ኢዮብ 27 FHB Father's Heart Bible™

27 ¹ኢዮብ ድማ መሊሱ ዘረባኡ ኣልዒሉ ከምዙይ በለ፦ ²“ፍርደይ ዝወሰደ እግዚኣብሄር ህያው እዩ፥ ነፍሰይ ዘምረረ እቲ ዅሉ ዝኽእልውን ህያው እዩ፥ ³ክሳዕ እስትንፋሰይ ኣባይ ዘሎ፥ መንፈስ ኣቦናውን ኣብ ኣፍንጫይ ዘሎ፥ ⁴ከናፍረይ ሓሰት ኣይዛረባን፥ ልሳነይውን ተንኰል ኣይትነግርን። ⁵ንስኻትኩም ቅኑዓት ምዃንኩም ከቶ ኣይቕበልን፤ ክሳዕ ዝመውት ቅንዕናይ ኣይሓድግን። ⁶ንፅድቀይ ኣፅኒዐ ሒዘ ኣይሓድጎን፤ ልበይ ብዅሉ መዓልቲታተይ ኣይፀርፈንን።

⁷“ፀላእየይ ከም ክፉእ ይኹን፥ ዝላዓለኒውን ከም ዓመፀኛ ይኹን። ⁸እቲ ረሲእ እንተ ጠፍአ እንታይ ተስፋ ኣለዎ፥ እግዚኣብሄር ነፍሱ እንተ ወሰደ? ⁹እግዚኣብሄር ኣውያቱዶ ይሰምዕ፥ ፀበባ ምስ መፅኦ? ¹⁰በቲ ዅሉ ዝኽእል ይሕጐስዶ? ንእግዚኣብሄርዶ ኵሉ ጊዜ ይፅውዖ? ¹¹ብዛዕባ ኢድ እግዚኣብሄር ክምህረኩም እየ፤ እቲ ምስቲ ዅሉ ዝኽእል ዘሎ ኣይሓብኦን እየ። ¹²እንሆ፥ ኵልኻትኩም ባዕልኻትኩም እዙይ ርኢኹም ኢኹም፤ ስለ ምንታይ ደኣ ኸምዙይ ዝበለ ኸንቱ ዘረባ ትዛረቡ? ¹³እቲ ረሲእ ሰብ ካብ እግዚኣብሄር ዝረኽቦ ግደ እዝ እዩ፥ እቶም ገፋዕቲ ኻብቲ ዅሉ ዝኽእል ዝወርስዎ ርስቲ ድማ እዙይ እዩ፦ ¹⁴ደቁ እንተ በዝሑ፥ ብሰይፊ ኽወድቁ እዮም፤ ዘርኡ ድማ እንጀራ ኣይፅግቡን እዮም። ¹⁵እቶም ዝተረፍዎ ብመዓት ክቕበሩ እዮም፤ መበለታቶም ድማ ኣይበኽያን እየን። ¹⁶ብሩር ከም ሓመድ እኳ እንተ ዀመረ፥ ክዳን ድማ ከም መሬት እንተ ዀመረ፥ ¹⁷ይኹመሮ ይኸውን፥ ግና እቲ ፃድቕ ክኽደኖ እዩ፥ እቲ ንፁህ ድማ ነቲ ብሩር ክመቕሎ እዩ። ¹⁸ቤቱ ኸም ጐጆ ብፃዕ፥ ከምቲ ሓላዊ ዝሰርሖ ዳስ ይሰርሕ። ¹⁹ሃብታም ኮይኑ ይድቅስ፥ ግና ደጊም ከምኡ ኣይኸውንን፤ ኣዒንቱ ይኸፍት፥ እንሆ ኸዓ የለን። ²⁰ፍርሓት ከም ማይ ጥፍኣት ይረኽቦ፤ ብለይቲ ኸዓ ንፋስ ኣውሎ ይፀርጎ። ²¹ንፋስ ምብራቕ የልዕሎ እሞ ይሓልፍ፤ ካብ ቦታኡ ድማ ይፀርጎ። ²²ብዘይ ርህራሀ ናብኡ ይውርወር፤ ንሱ ኸዓ ካብ ሓይሉ ቐልጢፉ ይሃድም። ²³ኢዱ የጣቕዓሉ፥ ካብ ቦታኡ ድማ እናኣፋጨወ የውፅኦ።”