Bingana 6 FHB Father's Heart Bible™

6 ¹Mwana wama, yuka ni wádihana kikuma kya mfinangani waku, yuka ni wásimba moku mu kudihana kikuma kya munzenza, ²Ngeyi wábwa mu mutambu mu ndinga za munwa waku, wákwatama mu ndinga za munwa waku. ³Buna hanga dyadi, mwana wama, amana ditumuna ngeyi-meni, mukuma bwabu wenina mu koku kwa mfinangani waku: wenda, dikulumuna, amana lomba kwena mfinangani waku. ⁴Hanaku tulu kwena mesu maku, keti makhoba ma mesu maku manimbaku. ⁵Dikatula hanga nsiesi mu koku, hanga nuni mu koku kwa mutedi wa mutambu.

⁶Wenda kwena nsinsi, ngeyi muvungu; tala nzila zandi amana dimuka. ⁷Konda kala yi mbuta, phumbulu holo pfumu, ⁸yisi yidika dipha dyandi mu tsungi ya mwini amana yisi kutikisa bya kudya byandi mu tangwa dya kuledika.

⁹Tee khi tangwa wakála wunimbi, muvungu? Khi tangwa wakalúbuka mu tulu yaku? ¹⁰Tulu yafyana, nimba yafyana, kufutika moku fyafyana mu kupema, ¹¹amana kiphutu kyakwísa kwena ngeyi hanga ndwandwa, amana mupfunu hanga mutu wenina yi binwaninu.

¹²Mutu wakonda mupfunu, mutu wa mbi, kisi diata ni ndinga za khonda, ¹³kisi vukumuna mesu mandi, kisi songila ni malu mandi, kisi songila ni milembu myandi, ¹⁴mu mbundu ya kizangana kisi banza mambu mambi, mu bilumbu byosu kisi kuna mvwalangani; ¹⁵buna phasi yakwísa kwena yandi mu mbala yimosi; mu tangwa dimosi kabukuka, konda kuma kwa kubeluka.

¹⁶Henina bima bisambanu bina Tata wetu kamenga, nsambwadi bina byena nzanzi kwena yandi: ¹⁷mesu ma lulendu, lulaka lwa luvunu, amana moku mana misi tyakula menga ma mutu wakonda sala mbi, ¹⁸mbundu yina yisi banza mabanza mambi, malu mana misi lenga tswatsu ku mambi, ¹⁹mbangi wa bukamvi wuna wisi fula luvunu, amana wuna wisi kuna mvwalangani hana kati dya baphangi.

Ndinga za tata waku, kibalaka kyaku

²⁰Mwana wama, lunda mutsiku wa tata waku, amana kuyambulaku milongi mya ngudi waku. ²¹Kasa myawu ha mbundu yaku mu bilumbu byosu; zitika myawu mu tsingu yaku. ²²Tangwa wadiata, myakunáta ngeyi; tangwa walala, myakukéngila ngeyi; amana tangwa watemuna, myakuzónza ni ngeyi. ²³Mukuma mutsiku wenina mwinda, amana milongi myenina mwini, amana malongi ma tsungika mena nzila ya luzingu, ²⁴mu kukukeba kwena mukhetu wa mbi, kwena lulaka lwa lengu lwa mukhetu mbongi.

²⁵Zolaku phisi yandi mu mbundu yaku, amana kuyambulaku kakukwata ni tsuki za mesu mandi; ²⁶mukuma thalu ya ndumba-leta yenina kaka dipha dimosi, kaasi mukhetu wa kukwela kisi londa luzingu lwa thalu. ²⁷Pfwani mutu kalenda nata mbawu ha thulu yandi amana miledi myandi myayokamaku? ²⁸Holo mutu kalenda diata ha makala ma mbawu amana malu mandi mayokamaku? ²⁹Bwabuna phi kwena wuna wisi dinimbisa yi mukhetu wa mfinangani wandi; Ka mutu ku wuna wusimbi yandi kakála konda betwa.

³⁰Batu bisiku lenza mwifi yuka ni wayibi mu kuyukutisa nzala yandi tangwa kena yi nzala, ³¹kaasi yuka ni bamukwata, kafúta mbala nsambwadi; kahéka bima byosu bya nzu yandi. ³²Wuna wuti mbongi wukondi mayela; wuna wisi hanga bwabuna, kadizanga yandi-meni. ³³Katámbula phuta yi mafu, amana tsoni yandi yikúmukaku.

³⁴Mukuma kiphala kisi tula yakala mu khabu, amana kayúkilaku kyadi muna kilumbu kya mbela. ³⁵Katámbulaku lufutu; kalendaku tambula keti makabu makála mabuta kwa phila yikwawu.