Sosa Yawu Mutindu Palata
Mambu yayi kele na kana. Kana nge sosa mayela mutindu bantu ke nena samu na kuzwa palata ya kubumbana, na yina nge ke bakula boma ya Tata ya beto. Yina yawu ke sumba kele ya mfunu: lukengolo na bantu yina ke monaka kyese na kusala yimbi, mpe na nzenza ya mpova ya kitoko.
2 1Mwana ya munu, kana nge yamba mambu ya munu, mpe nge bumba bantumunu ya munu na kati ya nge, 2na kutula dikutu ya nge na ndwenga, mpe na kubalula ntima ya nge na mayela; 3Ee, kana nge bokila samu na mayindu, mpe nge looka samu na mayela, 4kana nge sosa yawu mutindu palata, mpe nge sosa yawu mutindu bimvwama ya kubumbama, 5Na yina nge ke bakula boma ya Tata ya beto, mpe nge ke kuzwa luzabu ya Tata ya beto. 6Samu Tata ya beto ke pesaka ndwenga; luzabu mpe mayela ke katukaka na munoko ya yandi. 7Yandi ke bumbilaka ndwenga ya mbote samu na bantu ya kusungama; yandi kele kikebolo samu na bantu yina ke tambulaka na kulunga, 8na kukengidila banzila ya ludedomo, mpe na kukeba nzila ya bantu ya yandi ya kukwikama.
9Na yina nge ke bakula mambu ya kudedama, mpe ludedomo mpe kulunga—konso nzila ya mbote. 10Samu ndwenga ke kota na ntima ya nge, mpe luzabu ke vwanda kitoko na mwela ya nge; 11mayindu ya mbote ke keba nge, mpe mayela ke kengidila nge, 12na kukuula nge na nzila ya yimbi, na bantu yina ke tubaka mambu ya kutengama, 13bayina ke bikaka banzila ya kusungama samu na kutambula na banzila ya mpimpa, 14bayina ke monaka kyese na kusala yimbi, mpe ke yangalalaka na kutengama ya yimbi, 15banzila ya bawu kele ya kutengama, mpe bawu kele bantu ya mabanza ya yimbi na banzila ya bawu.
16Ndwenga ke kuula nge mpe na kento ya ba yiminaka, na nzenza yina ke tubaka mambu ya mbote-mbote, 17yina ke bikaka ndiku ya buntwenya ya yandi, mpe ke zimbanaka ngwisani ya Tata ya yandi. 18Samu yinzo ya yandi ke kulumukaka na lufwa, mpe banzila ya yandi ke kwendaka na bantu ya kufwa. 19Ata muntu mosi ya ke kwendaka na yandi ke vutukaka ve, mpe bawu ke kumaka ve na banzila ya luzingu.
20Na yina nge ke tambula na nzila ya bantu ya mbote, mpe nge ke landa banzila ya bantu ya kudedama. 21Samu bantu ya kusungama ke zinga na ntoto, mpe bantu ya kulunga ke bikana na yawu; 22kasi ba ke katula bantu ya yimbi na ntoto, mpe ba ke nanguna bantu ya luvunu na yawu.