1 Samuẹli 19

19 ¹Saulu bá Jonatani ọmọ rẹ̀ àti gbogbo àwọn ìránṣẹ́ rẹ̀ sọ̀rọ̀ nípa pípa Dafidi. Ṣùgbọ́n Jonatani, ọmọ Saulu, ní inú dídùn púpọ̀ sí Dafidi. ²Jonatani sọ fún Dafidi pé, “Saulu baba mi fẹ́ pa ọ́, nítorí náà ṣọ́ra ní òwúrọ̀—fi ara pamọ́, kí o má sì fi ara rẹ hàn. ³Èmi yóò jáde, èmi yóò dúró lẹ́gbẹ̀ẹ́ baba mi ní pápá níbi tí ìwọ yóò wà, èmi yóò sì bá baba mi sọ̀rọ̀ nípa rẹ—nígbà náà èmi yóò sọ ohunkóhun tí mo bá rí fún ọ.”

⁴Jonatani sọ rere nípa Dafidi fún Saulu baba rẹ̀, ó sì wí fún un pé: “Kí ọba má ṣẹ̀ sí Dafidi ìránṣẹ́ rẹ̀, nítorí tí kò ṣẹ̀ sí yín; dípò bẹ́ẹ̀, àwọn iṣẹ́ rẹ̀ ti dára púpọ̀ fún yín. ⁵Ó fi ẹ̀mí rẹ̀ wéwu láti ṣẹ́gun ará Filistini, Baba wa sì ṣẹ́gun ńlá fún gbogbo Israẹli. Ẹ rí i, inú yín sì dùn. Èéṣe tí ẹ ó fi ṣẹ̀ sí ẹ̀jẹ̀ aláìlẹ́ṣẹ̀, tí ẹ ó fi pa Dafidi láìnídìí?”

⁶Saulu fetí sí Jonatani, ó sì búra pé, “Bí Baba wa ti wà láàyè, a kì yóò pa Dafidi.”

⁷Jonatani pe Dafidi, ó sì sọ gbogbo nǹkan wọ̀nyí fún un, lẹ́yìn náà ó mú un wá sọ́dọ̀ Saulu, Dafidi sì ń sìn ín bí ti àtẹ̀yìnwá.

⁸Ogun sì tún bẹ́ sílẹ̀. Dafidi jáde, ó bá àwọn ará Filistini jà, ó sì fi ìkọlù ńlá kọlù wọ́n, wọ́n sì sá fún un.

⁹Ṣùgbọ́n ẹ̀mí búburú kan láti ọ̀dọ̀ Baba wa bà lé Saulu, nígbà tí ó jókòó nínú ilé rẹ̀, tí ọ̀kọ̀ wà ní ọwọ́ rẹ̀, tí Dafidi sì ń tẹ dùùrù. ¹⁰Saulu gbìyànjú láti fi ọ̀kọ̀ rẹ̀ kàn Dafidi mọ́ ara ògiri, ṣùgbọ́n Dafidi yẹra, ọ̀kọ̀ náà sì kàn ara ògiri. Dafidi sá, ó sì bọ́ ní òru ọjọ́ náà. ¹¹Saulu rán àwọn ọkùnrin láti ṣọ́ ilé Dafidi àti láti pa á ní àfẹ̀mọ́júmọ́. Mikali, aya Dafidi, kìlọ̀ fún un pé, “Bí ìwọ kò bá sá àsálà ní òru yìí, ìwọ yóò kú ní òwúrọ̀.” ¹²Nítorí náà Mikali sọ Dafidi kalẹ̀ láti ojú fèrèsé, ó sì sá, ó bọ́. ¹³Nígbà náà Mikali mú òrìṣà ilé, ó gbé e lé orí ibùsùn, ó fi aṣọ ìbora irun ewúrẹ́ sí orí rẹ̀, ó sì fi aṣọ bò ó. ¹⁴Nígbà tí Saulu rán àwọn ìránṣẹ́ láti mú Dafidi, Mikali wí pé, “Ara rẹ̀ kò yá.”

¹⁵Nítorí náà Saulu tún rán àwọn ìránṣẹ́ padà láti wo Dafidi, ó ní, “Ẹ gbé e wá sọ́dọ̀ mi lórí ibùsùn, kí a lè pa á.” ¹⁶Nígbà tí àwọn ìránṣẹ́ wọlé, òrìṣà ilé náà wà lórí ibùsùn, aṣọ ìbora irun ewúrẹ́ sì wà ní orí rẹ̀.

¹⁷Saulu wí fún Mikali pé, “Èéṣe tí ìwọ fi tàn mí báyìí, tí ìwọ sì jẹ́ kí ọ̀tá mi bọ́?” Mikali wí fún Saulu pé, “Ó sọ fún mi pé, ‘Jẹ́ kí n lọ, èéṣe tí èmi ó fi pa ọ́?’”

¹⁸Dafidi sá, ó sì bọ́, ó wá sọ́dọ̀ Samuẹli ní Rama, ó sì sọ gbogbo ohun tí Saulu ṣe sí i fún un. Nígbà náà òun àti Samuẹli lọ, wọ́n sì dúró ní Naioti. ¹⁹A sì sọ fún Saulu pé, “Dafidi wà ní Naioti ní Rama.” ²⁰Saulu rán àwọn ìránṣẹ́ láti mú Dafidi. Ṣùgbọ́n nígbà tí wọ́n rí ẹgbẹ́ àwọn wòlíì tí wọ́n ń sọtẹ́lẹ̀, tí Samuẹli dúró gẹ́gẹ́ bí olórí wọn, Ẹ̀mí Baba wa bà lé àwọn ìránṣẹ́ Saulu, àwọn pẹ̀lú sì sọtẹ́lẹ̀. ²¹A sọ fún Saulu; ó rán àwọn ìránṣẹ́ mìíràn, àwọn pẹ̀lú sì sọtẹ́lẹ̀. Saulu tún rán àwọn ìránṣẹ́ nígbà kẹta, àwọn náà sì sọtẹ́lẹ̀. ²²Níkẹyìn Saulu fúnra rẹ̀ lọ sí Rama, ó sì dé kànga ńlá tí ó wà ní Seku. Ó béèrè pé, “Níbo ni Samuẹli àti Dafidi wà?” Ẹnìkan sì wí pé, “Ní Naioti ní Rama.”

²³Ó lọ sí Naioti ní Rama, ṣùgbọ́n Ẹ̀mí Baba wa bà lé òun pẹ̀lú, ó sì ń rìn lọ, ó ń sọtẹ́lẹ̀, títí ó fi dé Naioti ní Rama. ²⁴Òun pẹ̀lú bọ́ aṣọ rẹ̀, ó sọtẹ́lẹ̀ níwájú Samuẹli, ó sì dùbúlẹ̀ ní ìhòòhò ní gbogbo ọjọ́ náà àti òru náà. Nítorí náà àwọn ènìyàn ń wí pé, “Saulu pẹ̀lú ha wà nínú àwọn wòlíì bí?”