Chānsam 2

2 ¹Inaomayara, nana iwui tui khuiakha, kala iwui ningkhami naningli kaziphaiakha, ²nawui khanā thangmeili nganāda, kala nawui ning theishingkakhuili kakasoda; ³mha, nana hāngkachitheili khangakaoakha, kala theishingkakhuiwui vang nawui akhon juiakha, ⁴nana chili lupā thāda phaakha, kala ngathum kahai lan thāda chili phāshokakha, ⁵chieina nana ithumwui Avāli khangachee chi theishingkhuira, kala ithumwui Avāwui awor samphangra. ⁶Kaja ithumwui Avāna thangmei mina; awui khamorwui eina awor kala theishingkakhui shoka. ⁷Ana khangatarbingwui vang mashunning kaziphai; ana ningsākhangazip eina kazatbingwui chāngveina, ⁸mashunwui shongfa mayona, kala awui katharabingwui shongfa yanga.

⁹Chieina nana khamashung khangarong, mashun-makhui, kala ngaraikachā mashun, kaphā shongfa saikora theishingkhuira. ¹⁰Kaja thangmei nawui ningli zangra, kala awor nawui manglāli ringphā ngasakra; ¹¹mashunmakhuina nali yangra, kala theishingkakhuina nali mayonra, ¹²makaphāwui apong eina nali kanmida, masho ngacheida tui matui mibingwui eina, ¹³mashungrikhai shongfa horhaida, tangkhamangwui apongli zata mibing, ¹⁴makaphā sāli ningyāng ungda, makaphāwui makhamashungli mathānabing, ¹⁵athumwui shongfa kha̱khamakhei, kala athumwui apongli thānkhanguibing,

¹⁶Thangmeina kapākhayong sha̱naowui eina nali kanmichingra, makhangatunva̱wui eina, chanhān khamathā chiwui eina, ¹⁷awui nganuilakhawui khavāknao horhaida, awui Avāwui tuingashit malai kahaiva̱. ¹⁸Kaja awui shim kathili tunga, kala awui shongfa kathibingli tunga. ¹⁹Awuili kavābing akhala malatungmara, kala kharingwui shongfali masamphangmara.

²⁰Chieina nana kaphā mibingwui apongli zatra, kala khangarongabingwui shongfa mayonra. ²¹Kaja mashungrik kahaibing ngaleili okthuira, kala ningsā khangazip khalei mibing chili pānra; ²²kha makhayābing ngaleiwui eina katathaora, kala mashitkasangabing chiwui eina khuithuihaora.