Jobei nyibou joyoda

Haoeibü ngühmai sungan apbou Mühghaü lang kibü nyena ngümmaian, Jobei haoeibü jaisi shuong tükde ki dogo alaulabü; haoei haila sühko haoeibü tükde ongtham phoalabü. Kheijinei haoei lolo asaopobü müteibü phejan sungbakei: chandinam phokubü saopobü shuongei lektikubü, nakthühbü yeishikei, hoba mangde chemdang che.

Chapter 27.

Hobaje Jobei nyibou jembü ngühphatbü sungbaan laukei, “Ngeibü ngühmai sungan apbou Mühghaü lang kibü nyena laukho, hoba ngeibü soushou khauko jungeibü Thükenbou nyena laukho, ngeibü hak ngo ka ki shongko, hoba seneibü Bou Soushou ngeibü kungkhüna ki shongko, ngeibü sembungei amlangbü alaulabü, hoba ngeibü lishangei khüpsilang alaulabü. Kan tükde ki dogo ngei ladangkei alaulabü; ngo haila sühko ngeibü tükde ong aphailabü. Ngeibü saopobü ngei himlepan kia, hoba ong aphailabü; ngeibü salang sünga kü maangponei ngo ahimoutilabü.

Ngeibü dangbou amaibü tegü yingshi, hoba kü khulimbo loubou saopobü akibü tegü yingshi. Aishanga asaopobü müt wapan aplaje, haoeibü maanglem ai ki, Mühghaüei haoeibü langkei sungan aplaje? Mühghaüei haoeibü ngek ditlabü lo, khonsak hao thüka loulaje? Haoei Thükenbou to olinlabü lo? Haoei jih pendoua Mühghaü to ngeklabü lo? Mühghaü ik shangabü ngei kan to lentilabü; Thükenbou yoa ai ki kho ngei asatentilabü. Chühashi, kan pendouei ho kan lolo hapa; aila kanei ho tegü ulangtham ngüh lauda? Ho kho amaibü müteibü Mühghaü ka kubü phejan ki, khonkutibü shuongei Thükenbou ka sungletbü phetphan ki: Haoeibü shousi shuong juong kialonga, haoen inei tuonglabü, hoba haoeibü lilabü shuongei shausiyung dangla ahaplabü. Hao phaito jou kibü shuong limei khünlabü, hoba haoeneibü latnyu shuongei ahaaplabü. Haoei chandinam thamngu tegü shaangan phokuakei, hoba neisimei thamchak tegü shaangan phokuakei, Haoei kho shaangan phokulabü, lausikei saopobüei kho neilabü, hoba shed akibü shuongei chandinam janletkulabü. Haoei jembü chem kho aubü chem tegü, lombouei kümbü neichem tegü dangda. Haoei keibou kian yepda, lausikei touje khei akümlabü; haoei jembü nyek ipan, hoba kho akiko apda. Hatlabü yaangbü shuongei hao yungsen tegü lamenda; nangnak yeishikei leian hao soulangda. Chaangbou yeiei hao angtida hoba hao apda; khoei hao jembü kishang ka souan apda. Khoei sanou adambo hao thükto lotda; haoei khoeibü hau ka mütkong satda. Khoei hao khulimbo jembü ik ngümda, hoba hao to metan jembü kishang ka shian satda.”