Hulubaton 1 FHB Father's Heart Bible™

1 ¹Ang mga hulobaton ni Solomon nga anak ni David, nga hari sang Israel:

²Agud mahibaloan ang kaalam kag ang panudlo, agud masayuran ang mga pulong sang pag-intiende, ³agud mabaton ang panudlo sa maalamon nga paggawi, sa pagkamatarung, sa katarungan, kag sa pagkaangay, ⁴agud mahatagan sing kaalam ang mga walay alam, kag sing ihibalo kag paghangup ang mga pamatan-on, ⁵magpamati man ang maalamon kag magdugang sang iya natun-an, kag magbaton sing panghiwat ang nagahangup, ⁶agud mahangpan ang hulobaton kag ang paraanggid, ang mga pulong sang mga maalamon kag ang ila mga paktakon.

⁷Ang pagkahadluk sa aton Amay amo ang ginsuguran sang ihibalo; ginatamay sang mga buangbuang ang kaalam kag ang panudlo.

Ang Tingug sang Amay sa Iya Anak

⁸Pamatii, anak ko, ang panudlo sang imo amay, kag indi pagbayai ang panudlo sang imo iloy, ⁹kay ini isa ka matahum nga purongpurong sa imo ulo kag mga kulintas sa imo liog.

¹⁰Anak ko, kon sulayon ka sang mga makasasala, indi ka magpasugot. ¹¹Kon magsiling sila, “Upod ka sa amon, mag-amat kita sing dugo, mag-abang kita sa walay sala nga tawo sa walay kabangdanan; ¹²subong sang lulubngan tulunon ta sila nga buhi, kag bug-os, subong sang mga nagakanaug sa buho; ¹³makita ta ang tanan nga sari sang malahalon nga pagkabutang, pun-on ta ang aton mga balay sang mga inagaw; ¹⁴iupod mo ang imo palad sa amon; isa lamang ka puyo ang aton tanan,” ¹⁵anak ko, indi ka maglakat sa dalan upod sa ila; punggi ang imo tiil sa ila mga banas, ¹⁶kay ang ila mga tiil nagadalagan sa kalautan, kag nagadali sila sa pagpaagay sang dugo. ¹⁷Kay ang pukot nga ginbukad sa atubang sang mata sang pispis walay madakpan; ¹⁸apang ini sila nagaamat sa ila kaugalingon nga dugo; ginaabangan nila ang ila kaugalingon nga kabuhi. ¹⁹Amo ini ang mga dalanon sang tagsa nga hakug sang indi matarung nga ganansya; ginakuha sini ang kabuhi sang mga tagiya sini.

Ang Kaalam sa mga Dalan

²⁰Ang Kaalam nagasinggit sa dalan; sa mga lapad nga plasa ginapabatyag niya ang iya tingug. ²¹Sa ulo sang magahud nga mga dalan nagapanawag sia; sa alagyan sang mga gawang sang siyudad nagahambal sia:

²²“Hasta san-o, mga walay alam, nga higugmaon ninyo ang pagkawalay alam? Hasta san-o nga magkalipay ang mga manugyaguta sa ila pagyaguta kag dumtan sang mga buangbuang ang ihibalo? ²³Kon magsabat kamo sa akon pagsaway, ako, ang Kaalam, magaula sang akon espiritu sa inyo; ipahibalo ko sa inyo ang akon mga pulong. ^a a v23 Ang Kaalam nga nagahambal diri ginkilala ni Pablo nga amo si Cristo — ang kaalam sang aton Amay (1 Corinto 1:24, 1:30; Colosas 1:15-17). Ang Anak nga kaupod sang Amay antes pa sang pagtuga nagapanawag sa tanan nga magbalik kag magpamati. ²⁴Tungud nga nagtawag ako kag nagpamalibad kamo, gin-untay ko ang akon kamot kag wala sing may nagsapak, ²⁵kag ginpabay-an ninyo ang tanan ko nga laygay kag ginsikway ang tanan ko nga pagsaway, ²⁶ako man magakadlaw sa inyo kalisdanan; magayaguta ako kon mag-abut sa inyo ang kahadluk, ²⁷kon mag-abut sa inyo ang kahadluk subong sang bagyo kag mag-abut ang inyo kalisdanan subong sang buhawi, kon mag-abut sa inyo ang kapiot kag ang kasakit.

²⁸Niyan magatawag sila sa akon, apang indi ako magsabat; pangitaon nila ako sing hugud apang indi nila ako makita, ²⁹tungud nga gindumtan nila ang ihibalo kag wala nila pagpilia ang pagkahadluk sa aton Amay, ³⁰ginsikway nila ang akon laygay kag gintamay ang tanan ko nga pagsaway. ³¹Gani kaunon nila ang bunga sang ila kaugalingon nga dalanon kag mabusog sa ila kaugalingon nga mga padihot. ³²Kay ang pagkamalinapson sang mga walay alam amo ang magapatay sa ila, kag ang pagkadanghag sang mga buangbuang amo ang magalaglag sa ila; ³³apang ang bisan sin-o nga magpamati sa akon magapuyo nga malig-on kag mahamungaya, nga wala sing kahadluk sa kalalat-an.”