Avāwui ningkhami, Naomayarawui kharing
Naomayarali chānsam, akhamathut shitkasangwui maramli: nawui khalattawui theishingkakhuili makatomalu, nawui samkaphang eina ithumwui Avāli khayāshilu, awui hāngkachitheili maningchaialu. Chieina rupa khanda mangkhamei thangkhamei, kala imanglungwui vang tuipāk ngāhāngbing, chibingwui ngachaili nawui vāti kahai chi ngathumli mahāngla tuiya khamilu.
3 1Inaomayara, iwui tamkachithei mamalaihaialu, kha nawui ningna iwui ningkhami mayonranu, 2kaja chibingna nali mirin okpei kala mirinwui zingkum kala chingri kahai mataisangmira. 3Khayākashi kala ningkatongna nali mahorhaipaishina; chi nakahungli khalaptithailu, naning lungphekli kapisanghailu. 4Chithāda na ithumwui Avā mangāli kala mibingwui mangāli ngahānkhangai kala kaphā aming samphangra.
5Ithumwui Avāli nawui ning saikora eina shitsanglu, kala nawui khalattawui theishingkakhuili makatomalu. 6Nawui apong saikorali ali theikhuilu, chieina ana nawui shongfabing khangatar ngasakra.
7Nakhalattawui mikyanli thangmeiya da maphaningalu; ithumwui Avāli khangacheelu, kala makaphāwui eina ngareithuihaolu. 8Hina nawui phasāli kharai kala nawui ara̱-arāli phā ngasakra.
9Ithumwui Avāli nawui lan eina kala nawui samkaphang saikorawui matheikhare eina khayāshilu, a a v9 Matheikhare hi hātkhavaiwui rimeikap kala mathāmeikap lemmet kahaina, chili khipākha masākhaunglaklakha ithumwui Avāli chigatmi. 10chithāda nawui chumbing samphangkhare eina pemluira, kala nawui vaichumbing drakhāra̱ kadhar eina ngayipemluira.
11Inaomayara, ithumwui Avāwui kharākli maningkachaialu, kala awui hāngkhamachinwui vang ngachāng machatalu, 12kaja ithumwui Avāna awui ningna leishi a chili hāngmachinmi, avāva̱na awui ningyāng ung a naomayarali hāngmachinmi thāda.
13Thangkhamei samkaphang a chi, kala theishingkakhui samphang a chila sokhamina, 14kaja awui eina tongkazā chi lupāwui tongkazāle phāmei, kala awui tongkazā sināle phāmei. 15Ana chāra̱-chāsānlila aman sakmei, kala nana ningkachāng saikora ali pāntam khavai maleimana. 16Awui yāpangli mirin okpei lei; awui uishong pāngli kashāng kala khayākakā lei. 17Awui apongbing chi ringphālaka, kala awui shongfa saikora chi chingri kahaina. 18Ali singkashebingli chi kharingwui thingrongna; ali singtitkashebing chi sokhamina.
19Ithumwui Avāna thangmei eina okathui sakakā; theishingkakhui eina kazingram pāna; 20Awui awor eina kathukbing ngawokkhaihaira, kala muiyāna ikra̱ tāmi.
21Inaomayara, hibing nawui mikyan eina mayāmthuihailakaranu; kaphā thangkhamei kala mashun ning singtitlu, 22kala chi nawui manglāwui kharing ngasāra, kala nakahungwui sāri ngasāra. 23Chieina nana nawui apongli tāphup eina zatra, kala naphei mangaphokmara. 24Nana pikhuiakha, na ngacheemara; nana pikhui tharan, nawui pikakhui china shimlakra. 25Kashuirak khangachee, lah makhayābingwui kashimān rā tharan chili, mangacheealu; 26kaja ithumwui Avā chi nawui ning khanganung ngasāra, kala naphei khalenli manwui eina ngākmira.
27Nana chi sākhavai pangshap leilakha, kaphā samphangkhangayibingli kaphā makhuithuimihaialu. 28Nawui pāngli chi leilakha, nawui khongnainaoli, "Vālu, kala latunglu, akhama ina chi mira," da mahāngalu. 29Nawui khaleipamli ning tāphup eina okthuida khalei nawui khongnainaoli makaphā sākhavai mamachukphāphaalu. 30Ana nali zakkashi masaakha, maram maleila mi akhala eina makharar ngarokalu.
31Ngashaokazar mili mayuishialu, kala awui apong akhanidala makapangkhuialu, 32kaja kha̱khamakhei mi hi ithumwui Avāwui vang ningkakachai otna, kha khangatarbingli chi ana awui ning khanganung mira. 33Ithumwui Avāwui khonkashi chi makhayābingwui shimkhurli lei, kha khangarongawui shim chi ana somihaira. 34Mana̱kashebingli chi ana mana̱rora, kha khangahuiabingli ana lumashanmira. 35Thangkhamabingna khayākakā mathunkhuira, kha mangkhama̱bingna maikashi maningla samphangra.
