ምሳሌ 6

6 ¹ልጄ ሆይ፣ ለባልንጀራህ ዋስ ከሆንህ፣ ለእንግዳ ሰውም በእጅ መጨባበጥ ቃል ከገባህ፣ ²በአፍህ ቃል ተጠምደሃል፤ በአፍህ ቃልም ተይዘሃል። ³እንግዲህ ልጄ ሆይ፣ አሁን በባልንጀራህ እጅ ስለ ወደቅህ፣ ራስህን ለማስለቀቅ ይህን አድርግ፤ ሄደህ ራስህን አዋርደህ ባልንጀራህን ለምን። ⁴ለዐይኖችህ እንቅልፍ አትስጥ፤ ለሽፋሽፍትህም መሽለብን አትስጥ። ⁵እንደ ሚዳቋ ከአዳኝ እጅ፣ እንደ ወፍም ከወጥመድ አጥማጅ እጅ ራስህን አስለቅቅ።

⁶አንተ ሰነፍ፣ ወደ ጕንዳን ሂድ፤ መንገዶቿን ተመልከት፤ ጠቢብም ሁን። ⁷አለቃ፣ ሹም ወይም ገዥ ሳይኖራት፣ ⁸በበጋ እንጀራዋን ታዘጋጃለች፤ በመከርም ምግቧን ትሰበስባለች።

⁹አንተ ሰነፍ፣ እስከ መቼ ተኝተህ ትቀራለህ? ከእንቅልፍህስ መቼ ትነሣለህ? ¹⁰ጥቂት እንቅልፍ፣ ጥቂት መሽለብ፣ ለማረፍም እጆችን ጥቂት አጣጥፎ መቀመጥ፣ ¹¹ድኽነትም እንደ ወንበዴ ይመጣብሃል፤ ችጋርም እንደ ታጠቀ ሰው ይመጣብሃል።

¹²የማይረባ ሰው፣ ክፉ ሰው፣ በጠማማ ንግግር ይመላለሳል፤ ¹³በዐይኖቹ ይጠቅሳል፤ በእግሮቹ ይጠቁማል፤ በጣቶቹም ያመለክታል፤ ¹⁴በጠማማ ልቡ ክፋትን ያስባል፤ ዘወትርም ጠብን ይዘራል፤ ¹⁵ስለዚህ መቅሠፍት በድንገት ይመጣበታል፤ በቅጽበትም ያለ መድኃኒት ይሰበራል።

¹⁶አባታችን የሚጠላቸው ስድስት ነገሮች አሉ፤ ሰባቱም ለእርሱ አስጸያፊዎች ናቸው፦ ¹⁷ትዕቢተኛ ዐይኖች፣ ሐሰተኛ ምላስ፣ ንጹሕ ደምን የሚያፈስሱ እጆች፣ ¹⁸ክፉ አሳብን የሚያውጠነጥን ልብ፣ ወደ ክፋት ለመሮጥ የሚቸኩሉ እግሮች፣ ¹⁹ሐሰትን የሚተነፍስ የሐሰት ምስክር፣ በወንድማማቾችም መካከል ጠብን የሚዘራ ሰው ናቸው።

የአባትህ ቃላት፣ ጋሻህ

²⁰ልጄ ሆይ፣ የአባትህን ትእዛዝ ጠብቅ፤ የእናትህንም ትምህርት አትተው። ²¹ሁልጊዜ በልብህ ላይ እሰራቸው፤ በዐንገትህም ዙሪያ አስራቸው። ²²በምትሄድበት ጊዜ ይመሩሃል፤ በምትተኛበትም ጊዜ ይጠብቁሃል፤ ከእንቅልፍህም በምትነቃበት ጊዜ ያነጋግሩሃል። ²³ትእዛዝ መብራት፣ ትምህርትም ብርሃን ነውና፤ የተግሣጽም ዘለፋ የሕይወት መንገድ ነው፤ ²⁴ከክፉይቱ ሴት ይጠብቅህ ዘንድ፤ ከአመንዝራዪቱም ሴት ለስላሳ ምላስ ይጠብቅህ ዘንድ ነው።

²⁵ውበቷን በልብህ አትመኝ፤ በሽፋሽፍቷም አትማረክ፤ ²⁶የጋለሞታ ዋጋ አንድ እንጀራ ብቻ ነውና፤ ያገባች ሴት ግን ክቡርን ሕይወት ታጠምዳለች። ²⁷ሰው እሳትን በደረቱ አጠገብ ተሸክሞ፣ ልብሱ ሳይቃጠል ይቀራልን? ²⁸ወይስ ሰው በጋለ ፍም ላይ ሄዶ፣ እግሮቹ ሳይቃጠሉ ይቀራሉን? ²⁹ከባልንጀራው ሚስት ጋር የሚተኛም እንዲሁ ነው፤ የሚነካትም ሁሉ ከቅጣት አያመልጥም።

³⁰ሌባ በራበው ጊዜ ነፍሱን ለማጥገብ ቢሰርቅ፣ ሰዎች አይንቁትም፤ ³¹ተይዞ ቢገኝ ግን ሰባት እጥፍ ይከፍላል፤ የቤቱንም ንብረት ሁሉ ይሰጣል። ³²የሚያመነዝር ሰው አእምሮ የለውም፤ ይህን የሚያደርግም ራሱን ያጠፋል። ³³ቍስልና ውርደት ያገኘዋል፤ ነውሩም አይደመሰስም።

³⁴ቅናት ሰውን ያስቈጣዋልና፤ በበቀል ቀንም ምሕረትን አያደርግም። ³⁵ምንም ዓይነት ካሳ አይቀበልም፤ ጕቦው ቢበዛም እምቢ ይላል።