Ng'atuutigap Kwanda, Saboondap Weeriit
Kaneetisyet ne po lakweet, che chang' agobo mang'unet: amatiegei eng' ng'omnateng'ung' inyee, iyan Kwandanyo eng' logoekyuk, amesase tigoonennyi. Yeityo ng'omnateet ne karaaran kosiir fedha, ak ng'atuutigap togeet che pwoonen, kobooto iilat kiit ne iame raini ak ma tomono.
3 1Weeriinnyu, matutye kaneetisyennyu, ago ingoriip muguleldang'ung' ng'atuutikyuk, 2amu tesei icheek kooindap peetuusyek ak kenyiisyegap saboondo ak kaalyeet koonin. 3Amabagu rireenet ak imanda inyee; irat icheek eng' kurgeeng'ung', isir icheek kiit ne kisirei ne po muguleldang'ung'. 4Si inyooru myeeindo ak kainet ne myee eng' taitap Kwandanyo ak eng' taitap piik.
5Iyan Kwandanyo eng' muguleldang'ung' komugul, ak amatiegei eng' ng'omnateng'ung' inyee. 6Inai ineendet eng' ortinweguk tugul, ak koolitiit ineendet ortinweguk.
7Amegu utaatindet eng' koonyeeng'ung' inyee; iywei Kwandanyo, ak iwelelgei eng' yaityet. 8Nooto ko sobisyet eng' poortang'ung' ak kobiyo kaweguk.
9Igoochi Kwandanyo teegisto eng' mogornatosyeguk ak eng' logoek che tai che po tuguukyuk tugul, a a v9 Logoek che tai ko ki kebeberta ne tai ak ne myee miising' eng' rurutik, che ki kigoochi Kwandanyo kotomo keboisye kiy age tugul eng' icheek. 10si konyiit chogeniguk tuguuk che chaang', ak kotesak tereenikwak divaik che leelach.
11Weeriinnyu, amesase tigoonetap Kwandanyo, anan ing'etu amu ng'erunennyi, 12amu itigoni Kwandanyo ineendet ne chamei muguleldanyi, ko uu ye itigoni kwan weeriinnyi ne baibaitunjin.
13Berurei chiito ne nyoor utaatyet, ak chiito ne nyoor ng'omnateet, 14amu keljinet ne punu ineendet ko karaaran kosiir keljinet ne punu fedha, ak che nyooru ineendet ko karaaran kosiir thahabu. 15Anyiny ineendet kosiir koik che po kamanuutyet, ak ma mi kiy age tugul ne imache ne imuuch korogendoigei ak ineendet. 16Mi kooindap saboondo eng' eunnyi ne po tai; ak eng' eunnyi ne po kaadeet ko mi teegisto ak mogornatosyek. 17Karaaran ortinwekyik, ak kaalyeet ortinwekyik tugul. 18Ko keetit ne po saboondo eng' icheek che namei ineendet; che namgei ineendet komugul kiguure berurei.
19Ki toi Kwandanyo ng'wony eng' utaatyet; ak ki igimit kipsengwet eng' ng'omnateet; 20Eng' naennyi koyatagis rirosyek, ak iroroi poolik rewoot.
21Weeriinnyu, amakistoe tuguuchu eng' koonyeeng'ung'; iriip utaatyet ne komyee ak kabwaatet, 22ak koek icheek saboondo eng' saboondang'ung' ak kiy ne karaaran eng' kurgeeng'ung'. 23Ara iwendi ortinweng'ung' eng' kaalyeet, ak mariichkei keldang'ung'. 24Ngot iru, maiywei; ye iru, anyinyi rwondang'ung'. 25Amaiywei kamuiset ne nyoonei mang'etei, anan ng'emeetap piik che ya ye konyo, 26amu koek Kwandanyo kayaneng'ung', ak koriip keldang'ung' si manamgei.
27Amang'eti kararanyet eng' icheek che nyoljin niito, ye mi eung'ung' iyai. 28Amaleenji chiitap kokweng'ung', “Iwe, ak iweege, ak tomo agoonin”—ye itinye inyee. 29Amaperber yaityet agobo chiitap kokweng'ung', ne menyei kobooten eng' kayaneet. 30Amonereekyinotegei ak chii age tugul puch, ngot ma koyain kiy ne ya.
31Ametinye ng'etkong' agobo chiito ne koroom, ak amechoor ortinwekyik age tugul, 32amu wechei Kwandanyo chiito ne ma po iman, ago kobooto che po iman eng' kayanoniito. 33Mi chubisyet ne po Kwandanyo kootap chiito ne ya, ago koberuuri kooretap che po iman. 34Sasei chombilik, ago kogoochin myeeindo che nyerootiin. 35Nyoorunee che utaatiin teegisto, ago nyoorunee che oo perber teweernateet kityo.