Azüngashi aser Tenangzükbatem

Tesayu asükati, kati den kati jurutetba makaba. Ne kiyonger asoshi azüngashiba agira, idangyongji aenang. Nai jaja mangra, takhi reprangang. Tenük agi yimtep, tetsüng agi temai inyaker tamajung nisung dang kümdangang. Asen Tebui sempar oset tenet. Anungji tanaben anempongba o, ne shiruru manung külem bendenba ama.

Chapter 6.

Kü chir, na ne kiyonger asoshi azüngashiba agira, aener asoshi ne teka den azüngashira, ne bang o agi na metsüdakogo, ne bang o agi na menepogo. Anungji, kü chir, iba inyakang, aser ne sasa kümzükang, kechiyong na idaki ne kiyonger ket nung lir: oang, ne sasa ajemaludakang, aser ne kiyonger dang mepishijang. Ne tenük nem amu meyutsü, ne tenük teküp nem mejang meyutsü. Teka nungi shitsü ama, sang soba ket nungi ozü ama, ne sasa kümzükang.

Takhi dang oang, na temesülur; la lenmangtem shisadangang aser temeteter aliang. La tongtiba, ketdangpur, mesüra yimsüsür kecha makai, la asükwa nung pei amtsük renem, aser aluruwa nung pei chiyungtsü puaka.

Na temesülur, na kodang tashi mejanga alitsü? Na ne amu nungi kodang arishitsü? Ishika amu, ishika mejang, anisüngtsü asoshi teka ishika tsüngokba, aser rakzükraktem ama akok ne dang arutsü, aser rara bener nisung ama chiyungtsü makaba na dang arutsü.

Tagidak makaba nisung, tamajung nisung, tekirak o jembia jajaa ao, pei tenük yimtep, pei tetsüng den temai inyak, pei temeyong den tusü, tekirak mulung den pai tamajung mita asar, maneni tanaben proka; aji asünung timatemtsü pa dang ajongbena arutsü; kenpiga pa raksatsü aser tanebtsü makoktsü.

Tebui sempar oset trok lir, pa asoshi tesempatsü tenet lir: asükümer tenük, tiyazü meli, aser tai makaba zü tokshiba teka, tamajung mapa mita asar aliba mulung, tamajung nung asemtsü ilunga aliba tetsüng, tiyazü kuli ta tiyazü o jembiba, aser ozüng onok rongnung tanaben prokdakba.

Nebu O, Ne Jong

Kü chir, nebu temelaba ozüng benshiang, aser netsü tesayuba senzüka teyu. Itemji teti ne mulung nung alenlokang; itemji ne tekong nung alenlokang. Na jajadang, parnoki na anitsü; na mejangdang, parnoki na anüktsü; aser na shishidang, parnoki na den jembitsü. Kechiyong temelaba ozüngji milen lir aser tesayuba tesangwa lir, aser metongshitsü repranga taküm lenmang lir, aji na tamajung tetsür nungi, nüktapangtala meli tesüsü nungi anüktsü.

La tobur ajungba teaginü, ne mulung nung, aser la tenük teküp den na meneptsü teli; kechiyong nüktapangtatsür melen amtsük telong ka dak alema lir, saka kinungpu aliba tetsüri taküm senti aria meneptsü. Nisung kati mi apua, pei temang anasa yua, pa temesüng meyoktsü ma? Mesüra nisungi mijang tsükba madang jajaa pa tetsüng merongsettsü ma? Pei kiyonger kinungtsü den nüktapangta benshiba nisungji yama lir; la kongshiba shibaisa memerenshi-i malitsü.

Nisungi auür ka dang mesempa, pa yasetadang pei chiyungtsü tiptemdaktsü asoshi auyar; saka pai putetra, pai tenetben tanaben agütsütsü; pai pei kidang rongsen ajak agütsütsü. Shibai nüktapangtar pai shisa maka; shibai aji inyaker pai pa sasa raksatsür. Pai zübu aser maksü angutsü, aser pa maksü endoktsü makok.

Kechiaser nükmia agi nisung kanga ain adokdaktsür; aser mangyangba ano nung pai taochi masayutsütsü. Pai alang kecha magitsü; süpokrem koda tuluba süra pai mamulungtsütsü.