箴言 6

6 ¹我嘅仔啊,如果你為鄰舍作咗擔保, 如果你為陌生人拍手承諾, ²你就俾自己口裏嘅說話纏住,俾自己口裏嘅說話捉住喇。 ³我嘅仔啊,咁你就要噉樣做嚟救返自己, 因為你而家落咗喺鄰舍手裏:去啦,謙卑自己, 懇切咁哀求你嘅鄰舍。 ⁴唔好俾你對眼瞓覺, 唔好俾你眼皮打盹。 ⁵你要好似羚羊逃出獵人嘅手,好似雀仔逃出捕鳥人嘅手噉,救返自己。

⁶你呢個懶人啊,去睇吓螞蟻,睇吓佢嘅所作所為,學番啲智慧啦。 ⁷佢冇首領,冇官長,冇統治者, ⁸但係佢喺夏天預備好糧食, 喺收割嘅時候積聚食物。

⁹懶人啊,你重要瞓幾耐呀?你幾時先至瞓醒起身呀? ¹⁰再瞓陣,再打吓盹, 再抝埋雙手唞吓, ¹¹咁貧窮就好似盜賊噉臨到你, 窮乏就好似帶住武器嘅人噉埋嚟。

¹²無賴之徒,邪惡嘅人, 滿口都係歪曲嘅說話周圍行, ¹³用眼色示意,用腳踢暗號, 用手指指點點, ¹⁴心裏乖僻,圖謀作惡, 不斷噉挑撥離間; ¹⁵所以災禍會突然臨到佢身上; 一剎那之間佢就會敗壞,冇得醫治。

¹⁶有六樣嘢係我哋嘅父所憎恨嘅,有七樣係佢所憎惡嘅: ¹⁷就係高傲嘅眼,講大話嘅脷, 同埋流無辜人血嘅手, ¹⁸圖謀惡計嘅心,飛咁快走去作惡嘅腳, ¹⁹講大話嘅假見證, 同埋喺弟兄中間挑撥離間嘅人。

你父親嘅說話,係你嘅盾牌

²⁰我嘅仔啊,要遵守你父親嘅誡命, 唔好離棄你母親嘅教導。 ²¹要時常將佢哋繫喺你嘅心上; 綁喺你嘅頸度。 ²²你行嘅時候,佢哋會引導你;你瞓低嘅時候,佢哋會看顧 你;你瞓醒嘅時候,佢哋會同你傾偈。 ²³因為誡命係燈,教導係光, 管教嘅責備係生命嘅道路, ²⁴使你可以避開邪惡嘅婦人, 避開淫婦滑溜溜嘅脷。

²⁵唔好喺你心裏貪戀佢嘅美貌, 亦都唔好俾佢用眼睫毛勾住你; ²⁶因為妓女嘅價錢,不過係一個餅; 但係有夫之婦卻獵取寶貴嘅生命。 ²⁷人揦住火 喺懷裏,佢件衫又點會唔燒着呢? ²⁸又或者人踩喺燒紅嘅炭上, 佢對腳又點會唔灼傷呢? ²⁹同鄰舍嘅老婆行房嘅人都係噉; 凡掂佢嘅,都逃唔到刑罰。

³⁰賊人肚餓,偷嘢嚟填飽肚, 人都唔會睇佢唔起, ³¹但係佢一旦俾人捉到,就要賠七倍; 要俾出佢屋企所有嘅財物。 ³²同人通姦嘅,係毫無理智;噉樣做嘅人,係毀滅緊自己。 ³³佢會受傷、受辱,佢嘅羞恥永遠都洗唔甩。

³⁴因為妒忌會令到人暴怒,佢喺報仇嗰日絕唔會留情。 ³⁵佢唔會收任何賠償;任你賄賂幾大,佢都唔會接受。