Job 27

27 ¹Ug gibalik pag-usab ni Job ang iyang pakigpulong ug miingon: ²“Maingon nga buhi ang Dios, nga nagkuha sa akong katarong, ug ang Makagagahom, nga nagpapait sa akong kalag, ³samtang ang akong gininhawa ania pa kanako, ug ang Espiritu sa atong Amahan anaa sa akong ilong, ⁴ang akong mga ngabil dili mosulti ug bakak, ug ang akong dila dili molitok ug limbong. ⁵Dili gayod ako mouyon nga kamo husto; hangtod nga ako mamatay dili ko isalikway ang akong kaligdong. ⁶Gikuptan ko pag-ayo ang akong pagkamatarong ug dili ko kini buhian; ang akong kasingkasing wala magbadlong kanako sa bisan unsang adlaw sa akong kinabuhi.

⁷“Himoa nga ang akong kaaway mahisama sa daotan, ug ang mobatok kanako mahisama sa dili matarong. ⁸Kay unsa may paglaom sa walay Dios kon siya pagaputlon, kon ang Dios mokuha sa iyang kinabuhi? ⁹Mamati ba ang Dios sa iyang pagtuaw kon ang kasakit moabot kaniya? ¹⁰Makakaplag ba siya ug kalipay diha sa Makagagahom? Motawag ba siya sa Dios sa tanang panahon? ¹¹Tudloan ko kamo mahitungod sa kamot sa Dios; dili ko itago kon unsa ang anaa sa Makagagahom. ¹²Tan-awa, kamong tanan nakakita na niini sa inyong kaugalingon; nganong namulong man kamo sa maong walay pulos nga mga pulong? ¹³Mao kini ang bahin sa tawong daotan gikan sa Dios, ang panulondon nga madawat sa mga malupigon gikan sa Makagagahom: ¹⁴Kon daghan ang iyang mga anak, mangamatay sila pinaagi sa espada, ug ang iyang mga kaliwat dili makabaton ug igong tinapay. ¹⁵Kadtong mabilin kaniya ilubong pinaagi sa kamatay, ug ang ilang mga balo dili managpanghilak. ¹⁶Bisan pa nga magtapok siya ug plata nga daw abog ug magtipon ug bisti nga daw yutang kulonon, ¹⁷makatapok man siya, apan ang matarong maoy magsul-ob niini, ug ang walay sala maoy magbahinbahin sa plata. ¹⁸Gitukod niya ang iyang balay nga daw puloy-anan sa anunugba, daw payag nga gihimo sa usa ka magbalantay. ¹⁹Mohigda siya nga dato, apan dili na gayod kini mahitabo pag-usab; mobuka siya sa iyang mga mata, ug nahanaw na ang tanan. ²⁰Ang mga kalisang moabot kaniya nga daw baha; sa kagabhion ang alimpulos mobanlas kaniya. ²¹Ang hangin sa sidlakan moalsa kaniya ug mawala siya; banlason siya niini pagawas sa iyang dapit. ²²Mohasmag kini kaniya nga walay kaluoy; mokalagiw siya nga nagdagan gikan sa gahom niini. ²³Mopakpak kini sa mga kamot niini ngadto kaniya ug mosagubang kaniya pinaagi sa pagsitsit pagawas sa iyang dapit.”