د پلار خبردارے

د زنا په اړه ښکاره خبرداری چې تر پایه یې تعقیبوي: پردیو ته سپارل شوی عزت، ضایع شوي کلونه، ستړی بدن، او یو سړی چې ډېر ناوخته وایي له اصلاح څخه یې کرکه کوله. بیا مثبت بدلون راځي. له خپلې مېرمنې خوښ اوسه، او پوه شه چې زموږ پلار هره لاره ګوري.

څپرکی 5.

اے زما زويه، زما حکمت ته پام کوه؛ زما پوهې ته ځير غوږ ونيسه، دې دپاره چې تۀ هوښيارى وساتې او ستا شونډې علم خوندى وساتى. ځکه چې د بدکارې ښځې شونډو نه شات څاڅى، او د هغې خولۀ د تيلو نه هواره ده، خو په آخر کښې هغه د زهرو په شان تريخه، او د دوه دمه تُورې په شان تېره ده. د هغې پښې مرګ ته ښکته ځى؛ د هغې قدمونه د قبر لار نيسى. ^a هغه د ژوند لارې ته فکر نۀ کوى؛ د هغې لارې بې لارې ګرځى، او هغه پرې نۀ پوهيږى.

نو اوس، اے زما زامنو، ما ته غوږ ونيسئ، او زما د خولې د خبرو نه مخ مۀ اړوئ. خپله لار ترې ليرې وساته، او د هغې د کور دروازې ته مۀ ورنژدې کېږه، داسې نۀ چې خپل عزت نورو ته ورکړې او خپل کالونه داسې چا ته چې بې رحمه وى، داسې نۀ چې پردى ستا په طاقت ماړۀ شى، او ستا د سخت محنت کمائى د پردى کور ته ولاړه شى، او په آخر کښې به تۀ آهونه وباسې، کله چې ستا غوښه او بدن ختم شى، او تۀ به ووايې، ”ما د تربيت نه څومره کرکه کوله، او زما زړۀ د اصلاح نه نفرت کولو! ما د خپلو اُستاذانو آواز ته غوږ ونۀ نيولو، او خپلو ښوونکو ته مې پام ونۀ کړو. زۀ د پوره بربادۍ د غاړې سره نژدې وم، د راغونډې شوې جماعت په مينځ کښې.“

د خپل حوض نه اوبۀ وڅښه، د خپلې څاه نه بهېدونکې اوبۀ. آيا ستا چينې دې په کوڅو کښې بهر توئ شى، او ستا د اوبو ويالې دې په عامو چوکونو کښې؟ دا دې يواځې ستا وى، او د پردو سره دې شريکې نۀ وى. ستا سرچينه دې برکتناکه وى، او د خپلې ځوانۍ په ښځه دې خوشحاله وې، يوه مينه ناکه هوسۍ، يوه ښائسته هوسۍ. د هغې مينه دې تل تا خوشحاله ساتى؛ تۀ دې همېشه د هغې په مينه کښې مست وې. نو اے زما زويه، تۀ ولې دې په بدکارې ښځه مست شې او د بل سړى ښځه دې په غيږ کښې ونيسې؟

ځکه چې د اِنسان لارې زمونږ د پلار د سترګو مخکښې دى، او هغه د اِنسان ټولې لارې جاچوى. بدکار د خپلو بدو کارونو له کبله نيولے شى، او د خپلې ګناه په رسيو کښې کلک تړلے شى. هغه به د تربيت د نۀ شتون له وجې مړ شى، او د خپلې لويې بې وقوفۍ له کبله به بې لارې شى.