Jobwui Ngahānkakā
Jobna ali kahaimi ngachonmi chi mana̱shida, chiwui thili ithumwui Avāwui pangshapwui pongli awui ngasotnao chili mataimeida laa sai: okathui hi khamasaitungli hokthanghai, tara̱ muiyāli romhai, shamadru va̱rihai ngasaka, Rahabli ngaphita. Kala hibing saikora hi awui khon kayākha teoda ithumna shākahaiwui ayarnao mangāna, da ana hānga.
26 1Chieina Jobna ngahānkai: 2"Na pangshap makhalei ali kayākha ngachonmi! Yāng makhalei pāngthei chili kayākha huimi! 3Thangkhamei makhalei ali kayākha hāngchitheihaoda, akachanga theishingkakhui chi mavātla chitheimi! 4Khipāwui ngachon eina nana tui hi hānga? Kala khipāwui khaksui nawui eina shoka? 5Tara̱ azingli khalei khaya̱bing, kala chili kapambing saikora kathirra. 6Kathe chi ithumwui Avāwui mangāli asāmsai eina lei, kala Kashimānli fakham maleimana. 7Atungshongwui kazingram chi arema pamwuitungli ana phayaishoka; okathui chi khikha maleiwuitungli ana huishipmi. 8Ana tara̱ chi awui muiyā kashāli fakhami, chithālala muiyā chi akharit azingli mangaphokmara. 9Kachāng malingtingwui mai chi ana fakhami, awui muiyā chiwuitungli ngapānmi. 10Kahor eina tangkhamang ngachaili thari sāda, ana tara̱wui mai kuimareida kakhanhaira. 11Kazingramwui pākra̱bing awui kakharar eina matakhakhaida nganuka. 12Ana awui pangshap eina shamadru va̱rihai ngasaka; awui theishingkakhui eina shamadruwui sārei Rahab chi sākachupa. 13Awui khaksui eina kazingram mashāvā ngasaka; awui pāngna khayonga phara̱ chi rungthata. 14Kala hibing hi awui apongwui kuimareida khalei māngna; ithumna awui pongli akhonnao nao akhamāng shāra! Kha awui pangshapwui khangashum chi, khipāna theikhuishaprakhala?"
