1 ሳሙኤል 19

19 ¹ሳኦል ዳዊትን ስለ መግደል ለልጁ ለዮናታንና ለአገልጋዮቹ ሁሉ ተናገረ። የሳኦል ልጅ ዮናታን ግን በዳዊት እጅግ ደስ ይሰኝ ነበር። ²ዮናታንም ዳዊትን እንዲህ አለው፤ “አባቴ ሳኦል ሊገድልህ ይፈልጋል፤ ስለዚህ ጥዋት ተጠንቀቅ፤ ተደብቀህ ከዓይን ተሰውረህ ቈይ። ³እኔም ወጥቼ አንተ ባለህበት ሜዳ ከአባቴ አጠገብ እቆማለሁ፤ ስለ አንተም ለአባቴ እናገራለሁ፤ ያወቅሁትንም ሁሉ እነግርሃለሁ።”

⁴ዮናታንም ለአባቱ ለሳኦል ስለ ዳዊት መልካም ተናገረ፤ እንዲህም አለው፤ “ንጉሡ በአገልጋዩ በዳዊት ላይ ኀጢአት አይሥራ፤ እርሱ አንተን በደልህ የለምና፤ ከዚህ ይልቅ ሥራዎቹ ለአንተ እጅግ መልካም ነበሩ። ⁵ነፍሱን ለአደጋ አጋልጦ ፍልስጥኤማዊውን መታ፤ አባታችንም ለእስራኤል ሁሉ ታላቅ ድል አደረገ። አንተም አይተህ ደስ አለህ። ታዲያ ዳዊትን ያለ ምክንያት በመግደል በንጹሕ ደም ላይ ለምን ኀጢአት ትሠራለህ?”

⁶ሳኦልም የዮናታንን ቃል ሰማ፤ “አባታችን ሕያው እንደ ሆነ፣ ዳዊት አይገደልም” ብሎ ማለ።

⁷ዮናታንም ዳዊትን ጠርቶ ይህን ሁሉ ነገረው፤ ከዚያም ወደ ሳኦል አመጣው፤ ዳዊትም እንደ ቀድሞው አገለገለው።

⁸ዳግመኛም ጦርነት ተነሣ። ዳዊትም ወጥቶ ፍልስጥኤማውያንን ተዋጋ፤ በታላቅ ምት መታቸው፤ እነርሱም ከፊቱ ሸሹ።

⁹ነገር ግን ሳኦል ጦሩን በእጁ ይዞ በቤቱ ተቀምጦ ሳለ፣ ዳዊትም በገና ሲመታ፣ ከአባታችን ዘንድ የመጣ ክፉ መንፈስ በሳኦል ላይ መጣ። ¹⁰ሳኦልም ዳዊትን በጦሩ ከግድግዳው ጋር ለመሰካት ሞከረ፤ ዳዊት ግን ራቀ፤ ጦሩም ግድግዳውን መታ። ዳዊትም ሸሽቶ በዚያች ሌሊት አመለጠ። ¹¹ሳኦልም የዳዊትን ቤት እንዲጠብቁና ጥዋት እንዲገድሉት ሰዎች ላከ። የዳዊት ሚስት ሜልኮል ግን፣ “በዚህች ሌሊት ካላመለጥህ፣ ነገ ጥዋት ትገደላለህ” ብላ አስጠነቀቀችው። ¹²ስለዚህ ሜልኮል ዳዊትን በመስኮት አወረደችው፤ እርሱም ሸሽቶ አመለጠ። ¹³ከዚያም ሜልኮል የቤቱን ጣዖት ወስዳ በአልጋው ላይ አስተኛችው፤ በራስጌውም የፍየል ጠጕር አንጥፍ አደረገች፤ በልብስም ሸፈነችው። ¹⁴ሳኦልም ዳዊትን ሊይዙ መልእክተኞችን በላከ ጊዜ፣ ሜልኮል፣ “ታሟል” አለች።

¹⁵ሳኦልም ዳዊትን እንዲያዩ መልእክተኞችን መልሶ ላከ፤ “ልገድለው ከነ አልጋው ወደ እኔ አምጡት” አለ። ¹⁶መልእክተኞቹም በገቡ ጊዜ፣ የቤቱ ጣዖት በራስጌው የፍየል ጠጕር ይዞ በአልጋው ላይ ነበረ።

¹⁷ሳኦልም ሜልኮልን፣ “እንዲህ አታልለሽ ጠላቴን ለምን ለቀቅሽው?” አላት። ሜልኮልም ሳኦልን፣ “እርሱ፣ ‘ልቀቂኝ፤ ለምን እገድልሻለሁ?’ አለኝ” አለችው።

¹⁸ዳዊትም ሸሽቶ አመለጠ፤ ወደ ራማ ወደ ሳሙኤል መጥቶ ሳኦል ያደረገበትን ሁሉ ነገረው። ከዚያም እርሱና ሳሙኤል ሄደው በናዮት ተቀመጡ። ¹⁹“ዳዊት በራማ ናዮት ውስጥ ነው” ተብሎ ለሳኦል ተነገረው። ²⁰ሳኦልም ዳዊትን ሊይዙ መልእክተኞችን ላከ። ነገር ግን ነቢያቱ ትንቢት ሲናገሩ፣ ሳሙኤልም እንደ መሪ ሆኖ ቆሞ ባዩ ጊዜ፣ የአባታችን መንፈስ በሳኦል መልእክተኞች ላይ መጣ፤ እነርሱም ደግሞ ትንቢት ተናገሩ። ²¹ይህም ለሳኦል ተነገረው፤ እርሱም ሌሎች መልእክተኞችን ላከ፤ እነርሱም ደግሞ ትንቢት ተናገሩ። ሳኦልም እንደ ገና ለሦስተኛ ጊዜ መልእክተኞችን ላከ፤ እነርሱም ደግሞ ትንቢት ተናገሩ። ²²በመጨረሻም ሳኦል ራሱ ወደ ራማ ሄደ፤ በሴኩ ወዳለው ታላቅ የውሃ ጕድጓድ ደረሰ። “ሳሙኤልና ዳዊት ወዴት አሉ?” ብሎ ጠየቀ። አንድ ሰውም፣ “በራማ ናዮት ውስጥ” አለ።

²³እርሱም ወደ ራማ ናዮት ሄደ፤ ነገር ግን የአባታችን መንፈስ በእርሱም ላይ መጣ፤ ወደ ራማ ናዮት እስኪደርስ ድረስ እየተራመደ ትንቢት ተናገረ። ²⁴እርሱም ደግሞ ልብሱን አወለቀ፤ በሳሙኤል ፊት ትንቢት ተናገረ፤ ያን ቀንና ሌሊት ሁሉ ዕራቍቱን ተኛ። ስለዚህ ሰዎች፣ “ሳኦልስ ደግሞ ከነቢያት መካከል ነውን?” ይላሉ።