ምሳሌ 5

5 ¹ልጄ ሆይ፣ ለጥበቤ ትኵረት ስጥ፤ ማስተዋሌን በጥሞና አድምጥ፤ ²ልባምነትን እንድትጠብቅ፣ ከንፈሮችህም ዕውቀትን እንዲይዙ ነው። ³የባዕድ ሴት ከንፈሮች ማር ያንጠባጥባሉና፤ አፏም ከዘይት የለሰለሰ ነው፤ ⁴ፍጻሜዋ ግን እንደ መርዝ መራራ፣ ሁለት አፍ እንዳለው ሰይፍ ስለታም ነው። ⁵እግሮቿ ወደ ሞት ይወርዳሉ፤ አረማመዷም ሲኦልን ይይዛሉ። ^a a v5 ሲኦል፦ የሙታን ዓለም የሚለው የዕብራይስጥ ቃል ነው፤ መቃብሩ፣ ከታች ያለው የማይታየው ዓለም። ⁶ለሕይወት መንገድ ምንም አታስብም፤ መንገዶቿ ይቅበዘበዛሉ፣ እርሷም አታውቅም።

⁷አሁንም ልጆቼ ሆይ፣ ስሙኝ፤ ከአፌ ቃላትም ፈቀቅ አትበሉ። ⁸መንገድህን ከእርሷ አራርቅ፤ ወደ ቤቷ ደጃፍም አትቅረብ፤ ⁹ክብርህን ለሌሎች፣ ዓመታትህንም ለጨካኝ እንዳትሰጥ፤ ¹⁰እንግዶች በኀይልህ እንዳይጠግቡ፣ በድካም ያፈራኸውም ወደ ባዕድ ሰው ቤት እንዳይሄድ፤ ¹¹በፍጻሜህም ታቃስታለህ፤ ሥጋህና አካልህ ሲያልቁ፤ ¹²እንዲህም ትላለህ፤ “ተግሣጽን እንዴት ጠላሁ፣ ልቤም ዘለፋን ናቀ! ¹³የመምህሮቼን ድምፅ አልሰማሁም፤ ወደ አስተማሪዎቼም ጆሮዬን አልሰጠሁም። ¹⁴በተሰበሰበው ጉባኤ መካከል በፍጹም ጥፋት አፋፍ ላይ ነበርሁ።”

¹⁵ከገዛ ጕድጓድህ ውሃ ጠጣ፤ ከገዛ የውሃ ጕድጓድህ የሚፈስ ውሃ ጠጣ። ¹⁶ምንጮችህ በጎዳናዎች፣ የውሃ ፈሳሾችህም በአደባባዮች ይፍሰሱን? ¹⁷ለአንተ ብቻ ይሁኑ እንጂ ከእንግዶች ጋራ አይጋሩ። ¹⁸ምንጭህ የተባረከ ይሁን፤ በጕልማስነትህ ሚስትም ደስ ይበልህ፤ ¹⁹አፍቃሪ ዋላ፣ ውብ ሚዳቋ ናት። ፍቅሯ ዘወትር ያርካህ፤ በፍቅሯ ሁልጊዜ ትማረክ። ²⁰ታዲያ ልጄ ሆይ፣ በባዕድ ሴት የምትማረከውና የሌላውን ሰው ሚስት የምታቅፈው ለምንድን ነው?

²¹የሰው መንገዶች በአባታችን ዐይኖች ፊት ናቸውና፤ የሰውንም መንገዶች ሁሉ ይመረምራል። ²²ክፉዎች በገዛ ክፋታቸው ይያዛሉ፤ በኀጢአታቸውም ገመድ ይጠመዳሉ። ²³ተግሣጽ ስለሌለው ይሞታል፤ ከትልቅ ሞኝነቱም የተነሣ ይስታል።