennyi, rotwennyi, ak chamyennyi, ak kogoochi tyenetap kwonyiik Daudi eliphusyek taman, ago Saulo eliphusyek kityo. Ki wiir Saulo ng'oiyondit, yeityo kocheeng' kobar Daudi Philistiik. Tugul ne cheeng' koyai Daudi ne oo, amu mi Kwandanyo kobooto ineendet.
18 1Kingo baat Daudi ng'alaalet ak Saulo, konamgei saboondap Jonathan ak saboondap Daudi, ak kocham Jonathan ineendet ko uu saboondanyi. 2Ki nam Saulo Daudi kobooto ineendet eng' peetuunooto, ak ma chamji koweekyigei kootap kwandanyi. 3Ki yai anyun Jonathan arorutyet ak Daudi, amu kocham ineendet ko uu saboondanyi. 4Ki istoegei Jonathan ngoryeet ne ki ilaachi ak kogoochi Daudi, kobooto sumennyi, ak rotwennyi, ak kwangennyi, ak pirenennyi.
5Kiberuuro Daudi ole tugul ne kiyookto Saulo; si koinde Saulo ineendet koboi murenigap lugeet, ak ki ibaibai nooto piik tugul ak otwogigap Saulo agine.
6Kingo weeksei, ye kingo weeksei Daudi kobun parisyet po Philistindet, ki mong' kwonyiik eng' nganaseet tugul che po Israel kotorook Laitoryat Saulo, kotyendos, ak kourerenote, koboiboen, kobooto tambeesik ak kibugandinik. 7Kingo boiboiten, ki tyen kwonyiik koleen, “Ki bar Saulo eliphusyekyik, ak Daudi eliphusyekyik taman.”
8Ki nereech Saulo miising', ak ki ya ng'olyoondonooto eng' ineendet. Koleenji, “Kagoochi Daudi eliphuusyek taman, ago anee eliphuusyek kityo. Nee anyun ne kagong'etyi ago ma laitornatet?” 9Ago eng' peetuunooto koba, ko ki keer Saulo Daudi eng' konda ne po ng'etkong'. 10Ye kobwa peetuut age, ki nyoonji Saulo tamirmiryet ne ya ne punu Kwandanyo eng' kimnateet; ki maoten eng' koonnyi, ak kibutei Daudi ketubet eng' eunnyi, ko uu ye yaei peetuut age tugul. Ki tinyei Saulo ng'otit eng' eunnyi. 11Ki wiirta Saulo ng'otit, kobwaat kole, “Atoor Daudi kosoree inaat.” Ago kichilil Daudi eng' taitap Saulo konyil aeng'. 12Ki iywei Saulo Daudi, amu ki mi Kwandanyo kobooto ineendet, ago kiga kwo eng' Saulo. 13Si koisto Saulo Daudi eng' tainnyi, ak koyai ineendet koek kiptaiyatap eliphuut, ak kimandoi Daudi piik kondoe pooryeet ak koweek. 14Kiberuuro Daudi eng' ooreenigik tugul, amu ki mi Kwandanyo kobooto ineendet. 15Kingo keer Saulo ye kiberuuro Daudi miising', ki toptoben agobo ineendet. 16Ago ki cham piik tugul che po Israel ak Judah Daudi, amu kimandoi icheek kondoe pooryeet ak koweek.
Inyooru Daudi Mikal eng' kirwoogutikap Saulo
17Ki leenji Saulo Daudi, “Keero cheptonyu ne oo Merap. Agoonin ineendet koek osotyong'ung'—inyiganitu kityo amu anee ak iyai lugosyegap Kwandanyo.” Amu ki bwaat Saulo kole, “Mat ko mi eunnyu agaigai ineendet, ago ingomi eutap Philistiik agaigai ineendet.”
18Ki leenji Daudi Saulo, “Aa nee anee, ak nee kokwennyu, kootap kwandanyu eng' Israel, si kota aek choonyitap laitoryat?” 19Ago ye kiit sait ne kigoitoe Merap cheptap Saulo Daudi, ki kigoito ineendet Adriel Meolatindet koek osotyot.
20Ago ki cham Mikal cheptap Saulo Daudi. Kingo kas Saulo nooto, ki ibaibai ineendet. 21Ki bwaat Saulo kole, “Agoochi ineendet koek mesteet eng' ineendet, si kobir ineendet eutap Philistiik.” Si koleenji Saulo Daudi, “Tinyei rani poroindo ne po aeng' si iek choonyitnyu.”
22Ki leenji Saulo otwogikyik, “Mwachi Daudi mutyo, oleen, ‘Icham laitoryat inyee, ak kicham otwogikyik tugul inyee. Iek anyun nguno choonyinnyi.’”
23Ki mwachi otwogigap Saulo Daudi ng'aleechooto. Ki le Daudi, “Tos ming'in kiy eng' okweek keek choonyitap laitoryat? Aa anee poorto ak ne mararan.”
24Ak ki mwachi otwogigap Saulo ineendet, koleenji, “Nooto ne ki le Daudi.”
25Ki le Saulo, “Mwachi Daudi, oleen, ‘Ma machei laitoryat kanyiok, ago irirenik pogol kityo che po Philistiik—si koyaaktoogei mugetuut eng' puunigap laitoryat.’” Ki bwaat Saulo kole kobek Daudi eng' eutap Philistiik. a a v25 Ki piteet ne kingen eng' Kanaan ne po tai ak eng' pororyosyek che negitonen, keip irirenikap puunik koek koboorutyetap biik che kigabar. 26Ki mwachi otwogikyik Daudi nooto; ki boiboen keek choonyitap laitoryat. Kingo tomo kobata sait tugul, 27Ki king'eetyo Daudi kobooto murenikyik, ak kibar Philistiik pogol aeng', ak koip irirenikwak koba laitoryat, koiit tugul si koek choonyitap laitoryat. Si kogoochi Saulo ineendet cheptonyi Mikal koek osotyot. 28Kingo keer Saulo ak konai ile ki mi Kwandanyo kobooto Daudi, ak ile ki cham Mikal cheptonyi ineendet, 29Ki tes Saulo koiywei Daudi kosiir, ak ki ek puunyootap Daudi eng' peetuusyekyik tugul.
30Ki king'eetyo kiptainigap Philistiik koba pooryeet, ak ye kabwa kotugul, kiberuuro Daudi kosiir pounigap Saulo tugul; si koek kainennyi ne konyitotiin miising'.