Òwe 2

2 ¹Ọmọ mi, bí ìwọ bá gba ọ̀rọ̀ mi, tí ìwọ sì to àṣẹ mi jọ sínú rẹ, ²tí ìwọ bá dẹ etí rẹ sí ọgbọ́n, tí ìwọ sì yí ọkàn rẹ padà sí òye; ³bẹ́ẹ̀ ni, bí ìwọ bá ké pe làákàyè, tí ìwọ sì gbé ohùn rẹ sókè fún òye, ⁴bí ìwọ bá wá a bí fàdákà, tí ìwọ sì wá a bí ìṣúra tí a fi pamọ́, ⁵nígbà náà ni ìwọ yóò wá mọ ìbẹ̀rù Baba wa, tí ìwọ yóò sì rí ìmọ̀ Baba wa. ⁶Nítorí Baba wa ni ó ń fún ni ní ọgbọ́n; láti ẹnu rẹ̀ ni ìmọ̀ àti òye ti ń jáde. ⁷Ó to ọgbọ́n tí ó yè kooro jọ fún àwọn olódodo; òun ni asà fún àwọn tí ń rìn ní ìdúró ṣinṣin, ⁸ó ń ṣọ́ ọ̀nà ìdájọ́ òdodo, ó sì ń ṣọ́ ipa ọ̀nà àwọn olóòtítọ́ rẹ̀.

⁹Nígbà náà ni ìwọ yóò wá mọ òdodo àti ìdájọ́ òtítọ́ àti àìṣègbè—gbogbo ọ̀nà rere. ¹⁰Nítorí ọgbọ́n yóò wọ inú ọkàn rẹ, ìmọ̀ yóò sì dùn mọ́ ẹ̀mí rẹ; ¹¹ọgbọ́n-inú yóò máa ṣọ́ ọ, òye yóò sì máa dáàbò bò ọ́, ¹²ó ń gbà ọ́ sílẹ̀ kúrò ní ọ̀nà ibi, kúrò lọ́wọ́ àwọn ènìyàn tí ń sọ ọ̀rọ̀ wíwọ́, ¹³àwọn tí wọ́n kọ ọ̀nà ìdúró ṣinṣin sílẹ̀, láti máa rìn ní ọ̀nà òkùnkùn, ¹⁴àwọn tí inú wọn ń dùn láti ṣe ibi, tí wọ́n sì ń yọ̀ sí ìwà òdì ibi, ¹⁵àwọn tí ọ̀nà wọn wọ́, tí wọ́n sì jẹ́ alárékérekè ní ipa ọ̀nà wọn.

¹⁶Ọgbọ́n yóò gbà ọ́ sílẹ̀ pẹ̀lú lọ́wọ́ obìnrin èèwọ̀, lọ́wọ́ obìnrin àjèjì tí ń fi ọ̀rọ̀ dídùn ẹnu rẹ̀ tannijẹ, ¹⁷ẹni tí ó kọ ẹnìkejì ìgbà èwe rẹ̀ sílẹ̀, tí ó sì gbàgbé májẹ̀mú Baba rẹ̀. ¹⁸Nítorí ilé rẹ̀ ń wó lọ sínú ikú, ọ̀nà rẹ̀ sì ń lọ sí ọ̀dọ̀ àwọn òkú. ¹⁹Kò sí ẹnikẹ́ni tí ó tọ̀ ọ́ lọ tí ó padà bọ̀, bẹ́ẹ̀ ni wọn kì í dé ipa ọ̀nà ìyè.

²⁰Nítorí náà ìwọ yóò máa rìn ní ọ̀nà àwọn ẹni rere, tí ìwọ yóò sì tẹ̀lé ipa ọ̀nà àwọn olódodo. ²¹Nítorí àwọn olódodo yóò máa gbé ní ilẹ̀ náà, àwọn tí ìwà wọn dúró ṣinṣin yóò sì kù sínú rẹ̀; ²²ṣùgbọ́n a ó ké àwọn ènìyàn búburú kúrò ní ilẹ̀ náà, a ó sì fa àwọn ẹlẹ́tàn tu kúrò nínú rẹ̀.