Pa om zathang bing, sa om ringnu
Sa khat khou chong kani, balumsanu om lang bi inku: naraanto om theinu chung bi noh mako, na tapaan bina ani Pa khou takhwang towo, Baom laak thangnu ding riangre to mako. Atiga ningtingnu ga lupa ma za thangnu gaye, khatle naanu lang chongtan kadipnu bing, haba bi patso makka tun natnu bi na leithwan ding pinu le amme.
3 1Asa, aom bachu thangnu ding ririak se mako, atiyeda nasung na aom zathang bing ding ngaak ngo, 2Balangbe hagana nang khou lumik leng khatle ringnu sangwan le dai bazaangnu pi sei thanglune. 3Chonghen kathan om kriangnu khatle balumsa zanu ding nang khouna se tingnu mako; haga ding naring bi bang thang ngo, nasung om pot bi haga ding hiak thang ngo. 4Hadanga nangna ani Pa meithaan bi khatle mi nun meithaan bi karonu khatle kasanu rupkathan lousulune.
5Nasung brumza bina ani Pa khou balumsaro, atiyeda naraanto om theinu chung bi noh mako. 6Na lampui bing brumza bi Maan ding theiyo, atiga Maanna na lampui bing ga to baze thanglune.
7Namik bi nang cham ningtingnu diga chak thang mako; ani Pa ding kachiga bathainu bina bathan sat ngo. 8Hagana na pum ding pi sa thangluga naru ding le basak thanglune.
9Ani Pa ding na lan bina khatle na tapaan brumza om kamanu kraa bina takhwang towo, a a v9 Kamanu kraa gabe lou aat om kama khatle kasa kateknu kaze gaye, haga ding chat tong hanlat ani Pa khou thou to ngaaknuwe. 10atiga na inta bing ga tapaanna tamnu sip thanglune, khatle na khao bing ga drakha tui kathanna lwang satlune.
11Asa, ani Pa om twei thangnu ding balaanu to mako, mak tabe Baom laak thangnu bi riangre mako, 12Balangbe ani Pa na Basung na kriangnu ding twei thang nge, pa khatna pem thangnu basa ding twei thang danga.
13Ningtingnu lousunu maan ga aih saye, khatle bakaba theinu lousunu maan le aih saye, 14Balangbe habei khouna lousunu ga tangka khouna lousunu lak pina sa inkunuwe, khatle baom siantong ga kachaak lak pina sa inkunuwe. 15Maan ga baman kungnu lung bing lak pina baman kungnuwe, khatle nangna ra-aamnu pot pakhatchale habei le bachamnu ngamlaye. 16Ringnu leng ga bakut inchang pek la ongme; bakut imbei pek la lan bing khatle takhwang ongme. 17Ba lampui bing ga karonuwe, khatle ba lampui brumza ga dai bazaangnuwe. 18Bating namnu bing khou Maan ga ringnu sing gaye; Bating karakka chuinu bing ga rithoi pinu diga kou thang nge.
19Ani Pa na ningtingnu bina talei ram ding dam thang rwe; bakaba theinu bina tambaan bing ding to kathan rwe; 20Baom theinu bina kathuknu bing ga pwak bak rwe, khatle tambu bingna dakhu tui ding pi ta damme.
21Asa, heiba bing ding namik bina khwa se mako; kasanu ningtingnu khatle sung khoranu ding ngaak chuiyo, 22atiga hagana na katha lang ringnu tolune khatle naring lang tapon tolune. 23Atiga nangna na lampui bi barak theiga selune, khatle naket ga noh tanglaye. 24Nangna inthi dabe, nangna kachilaye; nangna inthi kaan bi, na in ga thumlune. 25Thei mak daakka hungnu katei ding kachi mako, mak tabe bathainu mi nun om braannu hungnu kaan bi le kachi mako, 26Balangbe ani Pa na na bachunnu tolune khatle naket ga phaa bi man mak lang ngaak thanglune.
27Haga tonu na kut bi ngam ongnu kaan bi, haga khopnu bing khouna kasanu ding maak satnu mako. 28Haga na pam bi ongnu kaan bi, na nau nanao khou hadanga rin mako, “Sero, atiga hung latro, atiga inswan eina pi thangne.” 29Na nau nanao ding bathainu chwan ong mako, maan ga nang pam bi balumsaga lung nge. 30Maanna nang khou bathainu to mak ongnu kaan bi, lampui maakka mi pakhatchale le kae kanaa mako.
31Kae kanaa tonu mi ding antiam mako, khatle balampui bing lak pina khatchale ka thang mako, 32Balangbe sung khoranu mi ga ani Pa mikphaang bi batannuwe, atiyeda bazenu mi ding Maanna basung bi lou thang nge. 33Ani Pa om sengnu ga bathai tonu mi in chung bi amme, atiyeda ririak senu mi in ding Maanna rithoi pi thang nge. 34Senu choi banuinu nun ding Maanna balaanu to nge, atiyeda sung kadungnu mi ding Maanna phaangkriang pi thang nge. 35Ningtingnu mi bingna takhwang lousulune, atiyeda kapangnu rwanna bachu za lousulune.