Òwe 5

5 ¹Ọmọ mi, fetí sí ọgbọ́n mi; dẹ etí rẹ sílẹ̀ sí òye mi, ²kí o lè pa ọgbọ́n ìṣọ́ra mọ́, kí ètè rẹ sì lè pa ìmọ̀ mọ́. ³Nítorí ètè obìnrin àjèjì ń kán oyin sílẹ̀, ẹnu rẹ̀ sì dán ju òróró lọ, ⁴ṣùgbọ́n ní ìkẹyìn ó korò bí oró, ó mú bí idà olójú méjì. ⁵Ẹsẹ̀ rẹ̀ ń sọ̀kalẹ̀ lọ sí ikú; ìṣísẹ̀ rẹ̀ dì mú isà òkú. ^a a v5 Ṣeọ́lù: ọ̀rọ̀ Hébérù fún ilẹ̀ àwọn òkú — isà òkú, ayé àìrí tí ń bẹ nísàlẹ̀. ⁶Kò ronú nípa ọ̀nà ìyè; ọ̀nà rẹ̀ ń ṣáko lọ, kò sì mọ̀ ọ́n.

⁷Nítorí náà nísinsìnyí, ẹ̀yin ọmọ mi, ẹ gbọ́ sí mi, ẹ má sì ṣe yà kúrò nínú ọ̀rọ̀ ẹnu mi. ⁸Mú kí ọ̀nà rẹ jìnnà sí òun, má sì ṣe sún mọ́ ìlẹ̀kùn ilé rẹ̀, ⁹kí o má ba à fi ọlá rẹ fún àwọn ẹlòmíràn àti ọdún rẹ fún ẹni tí ó ní ìkà, ¹⁰kí àwọn àjèjì má ba à jẹ agbára rẹ tan, àti kí làálàá rẹ má ba à lọ sí ilé àlejò, ¹¹tí ìwọ yóò sì máa kérora ní ìgbẹ̀yìn rẹ, nígbà tí ẹran-ara àti ara rẹ bá ti run, ¹²ìwọ yóò sì wí pé, “Báwo ni mo ṣe kórìíra ìbáwí tó, ọkàn mi sì gan ìtọ́ni! ¹³Èmi kò gbọ́ ohùn àwọn olùkọ́ mi, bẹ́ẹ̀ ni èmi kò fetí sí àwọn amọ̀nà mi. ¹⁴Mo wà ní etí ìparun pátápátá ní àárín ìjọ tí ó péjọ pọ̀.”

¹⁵Mu omi láti inú ìkùdu tìrẹ, omi tí ń ṣàn láti inú kànga tìrẹ. ¹⁶Ǹjẹ́ orísun omi rẹ yóò ha máa sàn jáde sí àwọn ìgboro, àwọn ìṣàn omi rẹ sí àwọn gbàgede ìta? ¹⁷Jẹ́ kí wọ́n jẹ́ tìrẹ nìkan, kí o má sì ṣe pín wọn pẹ̀lú àwọn àjèjì. ¹⁸Kí orísun rẹ kún fún ìbùkún, kí o sì máa yọ̀ nínú aya ìgbà èwe rẹ, ¹⁹abo àgbọ̀nrín onífẹ̀ẹ́, èsúró tí ó dẹwà. Kí ìfẹ́ rẹ̀ máa tẹ́ ọ lọ́rùn nígbà gbogbo; kí a máa fà ọ́ mọ́ra nígbà gbogbo nípa ìfẹ́ rẹ̀. ²⁰Èéṣe, ọmọ mi, tí ìwọ yóò fi jẹ́ kí obìnrin àjèjì fà ọ́ mọ́ra, tí ìwọ yóò sì gbá aya ọkùnrin mìíràn mọ́ra?

²¹Nítorí ọ̀nà ènìyàn wà níwájú ojú Baba wa, ó sì ń ṣàyẹ̀wò gbogbo ipa ọ̀nà ènìyàn náà. ²²Àṣìṣe ara rẹ̀ ni yóò mú ènìyàn búburú, okùn ẹ̀ṣẹ̀ rẹ̀ yóò sì dìímú ṣinṣin. ²³Yóò kú nítorí àìní ìbáwí, yóò sì ṣáko lọ nítorí ọ̀pọ̀lọpọ̀ ìwà òmùgọ̀ rẹ̀.