Ayubu Acookia Kwaria Rĩngĩ
Ehĩtĩte na Ngai o ũcio wamũrutĩire kĩhooto gĩake, Ayubu nĩarega kwĩtĩkĩra atĩ arata ake marĩ na ma; nĩakanyiita ũthingu wake nginya akue. Agacooka we mwene agataarĩria igai rĩa mũndũ mwaganu: betha ĩrĩa ĩcookanĩrĩirio yehumbwo nĩ athingu, kĩhuhũkanio gĩa ũtukũ, nyũmba ya ndandĩ.
27 1Naake Ayubu agĩcooka kwaria mĩario yake rĩngĩ, akiuga atĩrĩ: 2“O ta ũrĩa Ngai arĩ muoyo, ũrĩa ũnjagithĩtie kĩhooto gĩakwa, na Mwene-Hinya, ũrĩa ũtũmĩte ngoro yakwa ĩrũrũ, 3rĩrĩa rĩothe mĩhũmũ yakwa ĩrĩ thĩinĩ wakwa, na Roho wa Ithe witũ ũrĩ maniũrũinĩ makwa, 4mĩromo yakwa ndĩkaaria maheeni, na rũrĩmĩ rwakwa rũtikaaria ũhinga. 5Ndirĩ hĩndĩ ngeetĩkĩra atĩ nĩ inyuĩ mũrĩ na kĩhooto; nginya rĩrĩa ngaakua ndikaarekia wagĩrĩru wakwa. 6Nĩnũmĩrĩire ũthingu wakwa na ndikawũrekia; ngoro yakwa ndĩĩnjũkagĩrĩra mũthenya o na ũmwe wa matukũ makwa.
7“Thũ yakwa ĩrotuĩka ta mũndũ mwaganu, nake ũrĩa ũnjũkĩrĩire arotuĩka ta mũndũ ũtarĩ na ũthingu. 8Nĩgũkorwo nĩ kĩĩ mwĩhoko wa mũndũ ũtarĩ na Ngai rĩrĩa aatinio, rĩrĩa Ngai aamũtunya muoyo wake? 9Hihi Ngai nĩakaigua kĩrĩro gĩake rĩrĩa thĩĩna ũkaamũkora? 10Hihi nĩagakenera Mwene-Hinya? Hihi nĩagakaĩra Ngai mahinda mothe? 11Nĩngũmũruta ũhoro wa guoko kwa Ngai; ndikahitha maũndũ marĩa marĩ harĩ Mwene-Hinya. 12Atĩrĩrĩ, inyuothe nĩmwĩyoneire ũndũ ũyũ; nĩ kĩĩ gĩgũtũma mwarie ciugo itarĩ kĩene ũguo? 13Gĩkĩ nĩkĩo gĩcunjĩ kĩa mũndũ mwaganu kuuma kũrĩ Ngai, igai rĩrĩa ahiinyanĩrĩri maamũkagĩra kuuma kũrĩ Mwene-Hinya: 14Ciana ciake ciangĩingĩha, ikooragwo na rũhiũ rwa njora, na rũciaro rwake rũtikaagĩa na irio cia kũiganĩra. 15Arĩa magaatigara thuutha wake magaathikwo nĩ mũthiro, nao atumia ao a ndigwa matikaamarĩrĩra. 16O na aangĩĩigĩra betha ĩingĩ ta rũkũngũ na acookanĩrĩrie nguo ta rĩũmba, 17no acookanĩrĩrie, ĩndĩ mũndũ mũthingu nĩakamĩĩhumba, nao arĩa matarĩ na ihĩtia nĩmakagayana betha ĩyo. 18Aakaga nyũmba yake ta ya memenyi, ta gĩthũnũ kĩrĩa mũrangĩri aakaga. 19Akomaga arĩ mũtongu, no ndagacooka gwĩka ũguo rĩngĩ; ahingũra maitho make, no gũtirĩ kĩndũ gĩtigaire. 20Imakania imũkoragĩrĩra ta mũiyũro wa maaĩ; ũtukũ kĩhuhũkanio kĩa rũhuho nĩkĩmũhurutaga. 21Rũhuho rwa mwena wa irathĩro rũmuoyaga nake agathiĩ; rũkamũhuruta akoima handũ hake. 22Rũmũtharĩkagĩra rũtarĩ na tha; nake agekĩria kũũra ehere hinya waruo. 23Rũmũhũũragĩra hĩ na rũkamũhuũhĩria ruume handũ hake.”