Iwu Nna, Ndụ Nwa

Ndụmọdụ e nyere nwa nwoke, nke ka nʼọtụtụ gbasara ntụkwasị obi: adaberela na nghọta nke gị, were ego ị na-enweta sọpụrụ Nna anyị, ewela iwe maka mmezi ya. Mgbe ahụ amamihe nke ọnụ ahịa ya karịrị ọlaọcha, na iwu doro anya maka onye agbata obi, gụnyere ịkwụ ụgwọ ị ji taa kama echi.

Isi 3.

Nwa m, echefula ozizi m, kama ka obi gị debe iwu m, nʼihi na ha ga-atụkwasị gị ogologo ụbọchị na ọtụtụ afọ ndụ na udo. Ekwela ka ịhụnanya ọgbụgba ndụ na ikwesị ntụkwasị obi hapụ gị; kee ha nʼolu gị, dee ha nʼelu mbadamba obi gị. Ya mere, ị ga-enweta ihuọma na ezi aha nʼihu Nna anyị na nʼihu ndị mmadụ.

Jiri obi gị niile tụkwasị Nna anyị obi, adaberekwala na nghọta nke gị. Nʼụzọ gị niile, mara ya, ọ ga-emekwa ka ụzọ gị guzozie.

Abụla onye maara ihe nʼanya nke gị; tụọ Nna anyị egwu, sikwa nʼihe ọjọọ wezuga onwe gị. Nke a ga-ewetara ahụ gị ọgwụgwọ ma nye ọkpụkpụ gị ume ọhụrụ.

Jiri akụ gị sọpụrụ Nna anyị, na mkpụrụ mbụ nke ihe ubi gị niile, ^a mgbe ahụ, ọba gị ga-ejupụta nʼụba, mmanya ọhụrụ ga-ejubigakwa oke nʼite mmanya gị.

Nwa m, eledala ịdọ aka na ntị nke Nna anyị anya, ike agwụkwala gị nʼihi ịba mba ya, nʼihi na Nna anyị na-adọ onye obi ya hụrụ nʼanya aka na ntị, dịka nna si adọ nwa ya ọ na-enwe mmasị na ya aka na ntị.

Ngọzi na-adịrị onye chọtara amamihe, na onye nwetara nghọta, nʼihi na uru e si na ya nweta karịrị uru e si nʼọlaọcha nweta, uru ya dịkwa mma karịa ọlaedo. Ọ dị oké ọnụ karịa nkume ndị dị oké ọnụahịa, ọ dịghịkwa ihe ọbụla ị na-achọsi ike nke ga-adaba nha ya. Ndụ ogologo dị ya nʼaka nri; akụ na nsọpụrụ dịkwa ya nʼaka ekpe. Ụzọ ya na-atọ ụtọ, okporo ụzọ ya niile bụkwa udo. Ọ bụ osisi ndụ nye ndị na-ejide ya; a na-akpọkwa ndị na-ejidesi ya ike ndị a gọziri agọzi.

Nna anyị ji amamihe tọọ ntọala ụwa; o jikwa nghọta hiwe eluigwe; Site nʼihe ọmụma ya, ebe omimi gbawara, igwe ojii na-atụdakwa igirigi.

Nwa m, ekwela ka ihe ndị a hapụ anya gị; debe amamihe zuruoke na uche, ha ga-abụkwara mkpụrụobi gị ndụ, bụrụkwa ihe ịchọ mma nʼolu gị. Mgbe ahụ, ị ga-eji nchebe na-aga ije nʼụzọ gị, ụkwụ gị agaghịkwa asụ ngọngọ. Ọ bụrụ na ị dinaa ala, ị gaghị atụ egwu; mgbe ị dinara ala, ụra gị ga-atọ ụtọ. Atụla egwu ihe egwu nke na-abịa na mberede, maọbụ mbibi nke ndị ajọ omume mgbe ọ bịara, nʼihi na Nna anyị ga-abụ ebe ntụkwasị obi gị, ọ ga-echebekwa ụkwụ gị ka a ghara ijide ya nʼọnya.

Egbochila ihe ọma nʼebe ndị kwesịrị ya nọ, mgbe ọ dị gị nʼike ime ya. Asịla onye agbata obi gị, “Laa, bịaghachi, echi ka m ga-enye gị ya”—mgbe ị ji ya nʼaka gị. Agbala izu ọjọọ megide onye agbata obi gị, onye ji obi iru ala biri nʼakụkụ gị. Esorola onye ọbụla sewe okwu nʼefu, mgbe ọ na-emeghị gị ihe ọjọọ ọbụla.

Ekwosola nwoke na-eme ihe ike ekworo, ahọrọkwala ụzọ ya ọbụla, nʼihi na onye aghụghọ bụ ihe arụ nʼihu Nna anyị, ma ọ na-eme ka ndị ndụ ha ziri ezi mara ihe nzuzo ya. Ọbụbụ ọnụ Nna anyị dị nʼụlọ ndị ajọ omume, ma ọ na-agọzi ebe obibi ndị ezi omume. Nʼebe ndị na-akwa emo nọ, ọ na-eleda ha anya, ma ndị dị umeala nʼobi ka ọ na-enye amara. Ndị maara ihe ga-eketa nsọpụrụ, ma ndị nzuzu ga-enweta naanị ihere.