ምሳሌ 2 FHB Father's Heart Bible™

2 ¹ወደይ፥ ቃላተይ እንተ ተቐቢልካ፥ ትእዛዛተይ ከዓ ኣባኻ እንተ ዓቚርካ፥ ²እዝንኻ ናብ ጥበብ ኣቕሪብካ፥ ልብኻ ድማ ናብ ምስትውዓል ኣዚርካ፤ ³እወ፥ ንኣእምሮ እንተ ፀዋዕካ፥ ድምፅኻ ድማ ንምስትውዓል እንተ ዓው ኣበልካ፥ ⁴ከም ብሩር እንተ ደለኻያ፥ ከም ሕቡእ መዝገብ ከዓ እንተ መርመርካያ፥ ⁵ሽዑ ፍርሓት ኣቦና ክተስተውዕል፥ ፍልጠት ኣቦናውን ክትረክብ ኢኻ። ⁶ኣቦና ጥበብ ይህብ እዩ እሞ፤ ካብ ኣፉ ፍልጠትን ምስትውዓልን ይወፅእ። ⁷ንቕኑዓት ፅኑዕ ጥበብ ይዕቍረሎም፤ ነቶም ብቕንዕና ዝኸዱ ዋልታ እዩ፤ ⁸መንገድታት ፍርዲ እናሓለወ፥ መንገዲ እሙናቱ ኸዓ እናተኸናኸነ።

⁹ሽዑ ንፅድቅን ንፍርድን ንቅንዕናን፥ ኵሉ ፅቡቕ መንገድን ክተስተውዕል ኢኻ። ¹⁰ጥበብ ናብ ልብኻ ክትኣቱ እያ እሞ፤ ፍልጠትውን ንነፍስኻ ደስ ከተብል እያ፤ ¹¹ምኽሪ ክትሕልወካ እያ፥ ምስትውዓል ከዓ ክሕልወካ እዩ፥ ¹²ካብ መንገዲ ክፍኣት፥ ካብቶም ጠዋይ ነገር ዝዛረቡ ሰባት ከተናግፈካ፥ ¹³እቶም መንገዲ ቅንዕና ሓዲጎም፥ ብመንገድታት ፀልማት ዝኸዱ፥ ¹⁴ክፉእ ብምግባር ዝሕጐሱ፥ ብጥውይይና ክፍኣት ከዓ ባህ ዝብሎም፥ ¹⁵መንገድታቶም ጠዋይ ዝኾነ፥ ኣብ መንገድታቶም ከዓ ቀይናን ዝኾኑ።

¹⁶ጥበብ ካብታ ዝተኸልከለት ሰበይቲ፥ ካብታ ብልሙፅ ቃላታ እትዛረብ ጋሻ ሰበይቲ ከዓ ከተናግፈካ እያ። ¹⁷እታ ብፃይ ንእስነታ እትሓድግ፥ ኪዳን ኣቦኣ ከዓ እትርስዕ። ¹⁸ቤታ ናብ ሞት ትሰጥም እያ እሞ፥ መንገድታታ ኸዓ ናብ ምዉታን ይወርድ። ¹⁹ናብኣ ዝኸዱ ሓደ እኳ ኣይምለስን፤ ናብ መንገዲ ህይወትውን ኣይበፅሑን።

²⁰ስለዙይ ብመንገዲ ሰናያት ክትከይድ፥ መንገድታት ፃድቃን ከዓ ክትሕሉ ኢኻ። ²¹ቕኑዓት ኣብታ ምድሪ ኽነብሩ እዮም እሞ፥ ፍፁማትውን ኣብኣ ኽተርፉ እዮም፤ ²²ሓጥኣን ግና ካብ ምድሪ ኽቍረፁ፥ ከዳዓትውን ካብኣ ኽምሓዉ እዮም።