ምሳሌ 3

3 ¹ልጄ ሆይ፣ ትምህርቴን አትርሳ፤ ልብህ ግን ትእዛዜን ይጠብቅ፤ ²እነርሱ የዕድሜን ርዝመት፣ የሕይወት ዘመናትንና ሰላምን ይጨምሩልሃልና። ³ምሕረትና ታማኝነት አይለዩህ፤ በአንገትህ ላይ እሰራቸው፤ በልብህ ጽላት ላይ ጻፋቸው። ⁴እንዲህም በአባታችንና በሰዎች ፊት ሞገስንና መልካም ስምን ታገኛለህ።

⁵በፍጹም ልብህ በአባታችን ታመን፤ በራስህ ማስተዋልም አትደገፍ። ⁶በመንገድህ ሁሉ እርሱን ዕወቅ፤ እርሱም ጎዳናህን ያቀናልሃል።

⁷በራስህ ዐይን ጥበበኛ አትሁን፤ አባታችንን ፍራ፤ ከክፋትም ራቅ። ⁸ይህም ለሰውነትህ ፈውስን፣ ለዐጥንቶችህም እረፍትን ያመጣል።

⁹አባታችንን በሀብትህ፣ ከፍሬህም ሁሉ በበኵራት አክብረው፤ ^a a v9 በኵራት ከመከሩ ፊተኛውና ምርጡ ድርሻ ነበሩ፤ ከእርሱም ምንም ሳይውል አስቀድመው ለአባታችን ይቀርቡ ነበር። ¹⁰ያን ጊዜ ጐተራዎችህ በትርፍ ይሞላሉ፤ መጥመቂያዎችህም በአዲስ ወይን ይጐርፋሉ።

¹¹ልጄ ሆይ፣ የአባታችንን ተግሣጽ አትናቅ፤ በዘለፋውም አትታክት፤ ¹²አባታችን ልቡ የሚወደውን ይገሥጻልና፤ አባት ደስ የሚለውን ልጁን እንደሚገሥጽ።

¹³ጥበብን የሚያገኝ፣ ማስተዋልንም የሚያተርፍ ሰው ብፁዕ ነው፤ ¹⁴ከእርስዋ የሚገኘው ትርፍ ከብር ይበልጣልና፤ ፍሬዋም ከወርቅ ይሻላል። ¹⁵ከዕንቍዎች ይልቅ ውድ ናት፤ የምትመኘው ሁሉ ከእርስዋ ጋራ ሊወዳደር አይችልም። ¹⁶ረጅም ዕድሜ በቀኝ እጅዋ ነው፤ ብልጥግናና ክብርም በግራ እጅዋ ናቸው። ¹⁷መንገዶችዋ ደስ የሚያሰኙ ናቸው፤ ጎዳናዎችዋም ሁሉ ሰላም ናቸው። ¹⁸ለሚይዟት የሕይወት ዛፍ ናት፤ አጥብቀው የሚይዟትም ብፁዓን ይባላሉ።

¹⁹አባታችን በጥበብ ምድርን መሠረተ፤ በማስተዋልም ሰማያትን አጸና፤ ²⁰በዕውቀቱ ጥልቆች ተከፈቱ፤ ደመናትም ጠልን ያንጠባጥባሉ።

²¹ልጄ ሆይ፣ እነዚህን ከዐይንህ አትለያቸው፤ ጤናማ ጥበብንና ልባምነትን ጠብቅ፤ ²²ለነፍስህ ሕይወት፣ ለአንገትህም ጌጥ ይሆናሉ። ²³ያን ጊዜ በመንገድህ ተማምነህ ትሄዳለህ፤ እግርህም አይሰናከልም። ²⁴በተኛህ ጊዜ አትፈራም፤ ተኝተህም እንቅልፍህ ጣፋጭ ይሆናል። ²⁵ድንገተኛ ድንጋጤን፣ በክፉዎች ላይ የሚመጣውንም ጥፋት አትፍራ፤ ²⁶አባታችን አመኔታህ ይሆናልና፤ እግርህም እንዳይያዝ ይጠብቃል።

²⁷ልታደርገው በእጅህ ኀይል ሳለ፣ መልካምን ለሚገባቸው ሰዎች አትከልክል። ²⁸ከአንተ ጋራ ሳለ፣ ለባልንጀራህ፣ “ሂድና ተመለስ፤ ነገ እሰጥሃለሁ” አትበለው። ²⁹በባልንጀራህ ላይ ክፉ አታስብ፤ ³⁰ክፉ ባላደረገብህ ጊዜ፣ ከማንም ሰው ጋራ ያለ ምክንያት አትጣላ።

³¹ዐመፀኛ ሰውን አትቅና፤ ከመንገዶቹም አንዱን እንኳ አትምረጥ፤ ³²ጠማማ ሰው በአባታችን ዘንድ የተጠላ ነውና፤ ቅኖችን ግን ወደ ምሥጢሩ ያቀርባል። ³³የአባታችን እርግማን በክፉ ሰው ቤት ላይ ነው፤ የጻድቃንን መኖሪያ ግን ይባርካል። ³⁴ዘባቾችን ይዘብትባቸዋል፤ ለትሑታን ግን ጸጋን ይሰጣል። ³⁵ጥበበኞች ክብርን ይወርሳሉ፤ ሰነፎች ግን ውርደትን ብቻ ያገኛሉ።