Òwe 4

4 ¹Ẹ gbọ́, ẹ̀yin ọmọ mi, sí ìtọ́ni baba; ẹ fetísílẹ̀, kí ẹ sì ní òye. ²Mo ń fún yín ní ẹ̀kọ́ tí ó yè kooro, nítorí náà ẹ má ṣe kọ ìtọ́ni mi sílẹ̀. ³Nítorí èmi náà jẹ́ ọmọ lọ́dọ̀ baba mi, ọmọ pẹ̀lẹ́, àti àyànfẹ́ kan ṣoṣo ìyá mi. ⁴Ó kọ́ mi, ó sì wí pé, “Jẹ́ kí ọkàn rẹ di ọ̀rọ̀ mi mú; pa àwọn òfin mi mọ́, ìwọ yóò sì yè. ⁵Ní ọgbọ́n, ní òye; má ṣe gbàgbé, má sì ṣe yà kúrò nínú ọ̀rọ̀ ẹnu mi. ⁶Má ṣe kọ̀ ọ́ sílẹ̀, yóò sì dáàbò bò ọ́; fẹ́ ẹ, yóò sì ṣọ́ ọ. ⁷Ìbẹ̀rẹ̀ ọgbọ́n ni èyí: ní ọgbọ́n; àti pẹ̀lú gbogbo ohun tí o bá ní, ní òye. ⁸Gbé e ga, yóò sì gbé ọ ga; gbà á mọ́ra, yóò sì mú ọlá wá fún ọ. ⁹Yóò fi ọ̀ṣọ́-orí oore-ọ̀fẹ́ sí orí rẹ; yóò sì fún ọ ní adé ògo.”

¹⁰Gbọ́, ọmọ mi, kí o sì gba ọ̀rọ̀ mi, ọdún ìyè rẹ yóò sì pọ̀. ¹¹Mo ti kọ́ ọ ní ọ̀nà ọgbọ́n; mo ti fà ọ́ gba ipa ọ̀nà títọ́ lọ. ¹²Nígbà tí o bá ń rìn, ìṣísẹ̀ rẹ kì yóò ní ìdíwọ́; nígbà tí o bá sì ń sáré, ìwọ kì yóò kọsẹ̀. ¹³Di ìtọ́ni mú, má ṣe jẹ́ kí ó bọ́; ṣọ́ ọ, nítorí òun ni ìyè rẹ.

¹⁴Má ṣe fi ẹsẹ̀ sí ipa ọ̀nà àwọn ènìyàn búburú, má sì ṣe rìn ní ọ̀nà àwọn olùṣe-ibi. ¹⁵Yẹ̀ ẹ́ sílẹ̀, má ṣe rìn lé e; yà kúrò lọ́dọ̀ rẹ̀, kí o sì rékọjá lọ. ¹⁶Nítorí wọn kò lè sùn bí kò ṣe pé wọ́n ṣe búburú; a gba ìsinmi wọn bí wọn kò bá mú ẹnìkan kọsẹ̀. ¹⁷Wọ́n ń jẹ àkàrà ìwà búburú, wọ́n sì ń mu wáìnì ìwà ipá.

¹⁸Ṣùgbọ́n ipa ọ̀nà àwọn olódodo dàbí ìmọ́lẹ̀ àfẹ̀mọ́júmọ́, tí ń mọ́lẹ̀ sí i, tí ń mọ́lẹ̀ sí i títí di ọ̀sán gangan. ¹⁹Ọ̀nà àwọn ènìyàn búburú dàbí òkùnkùn biribiri; wọn kò mọ ohun tí ń mú wọn kọsẹ̀.

²⁰Ọmọ mi, fetí sí ọ̀rọ̀ mi; tẹ́ etí rẹ sílẹ̀ sí àwọn gbólóhùn mi. ²¹Má ṣe jẹ́ kí wọ́n kúrò lójú rẹ; pa wọ́n mọ́ jinlẹ̀ nínú ọkàn rẹ. ²²Nítorí ìyè ni wọ́n jẹ́ fún àwọn tí ó rí wọn, àti ìwòsàn fún gbogbo ara wọn.

²³Ju gbogbo rẹ̀ lọ, ṣọ́ ọkàn rẹ, nítorí láti inú rẹ̀ ni ohun gbogbo tí o ń ṣe ti ń ṣàn jáde. ²⁴Mú ọ̀rọ̀ wíwọ́ kúrò ní ẹnu rẹ, kí o sì mú ètè ẹ̀tàn jìnnà sí ọ. ²⁵Jẹ́ kí ojú rẹ wo iwájú tààrà; fi ojú rẹ wo ọ̀nà síwájú rẹ tààrà. ²⁶Ronú dáradára nípa ipa ọ̀nà fún ẹsẹ̀ rẹ, gbogbo ọ̀nà rẹ yóò sì wà ní àìléwu. ²⁷Má ṣe yà sí ọ̀tún tàbí sí òsì; mú ẹsẹ̀ rẹ kúrò níbi ibi.