Ịdọ Aka na Ntị nke Nna

Ịdọ aka na ntị doro anya banyere ịkwa iko, a gbasoro ya ruo ọgwụgwụ ya: nsọpụrụ e nyefere ndị ọbịa, afọ niile emefuru, ahụ gwụrụ ike, na nwoke na-ekwu mgbe o mechara na ọ kpọrọ mmezi asị. Ntụgharị ahụ dị mma. Ṅụrịa ọṅụ na nwunye gị, makwaa na Nna anyị na-ele ụzọ ọbụla anya.

Isi 5.

Nwa m, ṅaa ntị na amamihe m; gee ntị nke ọma na nghọta m, ka ị wee chekwaa akọnuche, ka egbugbere ọnụ gị wee debe ihe ọmụma. Nʼihi na egbugbere ọnụ nwanyị akwụna na-atụ mmanụ aṅụ, ọnụ ya dịkwa nro karịa mmanụ, ma nʼikpeazụ, ọ dị ilu ka nsi, dịkwa nkọ ka mma agha nwere ihu abụọ. Ụkwụ ya na-arịda gaa nʼọnwụ; nzọụkwụ ya na-ejide ili. ^a Ọ naghị etinye uche nʼụzọ ndụ; ụzọ ya na-akpafu akpafu, ọ maghịkwa ya.

Ugbu a, ụmụ m, geenụ ntị nye m, unu atụgharịkwala site nʼokwu ọnụ m. Mee ka ụzọ gị dị anya site nʼebe ọ nọ, abịarukwala ọnụ ụzọ ụlọ ya nso, ka ị ghara inye ndị ọzọ nsọpụrụ gị, ma nye onye nwere obi ọjọọ afọ ndụ gị, ka ndị ọbịa ghara iju afọ site nʼike gị, ka ihe ndị ị dọgburu onwe gị nʼọrụ wee gaa nʼụlọ onye mba ọzọ, ka ị wee sụọ ude nʼọgwụgwụ gị, mgbe anụ arụ gị na ahụ gị na-ala nʼiyi, ị ga-asịkwa, “Lee ka m si kpọọ ịdọ aka ná ntị asị, obi m ledakwara ịba mba anya! Egeghị m ntị nʼolu ndị nkụzi m, maọbụ ṅaa ndị na-akụziri m ihe ntị. Ọ fọdụrụ ntakịrị ka m laa nʼiyi kpamkpam nʼetiti ọgbakọ nzukọrọ ọnụ.”

Ṅụọ mmiri site nʼolulu mmiri nke aka gị, mmiri na-asọ asọ site nʼolulu mmiri gị. Isi iyi gị ọ ga-erufe nʼokporo ụzọ, iyi mmiri gị nʼama ọha? Ka ha bụrụ naanị nke gị, ị gaghị esoro ndị ọbịa kee ha. Ka a gọzie isi iyi gị, ṅụrịakwa ọṅụ nʼebe nwunye i lụrụ nʼokorobịa gị nọ, nne ele nwere ịhụnanya, ele mara mma. Ka ịhụnanya ya na-eju gị afọ mgbe niile; ka a dọọ gị adọ site nʼịhụnanya ya mgbe niile. Gịnị mere, nwa m, ị ga-eji kwe ka nwanyị akwụna dọrọ gị, makụọkwa nwunye nwoke ọzọ?

Nʼihi na ụzọ mmadụ dị nʼihu anya Nna anyị, ọ na-enyocha ụzọ ya niile. Ajọ ihe onye ajọ omume mere na-ejide ya, eriri mmehie ya na-ekegidekwa ya ike. Ọ ga-anwụ nʼihi enweghị ịdọ aka ná ntị, ọ ga-akpafukwa nʼihi oke nzuzu ya.