Ilu Solomọn

Nchịkọta okwu amamihe maka ndụ kwa ụbọchị—gbasara okwu ọnụ, ọrụ, ego, ọbụbụenyi, na egwu Onyenwe anyị nke bụ mmalite amamihe niile. Ntụziaka bara uru nke nna na-enye nwa ya nwoke.

Isi 1.

Ilu Solomọn, nwa Devid, eze Izrel:

Iji mara amamihe na ndụmọdụ, iji ghọta okwu nghọta, iji nata ndụmọdụ nʼomume amamihe, nʼezi omume, nʼikpe ziri ezi, na nʼikpe nha anya, iji nye ndị na-enweghị uche akọ, nye ndị na-eto eto ihe ọmụma na ezi uche, ka ndị maara ihe nụọkwa ya ma mụbaa nʼmmụta, ka onye nwere nghọta nwetakwa nduzi, iji ghọta ilu na ntụ ilu, okwu ndị maara ihe na ilu nzuzo ha.

Egwu Nna anyị bụ mmalite ihe ọmụma; ndị nzuzu na-eleda amamihe na ndụmọdụ anya.

Olu Nna nʼebe Nwa ya nọ

Nwa m, gee ntị na ndụmọdụ nna gị, ahapụkwala ozizi nne gị, nʼihi na ha ga-abụ okpu mara mma nʼisi gị na ihe ịchọ mma nʼolu gị.

Nwa m, ọ bụrụ na ndị mmehie na-arafu gị, ekwela ekwe. Ọ bụrụ na ha asị, “Soro anyị bịa, ka anyị zoo onwe anyị chere ịwụfu ọbara, ka anyị site na nzuzo buso ndị aka ha dị ọcha agha nʼefu; ka anyị loo ha na ndụ dịka ili, ha dum, dịka ndị na-arịda nʼolulu; anyị ga-achọta ụdị akụ dị oké ọnụ ahịa niile, anyị ga-eji ihe anyị kwatara mejupụta ụlọ anyị; tụnye oke gị nʼetiti anyị; anyị niile ga-enwe otu akpa ego,” nwa m, esorola ha jee ije nʼụzọ ahụ; debe ụkwụ gị pụọ nʼokporo ụzọ ha, nʼihi na ụkwụ ha na-agba ọsọ ịga ime ihe ọjọọ, ha na-emekwa ngwa ngwa ịwụfu ọbara. Nʼihi na ụgbụ nke a gbasara nʼihu anya nnụnụ ọbụla anaghị ejide ihe ọbụla; ma ndị a na-echere ọbara nke aka ha na nzuzo; ha na-achọ ịla ndụ nke aka ha nʼiyi. Otú a ka ụzọ onye ọbụla nke anya ukwu na-agụ maka uru na-ezighị ezi si dị; ọ na-anapụ ndị nwe ya ndụ ha.

Amamihe nʼokporo ụzọ

Amamihe na-eti mkpu nʼokporo ụzọ; ọ na-eweli olu ya elu nʼama. Nʼisi okporo ụzọ ndị mkpọtụ jupụtara ka ọ na-eti mkpu; nʼọnụ ụzọ ama obodo ka ọ na-ekwu okwu ya, sị:

“Ruo ole mgbe, unu ndị na-enweghị uche, ka unu ga na-ahụ inweghị uche nʼanya? Ruo ole mgbe ka ndị na-akwa emo ga-eji ịkwa emo ha na-aṅụrị ọṅụ, ndị nzuzu akpọọ ihe ọmụma asị? Ọ bụrụ na unu aṅaa ntị na ịba mba m, Mụ onwe m, bụ Amamihe, ga-awụpụ mmụọ m nʼahụ unu; m ga-emekwa ka unu mara okwu m. ^a Nʼihi na akpọọla m oku ma unu jụ, m setịpụrụ aka m ma ọ dịghị onye ọbụla ṅara ntị, unu leghaara ndụmọdụ m niile anya ma jụ ịba mba m niile, mụ onwe m ga-achịkwa ọchị nʼihe ndakwasị unu; m ga-akwa emo mgbe oke egwu ga-abịakwasị unu, mgbe oke egwu ga-abịakwasị unu dịka oké ifufe mgbe ihe ndakwasị unu ga-abịa dịka ajọ ifufe na-atụgharị, mgbe nsogbu na mwute ga-abịakwasị unu.

Mgbe ahụ, ha ga-akpọku m, ma m agaghị aza; ha ga-eji ịnụ ọkụ nʼobi chọọ m ma ha agaghị achọta m, nʼihi na ha kpọrọ ihe ọmụma asị ma họrọghị egwu Nna anyị, ha jụrụ ndụmọdụ m ma leda ịba mba m niile anya. Ya mere, ha ga-eri mkpụrụ nke ụzọ nke aka ha ha ga-erijukwa afọ na atụmatụ nke aka ha. Nʼihi na ndapụ nʼụzọ nke ndị na-enweghị uche ga-egbu ha, obi iru ala nke ndị nzuzu ga-ebibikwa ha; ma onye ọbụla na-ege m ntị ga-ebi nʼudo ma nọrọ nʼntụ nchara, na-atụghị egwu ihe mbibi ọbụla.”