Nʼaka Nna

Ndị ezi omume na ndị maara ihe nọ nʼaka Chineke, ma otu ọnwụ na-abịakwasị onye ọ bụla, nke Onye Nkuzi kpọrọ ihe ọjọọ dị nʼokpuru anyanwụ. Ya mere, rie, ṅụọ, hụ nwunye gị nʼanya nʼụbọchị ndị na-agafe agafe nke Nna anyị na-enye, rụsiekwa ọrụ ike mgbe ị ka nwere ike. Oge na ihe na-eme na mberede na-eru onye ọ bụla.

Isi 9.

Etinyere m obi m inyocha ihe ndị a niile: ndị ezi omume, ndị maara ihe, na ọrụ ha dị nʼaka Chineke. Ma ọ bụ ịhụnanya ma ọ bụ ịkpọasị, ọ dịghị onye maara ya—ihe niile dị nʼihu ha. Otu ihe na-adakwasị mmadụ niile: otu akara aka dịrị ndị ezi omume na ndị ajọ omume, ndị ọma, ndị dị ọcha na ndị na-adịghị ọcha, onye na-achụ àjà na onye na-adịghị achụ. Dị ka ọ dịịrị onye ọma, otú ahụ ka ọ dịịrị onye mmehie; onye na-aṅụ iyi, dị ka onye na-atụ egwu ịṅụ iyi. Nke a bụ ihe ọjọọ dị nʼihe niile e mere nʼokpuru anyanwụ: otu akara aka dịrị mmadụ niile. Obi ụmụ mmadụ jupụtara nʼihe ọjọọ, ara jupụtakwara nʼobi ha mgbe ha dị ndụ—emesịa, ha na-aga nʼebe ndị nwụrụ anwụ nọ. Onye ọbụla dị ndụ ka nwere olileanya: nkịta dị ndụ kara ọdụm nwụrụ anwụ mma. Nʼihi na ndị dị ndụ maara na ha ga-anwụ, ma ndị nwụrụ anwụ amaghị ihe ọbụla; ha enwekwaghị ụgwọ ọrụ ọzọ, nʼihi na echefuola ncheta ha. Ịhụnanya ha, ịkpọasị ha, na anyaụfụ ha alaala nʼiyi; ha agaghị eketakwa òkè ọzọ nʼihe ọbụla e mere nʼokpuru anyanwụ.

Gaa, jiri ọṅụ rie achịcha gị, jiri obi ụtọ ṅụọ mmanya gị, nʼihi na Chineke anabatala ọrụ gị. Ka uwe gị na-acha ọcha mgbe niile, ka isi gị ghara ịkọ mmanụ mgbe ọbụla. ^a Soro nwunye gị hụrụ nʼanya nwee obi ụtọ na ndụ, ụbọchị niile na-agabiga agabiga nke ndụ Chineke nyere gị nʼokpuru anyanwụ—ụbọchị gị niile na-agabiga agabiga—nʼihi na nke ahụ bụ òkè gị na ndụ na nʼime ndọgbu ọrụ ị na-adọgbu onwe gị nʼokpuru anyanwụ. Ihe ọbụla aka gị chọtara ime, jiri ike gị mee ya, nʼihi na ọ dịghị ọrụ ma ọ bụ atụmatụ ma ọ bụ ihe ọmụma ma ọ bụ amamihe nʼili, ebe ị na-aga.

Ahụkwara m ọzọ nʼokpuru anyanwụ: ọ bụghị ndị dị ọsọ ọsọ na-emeri nʼọsọ, ọ bụghịkwa ndị dị ike na-emeri nʼagha, ọ bụghị ndị maara ihe na-enweta achịcha, ọ bụghị ndị nwere nghọta na-enweta akụ, ọ bụghịkwa ndị nwere nka na-enweta ihuọma—oge na ihe mberede na-adakwasị ha niile. Ọ dịghị onye maara oge ya: dị ka azụ e jidere nʼụgbụ ọjọọ, dị ka nnụnụ e jidere nʼọnya, a na-ejide ụmụ mmadụ nʼoge ọjọọ nke na-adakwasị ha na mberede.

Onye Maara Ihe nke E Chefuru

Ahụkwara m ihe atụ nke amamihe nke a nʼokpuru anyanwụ, ọ dịkwara m ka ihe dị ukwuu: E nwere otu obodo nta nke mmadụ ole na ole bi nʼime ya: otu eze dị ukwuu bịara ibuso ya agha, gbaa ya gburugburu, wuo nnukwu mgbidi agha megide ya. A chọtara otu ogbenye maara ihe nʼime ya, onye ji amamihe ya zọpụta obodo ahụ, ma ọ dịghị onye chetara ogbenye ahụ. Asịrị m, “Amamihe kara ike mma,” ma a na-eleda amamihe ogbenye ahụ anya, a naghịkwa aṅa okwu ya ntị. A na-anụ okwu dị nwayọọ nke ndị maara ihe karịa mkpu onye na-achị achị nʼetiti ndị nzuzu. Amamihe kara ngwa agha mma, ma otu onye mmehie na-ebibi ọtụtụ ihe ọma.