Jobna Awui Khon Latluida Khāngkhui
Awui mashun khuithuimi kahai Vare chiwui mingli khangashit sāda, Jobna ngasotnaobingna mashunga da mahāngmara; ana mathiranglakha eina tangda awui ningsākhangazip singtitra. Chiwui thili makaphā miwui yar ana akhalatta hānga: kaziphai lupāsā khamashungabingna ngavaira, ngayāshong surna ali khuithuihaowa, awui shim karkaopān kathāna.
27 1Kala Jobna latluida awui hāngki khuida hānga: 2"Iwui mashun khuithuimihai Varena theiranu, kala imanglā khāng ngasakkahai Sāshap-pangshapana theiranu, 3iwuklungli khaksui leichingda, kala ithumwui Avāwui Manglā iwui nātangkhurli leichingda, 4imorchaina khangui mahāngmara, kala imalena mikhanam tui matuira. 5Nathum mashunga da I katang mavaila mayā mangarokmara; I thiranglakha eina tangda iwui ningsākhangazip mahorhaimara. 6Iwui khamashung khangarong I singtitta, kala mahorhaimara; iningna iwui atam akhanala ili maphenmana.
7"Iwui yangkashe china makhayā thāda ngasāranu, kala ili ngakaishi kaji china makaphā thāda ngasāranu. 8Kaja vare makathei mi katatchao tharan, Varena awui manglā khuithui tharan, awui kachihān khi leikhala? 9Awuitungli kakhanang rāra tharan, Varena awui khavao shāmirala? 10Sāshap-pangshapali ana ningyāng ungrala? Atam saikorali Vareli ngakaora? 11Varewui pāngwui pongli I nathumli tamchitheira; Sāshap-pangshapali khalei chi I mathummimara. 12Yanglu, nathum saikorana khalatta hi theihaira; khisāda nathum chikathā arema tui hāngkhala? 13Hi chi makhayā mina Varewui eina samphang yarna, rekakharekbingna Sāshap-pangshapawui eina samphang shimluikatna: 14Awui naobing kachungkha khuiakha, athum raighai eina pitāra, kala awui ara̱-azā zāshap masamphangmara. 15Awui eina mathikhangakān athum chi kazāt eina chifara, kala athumwui ra̱meiva̱ ngarāna chapkhangachā masāmara. 16Ana lupā chifa thāda kazipsanglala, kala kashankachon leikhon thāda kazipsangserlala, 17ana chi kazipsangakhala, kha khangarong mina chi ngavaira, kala khayon makhalei mina lupā chi ngayara. 18Awui shim chi sha̱keinaowui shim thāda, khamayona sākai shim thāda sākai. 19Kashānga eina ana pizanga, kha chithada maleiluimara; ana amik rākhui, kala chi shimānhaira. 20Khangacheena tara̱ kaphong thāda ali rātāhaira; ngayāli surna ali phanthuihaora. 21Zingshoshongwui masina ali khāngkhui, kala ana thuihaira; awui apamwui eina ali phurshokhaora. 22China awuitungli lukhamashan maleila ngahortāhaira; ana awui pangshapwui eina katotsisi yāmhaira. 23China awuitungli pangkhum heihaira, kala kasirolaga awui apamwui eina ali kashamshokhaora."
