Saulei Dawid haitila lamda
Jonathanei haoeibü bou che ong joyoan athekulakei, hoba kho aubu nyibou sühko tetkei. Mikalei Dawid chedak ka leilukei hoba chalou longla shanga haoeibü yepshanga mühsinou che phokei. Sauleibü ngühlang künbü shuongei hao komla ayingko, seneibü Boueibü Soushou longan thusei ngüh tetenko laukei, kheijinei Saulje tegü kümkei.
19 1Saulei haoeibü shou Jonathan hoba haoeibü khangenbü shuong pendou to Dawid haitila shanga laukei. Lausikei Sauleibü shou Jonathanei Dawid to aeibou olintikei. 2Jonathanei Dawid to lenkei, “Kü bou Saulei no haitila wanthung, kheijinei ngeyang no maangsangko kishi hoba huan lotiashi. 3Ngo seka longan, no kibü seka kü bou thenko loan, ka shanga kü bou to joyolabü, hoba ngei ai haplaje kho ka la lenlabü.”
4Jonathanei haoeibü bou Saul to Dawid shanga maibü joyoan laukei, “Chobaei haoeibü khangenbou Dawid khulimbo shabü ashonjan, aishanga haoei no khulimbo shabü ashonkei. Aieilausi haoeibü kümsilei shuong ka shanga aeibou maibü kikei. 5Haoei Filistiabü haitila haoeibü langkei lemla kukei, hoba seneibü Bouei Israelbü pendou shanga thüksimin yaang sungbakei. No kho hapan olinyokei. Aila no shed akibü sii khulimbo shabü shonan, aikei küman akiko Dawid haitida?”
6Saulei Jonathan to ditkei hoba thekolanko laukei, “Seneibü Bou lang kishongko, Dawid ahaitilabü.”
7Jonathanei Dawid ngaan hao to habü ngüh pendou lenkei, hoba hao Saul jungto leian loukei, hoba Dawidei shaangbou tegü hao khangenkei.
8Tokei nyibou wapyo khangkei. Dawid longan Filistiabü to wapyoan, haoen aeibou shikei, hoba haoen hao ka satkei.
9Lausikei seneibü Bou ka amaibü soushouei Saul thüka loukei, hao haoeibü chem maanga setjinei, haoeibü ika aubu kikei, hoba Dawidei kongkin tuokkei. 10Saulei haoeibü aubuei Dawid kümthanga nimnim hanettila lambei, lausikei Dawidei hao jungka thekan sattikei, hoba aubuei kümthang ngümbei. Dawid kho youa satan satenkei. 11Saulei Dawid chem bangan kila hoba ngeyang hao haitila müt shuong hautikei. Dawid yak Maikelei hao to maisho lenkei, “No tao asatenalonga, ngeyang no ühailabü.” 12Hibü Maikelei Dawid koulom danko yantikei, hoba hao satan satenkei. 13Hobaje Maikelei chemdang heangsho sungan shen laoboua phokei, hoba kho khukhüma loneibü wi phoan, kho nei cheei küplepbei. 14Ladang Saulei Dawid lapla ngühlang künbü hautikei, Maikelei laukei, “Hao shatko kia.”
15Hibü Saulei Dawid hapla ngühlang künbü sepeinyu hautiko laukei, “Hao haitila shanga, hao shen laoboua ngei jungto leian longashi.” 16Ladang ngühlang künbü shuong chem maang to atkei, chemdang heangsho shen laoboua kikei, hoba khukhüma loneibü wi kikei.
17Saulei Maikel to laukei, “Aila no kho tegü ngo huonettikei, hoba kü dangbou satenla kukei?” Maikelei Saul to laukei, “Haoei kü to lenkei, ‘Ngo litikai, aila ngei no haitilabü?’”
18Hobaje Dawid satkei hoba satenkei, hoba Ramaa Samuel jungto loukei, hoba Saulei hao to ai kümbei pendou Samuel to lenkei. Hobaje Dawid si Samuel haosi ham hauan Naiota kikei. 19Hobaje Saul la lenkei, “Dawid Ramaa Naiota kia.” 20Hobaje Saulei Dawid lapla shanga ngühlang künbü shuong hautikei. Lausikei haoenei thuseibü tan tetenko laubü hoba Samuel haoeneibü leiyeibü loan kibü hapjinei, seneibü Bou Soushou Sauleibü ngühlang künbü shuong thükto loukei, hoba haoenkei tetenko laukei. 21Hobaje Saul la lenkei; haoei lubü ngühlang künbü shuong hautikei, hoba haoenkei tetenko laukei. Saulei semboukei ngühlang künbü shuong hautikei, hoba haoenkei tetenko laukei. 22Kheijinei Saul hao lolo Rama to haukei. Sekua ka kibü deikhün yaangbü to loukei. Haoei phekei, “Samuel si Dawid kasi kia?” Hoba müt cheei laukei, “Ramaa Naiota kia.”
23Haoei Ramaa Naiot to haukei, lausikei seneibü Bou Soushou haokei thükto loukei, hoba Ramaa Naiota loushongko haoei tetenko lauyoko paikei. 24Haoeikei haoeibü neisimei hangletkei, hoba Samuel thedanga tetenko laukei, hoba kho chalou sünga hoba langyang sünga mütkong yepbei. Khoei mütshuongei lauda, “Saul kei thuseibü yoa yoakei si?”
