1 Samuel 19

19 ¹Saulna awui nao Jonathan kala awui raobing katongali Davidli shaothat khavaiwui maramli hānga. Kha Saulwui nao Jonathanna Davidli matailak eina leishiya. ²Jonathanna Davidli hānga, "Ishāvā Saulna nali shaothat khavai ngarānda lei; chiwui vang eina ngathor ningngasharlu; ngathumda pamlu kala khalatta ngathumkhuilu. ³Ina thānlaga na khalei luili ishāvāwui ngasoda nganingra, kala ishāvāli nawui maramli hāngra; kala ina khi theikhuira chi nali hāngra."

⁴Jonathanna awui avāva̱ Saulli Davidwui maramli phā hānga, kala ali hānga: "Awungana awui rao Davidwui mangāli morei masāpaimara, kaja ana nawui mangāli morei masāmana. Kaja awui otsakbing chi nawui vang matailak eina phāhaira. ⁵Ana awui mirin chigatlaga Philistinepali shaothata, kala ithumwui Avāna Israel saikorawui vang kahaka khayui sāhaira. Nana chi theida ringphai. Khisāda nana maram maleila Davidli shaothatlaga, khayon makhalei asheeli morei sārakhala?"

⁶Saulna Jonathanwui tui khuida khangashit sai, "Ithumwui Avāwui ming singda kahāngna, Davidli mashaothatra."

⁷Jonathanna Davidli hokhuilaga hi saikora ali hānga; chieina Davidli Saulwui mangāli khuirai, kala Davidna kharewui thāda Saulli otram ngatha̱ya.

⁸Latluida rai shokhaowa. Davidna thānlaga Philistinenaobingli shokngarara, kala athumli kachungkha sāthata, kala athumna awui eina yāmhaowa.

⁹Kha Saulna kazei apāngli haida awui shimli pamlakha Davidna tingteilā huilakha, ithumwui Avāwui eina makaphā manglā akha Saulli rāzanga. ¹⁰Saulna awui kazei eina Davidli phākholi pharshān khavai hotnai, kha Davidna ngarakkhuihaowa, kala kazei chi phākholi nganarshanhaowa. Davidna chithang ngayā yāmlaga nganaishokhaowa. ¹¹Saulna Davidwui shimli mayon khavai kala ngathorthak ali shaothat khavai mibing chihovāhaowa. David preiva̱ Michalna ali ning ngasakta hānga, "Kalikha nana arui ngayā mayāmakha, ngathor eina na thira." ¹²Chieina Michalna Davidli charfawui eina chihotāhaowa, kala ana yāmlaga nganaishokhaowa. ¹³Chieina Michalna shimwui meoma̱ chi khuilaga petli haida, akuili meha eina kasā kachon akha hailaga, kachon akha eina khaluihaowa. ¹⁴Saulna Davidli tukkhui khavai paomebing chihovā tharan, Michalna hānga, "Ana kazāhaira."

¹⁵Chieina Saulna paomebing chi Davidli yang khavai latluida chihovālaga hānga, "Ali shaothat khavai petli ngasoda iwuili khuirālu." ¹⁶Paomebing chi rāzang tharan, shimwui meoma̱ chi petli pisai, kala akuili meha eina kasā kachon haisai.

¹⁷Saulna Michalli hānga, "Khisāda nana ili hithāda thānngui sālaga iwui yangkasheli latshok ngasakkhala?" Michalna Saulli hānga, "Ana ili hānga, 'Ili horhaimilu, khisāda ina nali shaothatrakhala?'"

¹⁸Davidna yāmlaga nganaishokhaowa; ana Ramahli Samuelli rāda, Saulna ali sākahai saikora unghānga. Chiwui thili ana Samuella ngasoda Naiothli vāda pamsanga. ¹⁹"David Ramahli khalei Naiothli lei" da Saulli hānga. ²⁰Saulna Davidli tukkhui khavai paomebing chihovai. Kha Samuel athumwui kathāna sāda nganingda marān kachungkhana marān kasā chi paomebingna thei; chitharan Saulwui paomebingwuitungli ithumwui Avāwui Manglāna zangmida, athumla marāna. ²¹Saulli hānga; ana paomebing khangatei chihovai, athumla marāna. Saulna latluida kakathuma paomebing chihovai, athumla marāna. ²²Naomeikapta Saul khalattana Ramahli vāda Seculi khalei ra̱khong kahaka chili vāshunghaowa. Ana ngahāna, "Samuel eina David kali leikhala?" "Ramahli khalei Naiothli lei," da mi akhana hānga.

²³Ana Ramahli khalei Naiothli vāhaowa; kha ithumwui Avāwui Manglāna awuitungli zangmida, ana Ramahli khalei Naiothli vākashung eina tangda marānmida zata. ²⁴Anala awui kachon raimihailaga Samuelwui mangāli marāna, kala chithang chi eina ngayā peida asāmsai eina pisai. Chiwui vang eina mibingna, "Saulla marān akhala?" da hāngra.