箴言 4

4 ¹我嘅仔女啊,你哋要聽父親嘅教導; 要留心,好得着聰明。 ²我畀你哋嘅係好嘅道理, 所以唔好離棄我嘅教導。 ³因為我都曾經係我父親嘅仔, 係我阿媽眼中溫柔而又獨一嘅至愛。 ⁴佢教導我,話: 「你個心要緊守我嘅說話; 遵守我嘅命令,你就會存活。 ⁵要得着智慧,要得着聰明; 唔好唔記得,亦都唔好偏離我口中嘅說話。 ⁶唔好離棄佢,佢就會保護你;愛佢,佢就會看顧你。 ⁷智慧嘅開端 就係:要得着智慧;喺你所有得着嘅嘢入面, 要得着聰明。 ⁸珍惜佢,佢就會抬舉你;擁抱佢,佢就會令你得着尊榮。 ⁹佢會將恩惠嘅華冠戴喺你頭上; 佢會將榮耀嘅冠冕賜畀你。」

¹⁰我嘅仔啊,你要聽,要接受我嘅說話, 你嘅壽數就會加多。 ¹¹我已經教你行智慧嘅道路; 我已經帶你行正直嘅路徑。 ¹²你行嘅時候,腳步唔會受阻;你跑嘅時候,亦都唔會跌倒。 ¹³要緊守教導,唔好 放手;要看守佢,因為佢係你嘅生命。

¹⁴唔好踏上惡人嘅道路, 亦都唔好行喺作惡嘅人嘅路上。 ¹⁵要躲避佢,唔好行 喺上面;要轉離佢,行過一便。 ¹⁶因為佢哋唔作惡就瞓唔着; 唔絆倒人就冇得安歇。 ¹⁷佢哋食嘅係邪惡嘅餅, 飲嘅係強暴嘅酒。

¹⁸但係義人嘅道路好似黎明嘅光, 越照越明亮,直到日頭完全升起。 ¹⁹惡人嘅道路好似幽暗,佢哋唔知道自己俾乜嘢絆倒。

²⁰我嘅仔啊,你要留心聽我嘅說話; 要側起耳仔聽我嘅言語。 ²¹唔好由得佢哋離開 你嘅眼前;要將佢哋保存喺你心底深處。 ²²因為對搵到佢哋嘅人嚟講,佢哋就係生命, 亦係全身嘅醫治。

²³最緊要嘅,就係要看守你個心,因為你所做嘅一切都係由佢流出嚟。 ²⁴要除去你口中乖僻嘅說話, 將詭詐嘅嘴唇遠遠掉開。 ²⁵要俾你對眼向前直望;要將你嘅目光定定咁望住前面。 ²⁶要小心思量你腳下嘅道路, 咁你一切嘅路就會穩妥。 ²⁷唔好偏左偏右; 要令你嘅腳遠離邪惡。