Umarnan Uba, Rayuwar Ɗa

Shawara ga ɗa, galibi game da dogara: kada ka dogara ga fahimtarka, ka girmama Ubanmu da abin da kake samu, kada ka ji haushin horonsa. Sa'an nan hikima da ta fi azurfa daraja, da dokokin maƙwabtaka kai tsaye, har da biyan bashin da ake binka yau maimakon gobe.

Babi na 3.

Ɗana, kada ka manta da koyarwata, amma bari zuciyarka ta kiyaye umarnaina, gama za su ƙara maka tsawon kwanaki da shekarun rai da salama. Kada ka bar madawwamiyar ƙauna da aminci su rabu da kai; ka ɗaura su kewaye da wuyanka, ka rubuta su a allon zuciyarka. Ta haka za ka sami tagomashi da kyakkyawan suna a gaban Ubanmu da kuma a gaban mutane.

Ka dogara ga Ubanmu da dukan zuciyarka, kada kuma ka jingina ga ganewarka. A cikin dukan hanyoyinka ka san shi, shi kuwa zai miƙe maka hanyoyinka.

Kada ka zama mai hikima a idonka; ka ji tsoron Ubanmu, ka kuma juya baya ga mugunta. Wannan zai kawo lafiya ga jikinka da kuma sabuntawa ga ƙasusuwanka.

Ka girmama Ubanmu da dukiyarka da kuma nunan fari na dukan amfaninka, ^a sa'an nan rumbunanka za su cika da yalwa, randunanka kuma za su yi ambaliya da sabon ruwan inabi.

Ɗana, kada ka rena horon Ubanmu, kada kuma ka gaji da gyaransa, gama Ubanmu yakan hori wanda zuciyarsa take ƙauna, kamar yadda uba yakan hori ɗan da yake farin ciki da shi.

Mai albarka ne wanda ya sami hikima, da kuma wanda ya sami ganewa, gama ribar da ake samu daga gare ta ta fi ta azurfa, ribarta kuma ta fi ta zinariya. Ta fi duwatsu masu daraja tamani, kuma babu wani abin da kake marmari da ya kai ta. Tsawon rai yana a hannunta na dama; a hannunta na hagu kuwa akwai dukiya da girma. Hanyoyinta masu daɗi ne, dukan hanyoyinta kuma salama ne. Ita itaciyar rai ce ga waɗanda suka riƙe ta; ana ce da waɗanda suka riƙe ta ƙwarai masu albarka.

Ubanmu ta wurin hikima ya kafa duniya; ta wurin ganewa ya kafa sammai; ta wurin saninsa aka tsage zurfafan ruwaye, gizagizai kuma suna zubo da raɓa.

Ɗana, kada ka rasa ganin waɗannan; ka riƙe ingantacciyar hikima da hankali, za su kuma zama rai ga ranka da kuma ado ga wuyanka. Sa'an nan za ka yi tafiya cikin aminci a hanyarka, ƙafarka kuma ba za ta yi tuntuɓe ba. In ka kwanta, ba za ka ji tsoro ba; sa'ad da ka kwanta, barcinka zai yi daɗi. Kada ka ji tsoron fargaba ba zato ba tsammani, ko na hallakar da mugaye sa'ad da ta zo, gama Ubanmu zai zama gabagaɗinka, zai kuma kiyaye ƙafarka daga fāɗawa tarko.

Kada ka hana alheri ga waɗanda suka cancanci shi, sa'ad da yake cikin ikonka ka yi haka. Kada ka ce wa maƙwabcinka, “Je ka, ka komo, gobe kuwa zan ba ka”—alhali kana da shi a hannunka. Kada ka ƙulla wa maƙwabcinka mugunta, wanda yake zama kusa da kai cikin aminci. Kada ka yi gardama da wani ba dalili, sa'ad da bai yi maka wata illa ba.

Kada ka yi kishin mutum mai tashin hankali, kada kuma ka zaɓi waɗansu hanyoyinsa, gama mai karkataccen hali abin ƙyama ne ga Ubanmu, amma yana ba masu adalci sirrinsa. La'anar Ubanmu tana a kan gidan mugaye, amma yana sa wa gidan masu adalci albarka. Ga masu ba'a yana reni, amma ga masu tawali'u yana ba da alheri. Masu hikima za su gāji girma, amma wawaye kunya kaɗai za su samu.