Nganālu, Inaongarā
Avā akhana awui avāva̱na ali hāngkahai chi naomayarali mi, kala chapter hina chi khangarum chi mikli ngasai. Awui ngāhāngbing apongwui maramna: masoda pānghoshang thālāk kavā apong, kala ngachon kahai, khina ngasuk ngasakakha theimakhui kahai apong. Nawui wuklung khamayonlu, kala mangāshong ngasamlu.
4 1Inaongarā, avāwui hāngkachithei nganālu; nganātitkhuilu, kala theishingkakhui khuilu. 2Ina nathumli tamkachithei khamathā michinga, chiwui vang iwui hāngkachithei mahorhaialu. 3Kaja ina tākam eina ishāvāwui naomayara akha sai, mangā kala ishava̱wui leikashinao akhamānga. 4Ana ili tamchitheida hānga, "Iwui tui hi nawui wuklungli hailu; iwui ningkhami mayonlu chieina na ringra. 5Thangkhamei khuilu, theishingkakhui khuilu; mamalaihaialu, kala ikhamorwui tui eina mangareithuihaialu. 6Ali mahorhaialu, chieina ana nali phārimira; ali leishilu, chieina ana nali yangmira. 7Thangmeiwui haokaphok hi hina: thangkhamei khuilu; kala nana keipai kasā saikorawui alungli, theishingkakhui khuilu. 8Ali khām kahaida singtitlu, chieina ana nali reingasakra; ali hungrei khuilu, chieina ana nali khayākakā samphang ngasakra. 9Ana nakuili mayong pāsi khangakham sangmira; ana nali tekhamateiwui kuihon mira."
10Nganālu, inaomayara, kala iwui tui khuisanglu, kala nawui mirinwui zingkum kachungkha ngasāra. 11Ina nali thangkhameiwui shongfa tamchitheihaira; ina nali khangatar apongli thānzathaira. 12Na zat tharan, nawui pheikār mangaveikhammara; kala na kharin tharan, na mangaphokmara. 13Hāngkachithei chi singtitlu, mahorhaialu; ali ngākmilu, kaja ana nawui mirinna.
14Makhayābingwui apongli naphei mazangalu, kala makaphā kasābingwui shongfali mazatalu. 15Chi chihochaohaolu, chishong mavāalu; chiwui eina pākhailaga ngareithuihaolu. 16Kaja khangui masaakha athumna mapimana; kachikathā akhali konglui ngasak masaakha athumwui ngasāmkakhui raimihai. 17Athumna makhayāwui kashakazā ngaleozai, kala khangashaowui drakhāra̱ mang.
18Kha khangaronga miwui apong chi ngathorwui kahor kathāna, ngashunwui kahor pemtingranglakha eina tangda mathingmi zatta horkhamira. 19Makhayā mibingwui shongfa chi tangmangting kathāna; khina athumli ngaphok ngasakkhala kaji athumna matheimana.
20Inaomayara, iwui tui nganākhuilu; iwui chānsam nāshunglu. 21Namikyanwui eina athumli mahorhaialu; nawui kathuka wuklungli athumli singtitmalu. 22Kaja athumli phā a chibingwui vang athum kharingna, kala athumwui phasā tongtingwui vang kharaina.
23Ot saikorawuitungli, nawui wuklung mayonlu, kaja na kasā ot saikora chi awui alungwui eina shoka. 24Kha̱khamakhei tui chi nakhamorwui eina horhaolu, kala kakapik morchai chi nawui eina tāthuihaolu. 25Namikna mangāshong ngarong eina yangranu; namangāli ngasanlaga yangchinglu. 26Napheiwui apong chi mathāsek eina chukmaja̱lu, chithākha nawui apong saikora ningnganungda leira. 27Uishong lah yāshong mangareithuihaialu; napheina makaphāwui eina chihochaohaolu.
