Karin Maganar Sulemanu

Tarin maganganun hikima don rayuwar yau da kullum—game da magana, aiki, kuɗi, abota, da tsoron Ubangiji wanda shi ne farkon dukan hikima. Koyarwa mai amfani daga uba zuwa ga ɗansa.

Babi na 1.

Karin maganar Sulemanu, ɗan Dawuda, sarkin Isra'ila:

Domin sanin hikima da horo, domin fahimtar kalmomi masu basira, domin karɓar horo a kan halin hikima, cikin adalci, da shari'a, da daidaito, domin ba da wayo ga marasa azanci, da sani da tsinkaya ga matasa, bari mai hikima kuma yă saurara yă ƙara koyo, mai fahimta kuma yă sami jagoranci, domin fahimtar karin magana da misali, maganganun masu hikima da kacici-kacicinsu.

Tsoron Ubanmu shi ne mafarin sani; wawaye suna rena hikima da horo.

Muryar Mahaifi ga Ɗansa

Ka saurara, ɗana, ga horon mahaifinka, kada kuma ka juya baya ga koyarwar mahaifiyarka, gama su rawani ne mai kyau ga kanka, da abin wuya ga wuyanka.

Ɗana, idan masu zunubi suka rarrashe ka, kada ka yarda. Idan suka ce, “Zo tare da mu, bari mu yi kwanto domin jini, bari mu fake wa marar laifi babu dalili; kamar kabari bari mu haɗiye su da rai, gaba ɗaya, kamar masu gangarawa zuwa rami; za mu sami kowane irin kaya mai daraja, za mu cika gidajenmu da ganima; ka sa rabonka tare da mu; dukanmu za mu raba jaka ɗaya,” ɗana, kada ka yi tafiya a hanya tare da su; ka janye ƙafarka daga hanyoyinsu, gama ƙafafunsu na gudu zuwa mugunta, suna kuma garaje don zub da jini. Gama raga da aka shimfiɗa a gaban idon kowane tsuntsu ba ta kama kome; amma waɗannan suna kwanton jininsu ne; suna fake wa rayukansu. Haka hanyoyin kowane mai ƙwaɗayi suke, mai neman ribar zalunci ne; yakan kwashe ran masu shi.

Hikima a Tituna

Hikima tana kira da ƙarfi a titi; a filayen jama'a tana ɗaga muryarta. A kan titunan hayaniya tana kira; a mashigin ƙofofin birni tana cewa,

“Har yaushe, ku marasa azanci, za ku yi ta son rashin azancinku? Har yaushe masu ba'a za su ji daɗin ba'arsu, wawaye kuma su ƙi sani? Idan kuka karɓi gyarana, ni, Hikima, zan zuba ruhuna a kanku; zan sanar da ku maganata. ^a Tun da na yi kira kuka ƙi, na miƙa hannuna babu kuma wanda ya kula, kuka kuma ƙyale dukan shawarata, kuka ƙi dukan gyarana, ni ma zan yi dariyar masifarku; zan yi muku ba'a sa'ad da razana ta auko muku, sa'ad da razana ta auko muku kamar hadari, masifarku kuwa ta zo kamar guguwa, sa'ad da wahala da ƙunci suka auko muku.

Sa'an nan za su kira ni, amma ba zan amsa ba; za su neme ni da himma amma ba za su same ni ba, domin sun ƙi sani, ba su kuwa zaɓi tsoron Ubanmu ba, sun ƙi shawarata, sun kuma rena dukan gyarana. Saboda haka za su ci 'ya'yan hanyarsu, su kuma ƙoshi da dabarunsu. Gama karkatar marasa azanci za ta kashe su, sakewar wawaye kuwa za ta hallaka su; amma duk wanda ya saurare ni zai zauna lafiya, cikin kwanciyar hankali, babu tsoron masifa.”