Chèche l tankou ajan

Rezònman an kondisyonèl. Si ou chèche konprann jan moun fouye pou jwenn lajan ki antere, lè sa a w ap konprann sa sa vle di pou w gen krentif pou Papa nou. Sa li bay ou pratik: pwoteksyon kont moun ki pran plezi nan fè mal, ak kont yon etranje ki gen pawòl dous.

Chapit 2.

Pitit mwen, si ou resevwa pawòl mwen yo, si ou sere kòmandman mwen yo nan kè ou, pou ou louvri zòrèy ou bay sajès, pou ou panche kè ou sou bon konprann; wi, si ou rele chèche konesans, si ou leve vwa ou mande bon konprann, si ou chèche l tankou ajan, si ou fouye dèyè l tankou yon trezò ki kache, lè sa a w'a konprann sa ki rele krentif pou Papa nou, epi w'a jwenn konesans Papa nou. Paske se Papa nou ki bay sajès; se nan bouch li konesans ak bon konprann soti. Li sere bon konprann pou moun ki dwat; li tankou yon boukliye pou moun k'ap mache san repwòch, l'ap veye chemen jistis yo, l'ap pwoteje wout moun ki fidèl ak li yo.

Lè sa a w'a konprann sa ki dwat, sa ki jis ak sa ki san patipri—chak bon chemen. Paske sajès va antre nan kè ou, konesans va fè nanm ou plezi; bon jijman va veye sou ou, bon konprann va pwoteje ou, l'a delivre ou anba move chemen an, anba moun k'ap pale pawòl tòde, moun ki kite chemen ki dwat yo pou y'al mache nan chemen fènwa yo, moun ki pran plezi nan fè sa ki mal, ki kontan ak move mechanste a, moun chemen yo kwochi, moun ki malonèt nan tout wout yo.

Sajès va delivre ou tou anba fanm defandi a, anba fanm etranje a k'ap pale dous ak ou, fanm ki lage konpayon jennès li, ki bliye kontra Papa li a. Paske kay li ap koule desann nan lanmò, chemen l yo mennen kote mò yo ye. Pèsonn ki ale lakay li pa janm tounen, yo p'ap janm rive sou chemen lavi yo.

Konsa w'a mache nan chemen moun ki bon, w'a rete nan chemen moun ki dwat yo. Paske moun ki dwat yo va viv nan peyi a, moun ki san repwòch yo va rete ladan l; men y'a rache mechan yo nan peyi a, y'a derasinen moun trèt yo ladan l.