Ayubu 27 FHB Biblia ya Moyo wa Baba™

27 ¹Ayubu akaendelea tena na hotuba yake, akasema: ²"Kama aishivyo Mungu, aliyeniondolea haki yangu, na Mwenyezi, aliyeitia uchungu nafsi yangu, ³maadamu pumzi yangu ingalimo ndani yangu, na roho wa Baba yetu ingali puani mwangu, ⁴midomo yangu haitanena uongo, wala ulimi wangu hautatamka udanganyifu. ⁵Sitakubali kamwe ya kuwa mna haki; hata nife sitauacha uadilifu wangu. ⁶Naishika sana haki yangu, wala sitaiacha; moyo wangu haunilaumu kwa siku zangu zozote.

⁷"Adui yangu na awe kama mwovu, na yeye ainukaye juu yangu na awe kama asiye na haki. ⁸Kwa maana tumaini la asiyemcha Mungu ni nini akatiliwapo mbali, Mungu aitwaapo nafsi yake? ⁹Je! Mungu atailisikia kilio chake dhiki impatapo? ¹⁰Je! Atajifurahisha katika Mwenyezi? Je! Atamwita Mungu kila wakati? ¹¹Nitawafundisha habari za mkono wa Mungu; sitayaficha yaliyoko kwa Mwenyezi. ¹²Tazameni, ninyi nyote mmeyaona haya wenyewe; mbona basi mnanena maneno matupu hivyo? ¹³Hii ndiyo sehemu ya mtu mwovu kutoka kwa Mungu, urithi wapokeao wadhalimu kutoka kwa Mwenyezi: ¹⁴Watoto wake wakiwa wengi, wataanguka kwa upanga, na wazao wake hawatashiba mkate. ¹⁵Wale wake watakaosalia baada yake watazikwa kwa tauni, na wajane wao hawatalia. ¹⁶Ajapokusanya fedha kama mavumbi, na kurundika mavazi kama udongo, ¹⁷aweza kuyarundika, lakini mwenye haki atayavaa, na asiye na hatia atazigawa fedha. ¹⁸Ajenga nyumba yake kama kifukofuko cha nondo, kama kibanda achukicho mngoja-zamu. ¹⁹Hulala akiwa tajiri, lakini hatafanya hivyo tena; hufumbua macho yake, na hayako. ²⁰Vitisho humpata kama gharika; wakati wa usiku kisulisuli humwondoa. ²¹Upepo wa mashariki humwinua, naye huenda zake; humfagilia mbali na mahali pake. ²²Humrukia bila kumhurumia; hukimbia kwa kasi mbele ya nguvu zake. ²³Huwapigia makofi, na kumzomea atoke mahali pake."