IZaga 2

2 ¹Ndodana yami, uma wamukela amazwi ami, ugcine imiyalo yami ngaphakathi kwakho, ²ulalelise indlebe yakho ekuhlakanipheni, uphendulele inhliziyo yakho ekuqondeni; ³yebo, uma umemeza ucela ukuqondisisa, uphakamisa izwi lakho ucela ukuqonda, ⁴uma ukufuna njengesiliva, ukucinga njengomcebo ofihliweyo, ⁵khona-ke uyakuqonda ukwesaba uBaba wethu, uthole ulwazi lukaBaba wethu. ⁶Ngokuba uBaba wethu upha ukuhlakanipha; emlonyeni wakhe kuphuma ulwazi nokuqonda. ⁷Ubekela abaqotho ukuhlakanipha okuqinileyo; uyisihlangu kulabo abahamba ngobuqotho, ⁸elondoloza izindlela zobulungiswa, eqapha indlela yabathembekileyo bakhe.

⁹Khona-ke uyakuqonda ukulunga nobulungiswa nokufaneleyo—yonke indlela enhle. ¹⁰Ngokuba ukuhlakanipha kuyakungena enhliziyweni yakho, nolwazi luyakuba mnandi emphefumulweni wakho; ¹¹ingqondo iyakukulinda, nokuqonda kuyakukuvikela, ¹²kukophula endleleni yobubi, kubantu abakhuluma izinto ezigwegwileyo, ¹³abashiya izindlela zobuqotho ukuze bahambe ezindleleni zobumnyama, ¹⁴abathokoza ngokwenza okubi, bajabule ngobugwegwe bobubi, ¹⁵izindlela zabo zigwegwile, abaphambene ezindleleni zabo.

¹⁶Ukuhlakanipha kuyakukophula futhi kowesifazane onqatshelweyo, kowesifazane wemzini onamazwi abushelelezi, ¹⁷oshiya umngane wobusha bakhe, akhohlwe isivumelwano sikaBaba wakhe. ¹⁸Ngokuba indlu yakhe ishonela ekufeni, nezindlela zakhe ziya kwabafileyo. ¹⁹Akekho oya kuye obuyayo, abafinyeleli ezindleleni zokuphila.

²⁰Ngakho uyakuhamba endleleni yabantu abahle, ugcine izindlela zabalungileyo. ²¹Ngokuba abaqotho bayakuhlala ezweni, nabanobuqotho bayakusala kulo; ²²kodwa ababi bayakunqunywa ezweni, nabakhohlisayo bayakusishulwa kulo.