1 సమూయేలు 19

19 ¹సౌలు తన కుమారుడైన యోనాతానుతోను తన సేవకులందరితోను దావీదును చంపవలెనని మాటలాడెను. అయితే సౌలు కుమారుడైన యోనాతాను దావీదునందు ఎంతో ఇష్టము కలిగియుండెను. ²యోనాతాను దావీదుతో ఇట్లనెను: "నా తండ్రియైన సౌలు నిన్ను చంపగోరుచున్నాడు; కావున ఉదయమున జాగ్రత్తగా ఉండి, దాగుకొని కంటికి కనబడకుండ ఉండుము. ³నేను బయటికి వెళ్లి నీవు ఉన్న పొలములో నా తండ్రి ప్రక్కను నిలిచి, నిన్నుగూర్చి నా తండ్రితో మాటలాడెదను; నేను తెలిసికొనినదంతయు నీకు తెలియజేసెదను."

⁴యోనాతాను తన తండ్రియైన సౌలుతో దావీదునుగూర్చి మంచిగా మాటలాడి ఆయనతో ఇట్లనెను: "రాజు తన సేవకుడైన దావీదునకు విరోధముగా పాపము చేయకుండునుగాక; ఏలయనగా అతడు నీకు విరోధముగా పాపము చేయలేదు, పైగా అతని కార్యములు నీకు ఎంతో మేలుగా ఉన్నవి. ⁵అతడు తన ప్రాణమును అపాయమునకు ఒడ్డి ఆ ఫిలిష్తీయుని హతము చేయగా, మన తండ్రి ఇశ్రాయేలీయులందరికి గొప్ప విజయమును దయచేసెను. నీవు అది చూచి సంతోషించితివి. ఇట్లుండగా నిర్దోషమైన రక్తమునకు విరోధముగా పాపము చేసి నిష్కారణముగా దావీదును చంపనేల?"

⁶సౌలు యోనాతాను మాట విని, "మన తండ్రి జీవముతోడు, దావీదు చంపబడడు" అని ప్రమాణము చేసెను.

⁷యోనాతాను దావీదును పిలిచి ఈ మాటలన్నియు అతనికి తెలియజేసి, అతని సౌలు దగ్గరకు తీసికొనివచ్చెను; దావీదు మునుపటివలె అతనియొద్ద సేవచేయుచుండెను.

⁸మరల యుద్ధము మొదలాయెను. దావీదు బయటికి వెళ్లి ఫిలిష్తీయులతో పోరాడి వారిని గొప్ప దెబ్బతో హతము చేయగా, వారు అతని యెదుటనుండి పారిపోయిరి.

⁹అయితే మన తండ్రియొద్దనుండి కీడు కలిగించు ఆత్మ సౌలుమీదికి రాగా, అతడు తన యింటిలో చేతిలో ఈటె పట్టుకొని కూర్చుండియుండెను, దావీదు సితారా వాయించుచుండెను. ¹⁰సౌలు ఆ ఈటెతో దావీదును గోడకు గ్రుచ్చవలెనని చూచెను గాని, దావీదు తప్పించుకొనగా ఈటె గోడకు తగిలెను. దావీదు పారిపోయి ఆ రాత్రి తప్పించుకొనెను. ¹¹సౌలు దావీదు ఇంటిని కావలికాయుటకును ఉదయమున అతని చంపుటకును మనుష్యులను పంపెను. అప్పుడు దావీదు భార్యయైన మీకాలు అతనితో, "నేటిరాత్రి నీవు పారిపోకపోతే రేపు ఉదయమునకు నీవు చంపబడుదువు" అని హెచ్చరించెను. ¹²కావున మీకాలు దావీదును కిటికీగుండ దింపగా, అతడు పారిపోయి తప్పించుకొనెను. ¹³అప్పుడు మీకాలు ఇంటి విగ్రహమును తీసికొని మంచముమీద పరుండబెట్టి, దాని తలవైపున మేకవెంట్రుకల దుప్పటి ఉంచి, దానిని బట్టతో కప్పెను. ¹⁴దావీదును పట్టుకొనుటకు సౌలు దూతలను పంపగా, మీకాలు "అతడు రోగముగా ఉన్నాడు" అనెను.

¹⁵అప్పుడు సౌలు దావీదును చూచుటకు ఆ దూతలను తిరిగి పంపి, "అతనిని చంపుటకు మంచముతోసహా నాయొద్దకు తీసికొనిరండి" అనెను. ¹⁶ఆ దూతలు లోపలికి రాగా, ఇదిగో మంచముమీద ఇంటి విగ్రహము, దాని తలవైపున మేకవెంట్రుకల దుప్పటి ఉండెను.

¹⁷సౌలు మీకాలుతో, "నీవు ఈలాగున నన్ను మోసగించి నా శత్రువును ఎందుకు తప్పించుకొనిపోనిచ్చితివి?" అని అడిగెను. అందుకు మీకాలు సౌలుతో, "'నన్ను పోనిమ్ము, నేను నిన్ను ఎందుకు చంపవలెను?' అని అతడు నాతో చెప్పెను" అనెను.

¹⁸దావీదు పారిపోయి తప్పించుకొని, రామాలో ఉన్న సమూయేలునొద్దకు వచ్చి, సౌలు తనకు చేసినదంతయు అతనికి తెలియజేసెను. అప్పుడు అతడును సమూయేలును వెళ్లి నాయోతులో నివసించిరి. ¹⁹"దావీదు రామాలోని నాయోతులో ఉన్నాడు" అని సౌలునకు తెలుపబడెను. ²⁰సౌలు దావీదును పట్టుకొనుటకు దూతలను పంపెను. అయితే సమూయేలు తమకు నాయకుడుగా నిలిచియుండగా ప్రవచించుచున్న ప్రవక్తల గుంపును వారు చూడగా, మన తండ్రి ఆత్మ సౌలు దూతలమీదికి రాగా, వారును ప్రవచించిరి. ²¹ఇది సౌలునకు తెలుపబడగా, అతడు వేరే దూతలను పంపెను, వారును ప్రవచించిరి. సౌలు మూడవసారి మరల దూతలను పంపగా, వారును ప్రవచించిరి. ²²కడకు సౌలు తానే రామాకు వెళ్లి, సేకులోనున్న గొప్ప బావియొద్దకు చేరి, "సమూయేలును దావీదును ఎక్కడ ఉన్నారు?" అని అడిగెను. "రామాలోని నాయోతులో ఉన్నారు" అని ఒకడు చెప్పెను.

²³అతడు రామాలోని నాయోతునకు వెళ్లుచుండగా, మన తండ్రి ఆత్మ అతనిమీదికిని రాగా, అతడు రామాలోని నాయోతుకు చేరువరకు ప్రవచించుచు నడచుచుండెను. ²⁴అతడును తన వస్త్రములను తీసివేసి సమూయేలు యెదుట ప్రవచించి, ఆ దినమంతయు రాత్రియంతయు దిగంబరుడై పడియుండెను. కావుననే జనులు "సౌలును ప్రవక్తలలో ఉన్నాడా?" అని చెప్పుదురు.