Chọọ Ya Dịka Ọlaọcha
Arụmụka ahụ nwere ọnọdụ. Ọ bụrụ na ị chọọ nghọta otú ndị mmadụ si egwu ala chọọ ọlaọcha e liri eli, mgbe ahụ ị ga-aghọta ihe ịtụ egwu Nna anyị pụtara. Ihe ọ na-enye bụ ihe bara uru nʼezie: nchedo pụọ nʼaka ndị ikom na-enwe obi ụtọ nʼime ihe ọjọọ, na pụọ nʼaka onye ọbịa nwere okwu dị nro.
2 1Nwa m, ọ bụrụ na ị nabata okwu m ma chekwaa iwu m nʼime gị, 2na-eme ka ntị gị ṅaa amamihe ntị, na-atụgharịkwa obi gị nʼebe nghọta dị; 3e, ọ bụrụ na ị kpọọ oku maka uche ma welie olu gị maka nghọta, 4ọ bụrụ na ị chọọ ya dịka ọlaọcha ma na-achọ ya dịka akụ e zoro ezo, 5mgbe ahụ, ị ga-aghọta egwu Nna anyị, chọtakwa ihe ọmụma nke Nna anyị. 6Nʼihi na Nna anyị na-enye amamihe; site nʼọnụ ya ka ihe ọmụma na nghọta na-esi abịa. 7Ọ na-echekwara ndị ziri ezi amamihe zuru oke; ọ bụ ọta nye ndị na-eje ije nʼizuoke, 8na-eche ụzọ ikpe ziri ezi nche na-elekọtakwa ụzọ ndị kwesịrị ntụkwasị obi ya.
9Mgbe ahụ, ị ga-aghọta ezi omume na ikpe ziri ezi na izi ezi—ụzọ ọma niile. 10Nʼihi na amamihe ga-abanye nʼobi gị, ihe ọmụma ga-atọkwa mkpụrụobi gị ụtọ; 11izuzu ga-echekwa gị, nghọta ga-echekwakwa gị, 12na-anapụta gị site nʼụzọ ihe ọjọọ, site nʼaka ndị ikom na-ekwu okwu gbagọrọ agbagọ, 13bụ ndị na-ahapụ ụzọ izi ezi ije ije nʼụzọ ọchịchịrị, 14ndị ime ihe ọjọọ na-atọ ụtọ, ndị na-aṅụrịkwa ọṅụ nʼịgbagọ nke ihe ọjọọ, 15bụ ndị ụzọ ha gbagọrọ agbagọ, ndị aghụghọ juru nʼụzọ ha niile.
16Amamihe ga-anapụtakwa gị site nʼaka nwanyị a machibidoro iwu, site nʼaka nwanyị ọbịa ahụ nke okwu ya na-akwọ mmụrụ mmụrụ, 17bụ onye gbahapụrụ enyi nke oge ntorobịa ya ma na-echefu ọgbụgba ndụ Nna ya. 18Nʼihi na ụlọ ya na-emikpu gaa nʼọnwụ, ụzọ ya niile na-edugakwa nʼebe ndị nwụrụ anwụ nọ. 19Ọ dịghị onye gakwuru ya na-alọghachi azụ, ha anaghịkwa erute ụzọ nke ndụ.
20Ya mere, ị ga-eje ije nʼụzọ ndị ọma na-anọgidekwa nʼụzọ ndị ezi omume. 21Nʼihi na ndị ziri ezi ga-ebi nʼala ahụ, ndị izuoke ga-anọgidekwa nʼime ya; 22ma a ga-ebipụ ndị ajọ omume site nʼala ahụ, a ga-adọpụkwa ndị aghụghọ site nʼime ya.
