Jüveko 1 FHB Father's Heart Bible™

1 ¹Israel küde David nuo Solomon jüve hiko zo:

²Mhase mu metha seyi ketola, keseko jüpo mhalu keyi ketola, ³mhase zho lü, mezizo lü, jütho lü, mu kepokeyi lü metha ngoyi ketola, ⁴mhaco kemoko ce mhase tsüti ketola, natsimiko ce keseko mu küsü tsüti, ⁵mhakeseko sheri reni de kümütha dzü mama tasüte, mu mhalu keto mie chotha ngoyite, ⁶jüve mu jüve kropü mhalu keti, mhakeseko jüpo mu uko ketekhri mhalu keti.

⁷Ha Po reshü keti hi keseko kesu zo; vele kenyomi mhase mu metha thathi.

Apoe Nuo Ce Mhü

⁸A nu, n poo metha reni süte, mu n zu kemethao tsüzi tahite, ⁹kekrelamori süko hi n chu kemesa khrü mu n vo rükekhrü zo.

¹⁰A nu, kephomami no cüyi lize, no jüzü tahite. ¹¹Uko poti lize, “Ha mu vorite, za kephu ketola ha fü ba basü, kedi kethi kemo kekri kemo thümao ha dokhri va tasüte; ¹²thejü sheri uko kerhü bala metü ha meku süte, tükhülü lü keta miko bi; ¹³ha kekro kekro mhane zhüko ngoyito, zhüketa ha kiko mele chu süto; ¹⁴n heve ha mu thisüte; ha metü presa kecü mpre sapü,” ¹⁵a nu, uko mu cholü ta tahite; uko shoprikolüno n phe regü süte, ¹⁶kekrelamori uko phezi mhakesulü chorhürhü, mu uko za kedokhrilü rekri. ¹⁷kekrelamori rako mhüjülü khuma kha keta süo nothi kuyi kemo; ¹⁸vele hikoe utho uza kephu ba; uko utho umhanyoko dokhri va. ¹⁹mizü mezi kemoo lü kemeho kehopüri cho hibi zo; süo pü kebamiko mhanyo taketa.

Mhase Chodekolü

²⁰Mhasee chode lü jüpo meto shu; pra kesülü pü mhü rekrü. ²¹mha münyo keti chode kesu lü pü krasefü; nade khrolü khu kelü pü po die:

²²“Dithe la, mhaco kemoko, neko mhaco kemo keti kekhrü tato? Dithe la krünyü kropü uko krünyülü anü tato, mu kenyomi keseko metsü tato? ²³Neko a hunehu ce bala lize, I, Mhase, a rüpü neko yo rü süto; I a jüpo nekoce seyi süto. ^a a v23 Hilü po keba Mhase hi Paule Khrista sizi dzünyi — ha Po mhase zo (1 Corinthians 1:24, 1:30; Colossians 1:15-17). Cejü thi kesu mhüra Poo mu kebala keta Nuoe, sala de reni ketami thüma metüce krasefü. ²⁴I cü ta vele neko reni muta, I abe chopü vele mipüri utütso thiku mota, ²⁵mu neko a mütü metü mhasemo zota, mu a hunehu metü thali tsü ta, ²⁶I sheri neko kemezhe lü rechüto; nethipüe no tüyi süce I krünyü süto, ²⁷nethipüe tükhra sheri no tüyi süce, mu neko kemezhe tükhrapo sheri vori süce, kemezhe mu lüzhe neko yo vori süce.

²⁸Süsa uko ace cü süto, vele I balamoto; uko afü rekri phuto vele asütsümoto, ²⁹kekrelamori uko keseko metsü, mu ha Po reshü keti kedamota, ³⁰pukoe a küpoo thalice ta die, a hunehu metü thathi ta. ³¹Süla pukoe utho u sho se cü süto die, uko doko mi chu süto. ³²Kekrelamori mhaco kemoko u regü ketao puko dokhri süto die, kenyomi u lu kesüo puko müka süto. ³³Vele thüma kehopüri afü reni yo, pü kezü de hü süto die, mha kesu nethipü methi mota de, lu de ba süto.”