Chānsam 6

6 ¹Iwui naomayara, nana nawui khongnainaowui vang shākhi nganingmi saakha, makathei miwui vang khangashit saakha, ²nawui khamorwui tui eina khalenli manhaira, nawui khamorwui tui eina tukkhuihaira. ³Chithākha, iwui naomayara, hi sālaga nakhalatta huikhuilu, kaja ara na nawui khongnainaowui pāngli leihaira: zatlaga malungnimlu, kala nawui khongnainaoli polu. ⁴Namik mapikhui ngasaklu, namikphung mangasāmkhui ngasaklu. ⁵Chaonao pāng eina huikhui thāda, kala vānao vānaotukkhuikhamewui pāng eina huikhui thāda, nakhalatta huikhuilu.

⁶O chāngshe, zālingli zatlu; awui shongfa machukkhuilu, kala thangmeilu. ⁷Awuili wungva̱, otva̱, lah khamunga akhala maleilala, ⁸ana lumkachāng awui kashakazā ngarānsanga kala māhāli awui kashakazā kazipsanga.

⁹O chāngshe, karankha na pisāchingfarakhala? Nawui pikakhui eina karan na ngakarthuira? ¹⁰Pikakhui kasha̱kha, ngasāmkakhui hunnakha, pāngmasa̱da kasha̱kha khangasām eina, ¹¹kala chām kaho chi phama̱ kashao thāda nali rāra, kala zeighai kasing mi thāda khavāt nali rāra.

¹²Makānkhanā mi, makhayā mina, kha̱khamakhei tui matuida zata, ¹³amik kakashida, aphei eina paokhami sai, apāngmareng eina chitheimida, ¹⁴zakkashi ning eina makaphā awormāng sai, thangkachida khonzār ngasakchinga; ¹⁵chiwui vang eina kashuirak eina unshimui awuitungli rāra; hunkhawui alungli a ngapokhaida masākhuiluipaimara.

¹⁶Ithumwui Avāna ningkachai ot tharuk lei, awui vang ningkakachaia ot shini: ¹⁷khanganing mikyan, kakapika male, kala khayon makhalei ashee tākahai pāng, ¹⁸makaphā awormāng kasā ning, makaphāli yonga khavai thāklak kasā phei, ¹⁹kakapik matuishok kasā minama shākhi, kala achinābing ngachaili nganang khayao mi.

Navāwui Tui, Nawui Chāngvei

²⁰Inaomayara, navāwui ningkhami hi mayonlu, kala nava̱wui tamkachithei hi mahorhaialu. ²¹Atam kachida chibing naningli khalapshānhailu; nakahungli neihailu. ²²Nana zatlala, athumna nali thānmira; nana kapi atamlila, athumna nali mayonpaira; kala nana kathui atamlila, athumna nali ngazeknaomira. ²³Kaja ningkhami chi thaomeina, kala tamkachithei chi kahorna, kala kharākwui hāngmachinbing chi kharing shongfana, ²⁴Makaphā sha̱naowui eina, makhangatunva̱wui male khamathā chiwui eina nali phārimi khavaina.

²⁵Awui khamathā chi naningli maningchāngalu, kala ana awui mikwui eina nali maphāshokranu; ²⁶kaja khayorva̱wui aman chi khamuihāng akhamāngna, kha ngakumhaira sha̱naona aman kasaka mirin chi kharoma. ²⁷Mi akhana awui angunli mei phungda, awui kachon machuimarala? ²⁸Lah mi akhana meithā kasā tungli zatlaga awui phei makaprormarala? ²⁹Awui khongnai preiva̱li ngasopi kasā mila chikathāna; ali sākaza̱ mi kachiva̱ china kashong malāngla machihomara.

³⁰A thaihao tharan awui zākhangai ungshung khavai leekhuiakha, mibingna khale mili maningkachaimana, ³¹kha a tukkakhuiakha, ana shini shida runra; ana awui shim ngaponkakhui ot saikora yaora. ³²Phophā kasā mi chi ning makhaleina; hi sākasā mina akhalatta sāshimānra. ³³Ana khamā kala khayak samphangra, kala awui maikashi masāshimitmara.

³⁴Kaja yuikashina mipāli malungvātlak ngasaka, kala athut kakhui thangli ana lumashan khavai maleimara. ³⁵Ana kachung akhala makhuisangmara; pheizā kayākha kahaolala ana mamayāmara.